ಬೆಳ್ಳಿತೆರೆಯಲ್ಲೂ ಖಳನಾಯಕಿಯಾದ 'ಅಗ್ನಿಸಾಕ್ಷಿ' ಪ್ರಿಯಾಂಕಾ! ಯಾವುದು ಆ ಸಿನಿಮಾ?

'ಅಗ್ನಿಸಾಕ್ಷಿ' ಧಾರಾವಾಹಿಯಲ್ಲಿ ಚಂದ್ರಿಕಾ ಅನ್ನೋ ವಿಲನ್ ಪಾತ್ರ ಮಾಡಿ ಜನಪ್ರಿಯರಾಗಿದ್ದರು ನಟಿ ಪ್ರಿಯಾಂಕಾ. ಆನಂತರ 'ಬಿಗ್ ಬಾಸ್' ಮನೆಗೂ ಹೋಗಿದ್ದ ಈ ನಟಿ ಈಗ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ನೀಡುವುದಕ್ಕೆ ಸಜ್ಜಾಗಿದ್ದಾರೆ. ವಿಶೇಷವೆಂದರೆ, ಧಾರಾವಾಹಿಯಲ್ಲಿ ಖಳನಾಯಕಿ ಪಾತ್ರ ಮಾಡಿದ್ದ ಪ್ರಿಯಾಂಕಾ, ಚೊಚ್ಚಲ ಸಿನಿಮಾದಲ್ಲೂ ಖಳ ಪಾತ್ರವನ್ನೇ ಮಾಡಿದ್ದಾರೆ. ಹಾಗಾದರೆ, ಆ ಸಿನಿಮಾ ಯಾವುದು? ಇಲ್ಲಿದೆ ಮಾಹಿತಿ.

ಫ್ಯಾಂಟಸಿ ಕಥೆಯಲ್ಲಿ ಪ್ರಿಯಾಂಕಾ
ಪ್ರಿಯಾಂಕಾ ನಟಿಸಲಿರುವ ಈ ಸಿನಿಮಾದ ಹೆಸರು 'ಫ್ಯಾಂಟಸಿ'. ಸೈಕಲಾಜಿಕಲ್ ಥ್ರಿಲ್ಲರ್ ಮಾದರಿಯ ಈ ಸಿನಿಮಾವನ್ನು ನಿರ್ದೇಶನ ಮಾಡಿರುವುದು ಆರ್. ಪವನ್ ಕುಮಾರ್. ವಿಶೇಷವೆಂದರೆ, ಈ ಸಿನಿಮಾಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆಯವುದರ ಜೊತೆಗೆ ನಿರ್ಮಾಣವನ್ನೂ ಮಾಡಿದ್ದಾರೆ. ಪವನ್‌ರ ಈ ಸಾಹಸಕ್ಕೆ ಸಾಥ್ ನೀಡಿರುವ ಅವರ ಪೋಷಕರಾದ ಎಂ. ಮಹಾದೇವಿ, ಟಿ. ರಂಗಸ್ವಾಮಿ ಚಿತ್ರಕ್ಕೆ ಸಹ-ನಿರ್ಮಾಪಕರಾಗಿದ್ದಾರೆ. 'ಡ್ರಾಮಾ ಜ್ಯೂನಿಯರ್ಸ್' ಸೀಸನ್ 3ರಲ್ಲಿ ಅಂತಿಮ ಹಂತ ತಲುಪಿದ್ದ ಸ್ಪರ್ಧಿ ಅನುರಾಗ್ ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಇಡೀ ಕಥೆ ಅನುರಾಗ್ ಮತ್ತು ಪ್ರಿಯಾಂಕಾ ಅವರ ಸುತ್ತವೇ ಸಾಗಲಿದೆಯಂತೆ.

ಮರ್ಡರ್ ಮಿಸ್ಟರಿ ಇರುವ ಕಥೆ
'ಪ್ರಿಯಾಂಕಾ ಮತ್ತು ಅನುರಾಗ್ ಪಾತ್ರಗಳು ಮುಖಾಮುಖಿಯಾಗಿ ಕಾಣಿಸಿಕೊಳ್ಳಲಿವೆ. ಇಲ್ಲಿ ಒಂದು ಸಾವಿನ ಸುತ್ತವೂ ಕಥೆ ಸಾಗಲಿದೆ. ಸಾಕಷ್ಟು ತಿರುವುಗಳಿಂದ ಕೂಡಿದ ಕಥೆ ಇಲ್ಲಿ ಇರಲಿದೆ. ಶೀರ್ಷಿಕೆಗೆ ತಕ್ಕಂತೆ ಭ್ರಮೆ ಮತ್ತು ವಾಸ್ತವದ ನಡುವೆ ಕಥೆ ನಡೆಯುತ್ತಿರುತ್ತದೆ' ಎಂದು ಚಿತ್ರದ ಕಥೆ ಬಗ್ಗೆ ಮಾಹಿತಿ ನೀಡುತ್ತಾರೆ ಪವನ್. ಈ ಮೊದಲು ನಿರ್ದೇಶಕರಾದ ಗುರು ದೇಶಪಾಂಡೆ, ಕೆ.ಎಂ. ಚೈತನ್ಯ ಅವರ ಬಳಿ ಕೆಲಸ ಮಾಡಿದ ಅನುಭವ ಇದೆ. ಅಲ್ಲದೆ, ಪವನ್‌ ಚಿತ್ರರಂಗಕ್ಕೆ ಬರಲು ಚಿರಂಜೀವಿ ಸರ್ಜಾ ಅವರೇ ಕಾರಣವಂತೆ.

ಬಿಗ್ ಬಾಸ್‌ನಿಂದ ಹೊರಬರುತ್ತಿದ್ದಂತೆಯೇ ಪ್ರಿಯಾಂಕಾ ಶಿವಣ್ಣಗೆ ಎದುರಾಯ್ತು ಬಿಗ್ ಶಾಕ್

ಇನ್ನುಳಿದಂತೆ, ಮೈಸೂರು ಬಾಲ, ಹರಿಣಿ, ಹೇಮಂತ್ ಪೋಷಕ ಪಾತ್ರಗಳಲ್ಲಿ ಇದ್ದಾರೆ. ಸೆಪ್ಟೆಂಬರ್‌ನಲ್ಲಿ ಶೂಟಿಂಗ್ ಶುರು ಮಾಡಿ, 23 ದಿನಗಳಲ್ಲಿ ಮುಗಿಸಲಾಗಿದೆ. ಬಹುತೇಕ ಚಿತ್ರೀಕರಣ ಮಡಿಕೇರಿಯಲ್ಲಿ ನಡೆದಿದ್ದು, ಬೆಂಗಳೂರಿನಲ್ಲಿ ಒಂದು ದಿನ ಶೂಟಿಂಗ್‌ ಬಾಕಿ ಇದೆ. ಹಿರಿಯ ಛಾಯಾಗ್ರಾಹಕರಾದ ಪಿಕೆಎಚ್‌ ದಾಸ್‌ ಈ ಚಿತ್ರಕ್ಕೆ ಕೆಲಸ ಮಾಡಿದ್ದಾರೆ. 'ಫ್ಯಾಂಟಸಿ' ಹಾಡುಗಳಿಗೆ ಆರ್ ಎಸ್. ಗಣೇಶ್ ನಾರಾಯಣ್ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಚಿತ್ರಕ್ಕೆ 'ಫ್ಯಾಂಟಸಿ' ಅಂತ ಯಾಕೆ ಶೀರ್ಷಿಕೆ ಇಡಲಾಗಿದೆ ಎಂಬುದು ಕ್ಲೈಮ್ಯಾಕ್ಸ್‌ನಲ್ಲಿ ಗೊತ್ತಾಗಲಿದೆಯಂತೆ! ಈ ಸಿನಿಮಾದ ಟೀಸರ್ ಗುರುವಾರ (ಅ.15) ರಿಲೀಸ್ ಆಗಿದೆ.

'ಅಗ್ನಿಸಾಕ್ಷಿ' ಧಾರಾವಾಹಿ ಚಂದ್ರಿಕಾ ಪಾತ್ರಧಾರಿ ರಾಜೇಶ್ವರಿ ಮಗಳು ಈಗ ಹೇಗಿದ್ದಾರೆ?