- ಅಜಿತ್‌ ಸ್ವರ್ಗ ಪೆರ್ಲ
ಉತ್ತಮ ಇಳುವರಿ ವೇಳೆ ಬೆಲೆ ಕುಸಿತ ಸಹಜ. ಆದರೆ ಈ ಮಟ್ಟದಲ್ಲಿ ಬೆಲೆ ಕುಸಿದಿರಲಿಲ್ಲ. ರೋಗ ಬಾಧೆಯಿಂದ ರಬ್ಬರ್‌ ಎಲೆಗಳು ಉದುರಿರುವುದರಿಂದ ಶೇ. 25ರಷ್ಟು ಹಾಲು ಉತ್ಪಾದನೆ ಕಡಿಮೆಯಾಗಿದೆ ಎಂದು ಕೃಷಿಕರು ಹೇಳುತ್ತಿದ್ದಾರೆ.
ರಬ್ಬರ್‌ ಹಾಲಿನ ಬೆಲೆ ಏರಿಕೆ
ಪ್ರತಿ ಕೆಜಿಗೆ 110 ರೂ. ಇದ್ದ ರಬ್ಬರ್‌ ಹಾಲಿನ ಬೆಲೆ ಪ್ರಸ್ತುತ 122 ರೂ.ಗೆ ತಲುಪಿದೆ. ರಬ್ಬರ್‌ ಕಂಪನಿಗಳು ಲ್ಯಾಟೆಕ್ಸ್‌ ಸಂಗ್ರಹ ಆರಂಭಿಸಿರುವುದು ರಬ್ಬರ್‌ ಹಾಲಿನ ಬೆಲೆ ಏರಿಕೆಗೆ ಕಾರಣವಾಗಿದೆ.
ಗುಣಮಟ್ಟ ನಿಗದಿ ಪ್ರಕ್ರಿಯೆ ಕೈಬಿಟ್ಟ ಬಿಐಎಸ್‌
ರಬ್ಬರ್‌ ಹಾಲಿನ ಗುಣಮಟ್ಟ ನಿಗದಿಪಡಿಸುವ ಪ್ರಕ್ರಿಯೆಯನ್ನು ಬ್ಯೂರೋ ಆಫ್‌ ಇಂಡಿಯನ್‌ ಸ್ಟಾಂಡರ್ಡ್ಸ್ (ಬಿಐಎಸ್‌) ಕೈಬಿಟ್ಟಿದೆ. ರಬ್ಬರ್‌ ಹಾಲಿಗೆ ಗ್ರೇಡ್‌ ನಿಗದಿಪಡಿಸುವಂತೆ ಪ್ರಧಾನಿಗೆ ಮನವಿ ಕಳುಹಿಸಲಾಗಿತ್ತು. 2017ರಲ್ಲಿ ಪ್ರಧಾನಿ ಕಚೇರಿ ಈ ವಿಷಯವನ್ನು ಬಿಐಎಸ್‌ನ ಪರಿಗಣನೆಗೆ ಬಿಟ್ಟಿತ್ತು. ಬಿಐಎಸ್‌ ಗ್ರೇಡ್‌ ನಿಗದಿ ಕುರಿತು ಅಧ್ಯಯನ ನಡೆಸಿ ವರದಿ ನೀಡುವಂತೆ ರಬ್ಬರ್‌ ಮಂಡಳಿಯ ಸಂಶೋಧನಾ ಕೇಂದ್ರಕ್ಕೆ ನಿರ್ದೇಶನ ನೀಡಿತ್ತು. ಆದರೆ ನಾಲ್ಕು ವರ್ಷ ಅಧ್ಯಯನ ನಡೆಸಿದ ಸಂಶೋಧನಾ ಕೇಂದ್ರ ಗ್ರೇಡ್‌ ನಿರ್ಣಯಿಸುವುದು ಅಸಾಧ್ಯ ಎಂದು ವರದಿ ನೀಡಿದ್ದು, ಬಿಐಎಸ್‌ ಗ್ರೇಡ್‌ ನಿರ್ಣಯ ಪ್ರಕ್ರಿಯೆ ಕೈಬಿಟ್ಟಿದೆ. ಚಿಪ್ಪಿ ಹಾಲಿಗೂ ಗುಣಮಟ್ಟ ನಿಗದಿಪಡಿಸಿದರೆ ದೊಡ್ಡ ಪ್ರಮಾಣದಲ್ಲಿ ರಫ್ತು ನಡೆದು ಬೆಲೆ ಏರಿಕೆಗೆ ಕಾರಣವಾಗುತ್ತಿತ್ತು.
ರಬ್ಬರ್‌ ಬೋರ್ಡ್‌ ವರದಿಗೆ ವಿರೋಧ
ರಬ್ಬರ್‌ ಹಾಲಿನ ಗ್ರೇಡ್‌ ನಿರ್ಣಯ ಕುರಿತಂತೆ ನಾಲ್ಕು ವರ್ಷ ಅಧ್ಯಯನ ನಡೆಸಿದ ರಬ್ಬರ್‌ ಸಂಶೋಧನಾ ಕೇಂದ್ರ ನ. 30ರಂದು ಬಿಐಎಸ್‌ ಮತ್ತು ವಾಣಿಜ್ಯ ಸಚಿವಾಲಯಕ್ಕೆ ವರದಿ ಸಲ್ಲಿಸಿದೆ. ರಬ್ಬರ್‌ ಬೋರ್ಡ್‌ನ ನಕಾರಾತ್ಮಕ ವರದಿಗೆ ಬೆಳೆಗಾರರು ವಿರೋಧ ವ್ಯಕ್ತಪಡಿಸಿದ್ದಾರೆ. ಸಬ್ಸಿಡಿ, ಸ್ಥಿರ ಬೆಲೆ ಯೋಜನೆ ಮೂಲಕ ಬೆಳೆಗಾರರಿಗೆ ಲಭಿಸಬೇಕಾದ ಮೊತ್ತ, ಇತರ ಯಾವುದೇ ಸವಲತ್ತುಗಳು ರಬ್ಬರ್‌ ಬೆಳೆಗಾರರಿಗೆ ಸಮರ್ಪಕವಾಗಿ ಲಭಿಸುತ್ತಿಲ್ಲ ಎಂದು ದೂರಿದ್ದಾರೆ.
ಚೀನಾ ನಿರ್ಬಂಧ ತೆರವು?
ಕೋವಿಡ್‌ ಬಳಿಕ 180 ರೂ.ವರೆಗೆ ಏರಿಕೆಯಾಗಿದ್ದ ರಬ್ಬರ್‌ ಧಾರಣೆ ಪ್ರಸ್ತುತ 40 ರೂ.ಗೂ ಹೆಚ್ಚು ಕುಸಿದಿದೆ. ಚೀನಾದ ಕೋವಿಡ್‌ ನಿರ್ಬಂಧ, ಟಯರ್‌ ಕಂಪನಿಗಳಿಂದ ರಾಸಾಯನಿಕ ರಬ್ಬರ್‌ ಬಳಕೆ, ಆರ್ಥಿಕ ಮುಗ್ಗಟ್ಟಿನ ಭೀತಿ ಬೆಲೆ ಕುಸಿತಕ್ಕೆ ಕಾರಣವಾಗಿವೆ.
ಟಯರ್‌ ಕಂಪನಿಗಳು ರಬ್ಬರ್‌ ಖರೀದಿ ಆರಂಭಿಸಿದರೂ ಬೆಲೆ ಹೆಚ್ಚಿಲ್ಲ. ಉತ್ಪಾದನೆಗೆ ಅನುಗುಣವಾಗಿ ಬಳಕೆ ಹೆಚ್ಚದಿರುವುದು ರಬ್ಬರ್‌ ವಲಯ ಎದುರಿಸುತ್ತಿರುವ ಪ್ರಮುಖ ಸವಾಲಾಗಿದೆ. 2022ರಲ್ಲಿ ಜಾಗತಿಕ ರಬ್ಬರ್‌ ಉತ್ಪಾದನೆ ಹಿಂದಿನ ವರ್ಷಕ್ಕಿಂತ ಶೇ. 4ರಷ್ಟು ಹೆಚ್ಚಿದೆ. ಆದರೆ ಬೇಡಿಕೆ ಕೇವಲ ಶೇ. 2ರಷ್ಟು ಹೆಚ್ಚಿದೆ. ಚಳಿಗಾಲದಲ್ಲಿ ಚೀನಾದಲ್ಲಿ ರಬ್ಬರ್‌ ಉತ್ಪಾದನೆ ಕುಸಿತ ರಫ್ತುದಾರ ದೇಶಗಳಿಗೆ ಪ್ರಯೋಜನವಾಗಲಿದೆ. 2023ರ ಮಧ್ಯದಲ್ಲಿ ರಬ್ಬರ್‌ ಬೆಲೆ ಸ್ವಲ್ಪಮಟ್ಟಿಗೆ ಚೇತರಿಸುವ ಸಾಧ್ಯತೆ ಇದೆ.
ವರದಿಯಲ್ಲಿ ಉಲ್ಲೇಖಿಸಲಾದ ಅಂಶಗಳು
* ದೀರ್ಘಕಾಲ ರಬ್ಬರ್‌ ಹಾಲು ಸಂಗ್ರಹಿಸಿಡುವುದು ಲಾಭಕರವಲ್ಲ.
* ಹಾಲನ್ನು ದೀರ್ಘಕಾಲ ಶೇಖರಿಸಿದರೆ ರಬ್ಬರ್‌ ಹಾಲಿನ ಪ್ರಮಾಣ ಕಡಿಮೆಯಾಗುವುದು. ಇದರಿಂದ ಲಾಭವಾಗದು.
* ರಬ್ಬರ್‌ ಹಾಲನ್ನು ದೀರ್ಘಕಾಲ ಸಂಗ್ರಹಿಸಿಟ್ಟರೆ ಕೀಟಗಳು ಮತ್ತು ಸೂಕ್ಷ್ಮಜೀವಿಗಳು ಉತ್ಪತ್ತಿಯಾಗಿ ಆರೋಗ್ಯ ಸಮಸ್ಯೆ ಎದುರಾಗುವುದು.
* ರಬ್ಬರ್‌ ಹಾಲನ್ನು ಬೇರೆ ದೇಶಗಳಿಂದ ಆಮದು ಮಾಡಿಕೊಂಡರೆ, ಅಲ್ಲಿನ ಕೀಟಗಳು ಮತ್ತು ಸೂಕ್ಷ್ಮಜೀವಿಗಳು ಇಲ್ಲಿಗೆ ತಲುಪಬಹುದು. ಇಲ್ಲಿ ಜಲಮೂಲಗಳು ಹೆಚ್ಚಿರುವ ಕಾರಣ ಇವುಗಳ ಬೆಳವಣಿಗೆಗೆ ಸಹಾಯಕವಾಗುವುದು.
* ರಬ್ಬರ್‌ ಹಾಲಿನ ಪ್ರಮಾಣದ ವ್ಯತ್ಯಾಸದಿಂದ ಗ್ರೇಡ್‌ ನಿರ್ಣಯ ಪ್ರಾಯೋಗಿಕವಾಗಿಲ್ಲ.