'ಕಸ್ತೂರಿ ಮಹಲ್' ಚಿತ್ರದಿಂದ ಹೊರನಡೆದ ರಚಿತಾ ರಾಮ್‌! ಈ ದಿಢೀರ್ ಬೆಳವಣಿಗೆಗೆ ಕಾರಣವೇನು?

ಲಾಕ್‌ಡೌನ್‌ನಿಂದಾಗಿ ಎಷ್ಟೋ ಸಿನಿಮಾಗಳ ಶೂಟಿಂಗ್ ನಿಂತುಹೋಗಿತ್ತು. ಹೊಸ ಸಿನಿಮಾಗಳು ಸೆಟ್ಟೇರಿರಲಿಲ್ಲ. ಅಂಥದ್ದರ ಮಧ್ಯೆಯೇ ಗ್ರ್ಯಾಂಡ್ ಆಗಿ ಲಾಂಚ್ ಆಗಿದ್ದ ಸಿನಿಮಾ 'ಕಸ್ತೂರಿ ಮಹಲ್'! 'ಅಮೃತವರ್ಷಿಣಿ', 'ಸುಪ್ರಭಾತ', 'ಅಭಿ', 'ಲಾಲಿ' ಸೇರಿದಂತೆ ಅನೇಕ ಹಿಟ್ ಸಿನಿಮಾಗಳನ್ನು ನಿರ್ದೇಶನ ಮಾಡಿದ ದಿನೇಶ್ ಬಾಬು ಅವರ 50ನೇ ಸಿನಿಮಾ ಇದಾಗಿತ್ತು. ರಚಿತಾ ರಾಮ್‌, ಸ್ಕಂದ ಅಶೋಕ್, ಶ್ರುತಿ ಪ್ರಕಾಶ್ ಪ್ರಮುಖ ಪಾತ್ರದಲ್ಲಿದ್ದರು. ಆದರೆ, ಈಗ ಒಂದು ದಿಢೀರ್ ಬದಲಾವಣೆ ತಂಡದಲ್ಲಿ ಆಗಿದೆ. ಈ ಸಿನಿಮಾದಿಂದ ನಟಿ ರಚಿತಾ ರಾಮ್‌ ಹೊರನಡೆದಿದ್ದಾರೆ!

ಕಸ್ತೂರಿ ಮಹಲ್‌ನಲ್ಲಿ ಇರುವುದಿಲ್ಲ ರಚಿತಾ
ಸಿನಿಮಾ ಲಾಂಚ್‌ ವೇಳೆ ರಚಿತಾ ರಾಮ್‌ ಈ ಸಿನಿಮಾದ ಕುರಿತು ಬಹಳ ಪ್ರೀತಿಯಿಂದಲೇ ಮಾತನಾಡಿದ್ದರು. ಆದರೆ, ಈಗ ಅಚ್ಚರಿ ಬೆಳವಣಿಗೆಯಲ್ಲಿ ಸಿನಿಮಾದಿಂದ ಅವರೇ ಹೊರನಡೆದಿದ್ದಾರೆ. ಅಷ್ಟಕ್ಕೂ ಅವರು ಈ ರೀತಿ ಹೊರನಡೆಯಲು ಕಾರಣವೇನು? ಡೇಟ್‌ ಸಮಸ್ಯೆ! ಹೌದು, ಅಕ್ಟೋಬರ್ 5ರಿಂದ ಸಿನಿಮಾದ ಶೂಟಿಂಗ್ ಮಾಡಬೇಕು ಎಂದು ದಿನೇಶ್ ಬಾಬು ಪ್ಲ್ಯಾನ್ ಮಾಡಿಕೊಂಡಿದ್ದರು. ಆದರೆ, ರಚಿತಾ ಕೈಯಲ್ಲಿ ಈಗ ಸಿಕ್ಕಾಪಟ್ಟೆ ಸಿನಿಮಾಗಳಿವೆ. ಆದ್ದರಿಂದ ಈ ಸಿನಿಮಾಗೆ ಡೇಟ್ ಹೊಂದಾಣಿಕೆ ಮಾಡಿಕೊಳ್ಳಲು ಸಾಧ್ಯವಾಗುತ್ತಿಲ್ಲವಂತೆ! ಈ ಎಲ್ಲ ಕಾರಣಗಳಿಂದಲೇ ಅವರು ಹೊರನಡೆದಿದ್ದಾರೆ ಎನ್ನಲಾಗಿದೆ.

ಅವರ ಜಾಗಕ್ಕೆ ಯಾರು?
ಸದ್ಯ ನಿರ್ದೇಶಕ ದಿನೇಶ್‌ ಬಾಬು ಅವರಿಗೆ ಈ ಪ್ರಶ್ನೆ ಎದುರಾಗಿದೆ. ಆಗಸ್ಟ್‌ನಲ್ಲಿ ಗ್ರ್ಯಾಂಡ್‌ ಆಗಿ ಲಾಂಚ್ ಆಗಿದ್ದ 'ಕಸ್ತೂರಿ ಮಹಲ್' ಸಿನಿಮಾಕ್ಕೆ ಅ.5ರಿಂದ ಶೂಟಿಂಗ್ ಮಾಡಬೇಕು ಎಂದು ನಿರ್ದೇಶಕರು ಅಂದುಕೊಂಡಿದ್ದಾರೆ. ಅದಕ್ಕೆ ಇನ್ನೂ 15ನೇ ದಿನಗಳು ಬಾಕಿ ಇದೆ. ಅಷ್ಟರಲ್ಲಿ ರಚಿತಾ ಸಿನಿಮಾದಿಂದ ಹೊರನಡೆದಿರುವುದರಿಂದ ಆ ಜಾಗಕ್ಕೆ ಮತ್ತೋರ್ವ ಸೂಕ್ತ ನಟಿಯನ್ನು ಆಯ್ಕೆ ಮಾಡಬೇಕಾದ ಜವಾಬ್ದಾರಿ ಚಿತ್ರತಂಡದ ಮೇಲಿದೆ. ಶೂಟಿಂಗ್ ಆರಂಭಗೊಳ್ಳುವುದರೊಳಗಾಗಿ ನಟಿಯನ್ನು ಆಯ್ಕೆ ಮಾಡಲಿದ್ದಾರಂತೆ ದಿನೇಶ್ ಬಾಬು.

ಶೀರ್ಷಿಕೆಯಿಂದ ಶುರುವಾಗಿತ್ತು ವಿವಾದ!
ಆರಂಭದಲ್ಲಿ ಈ ಸಿನಿಮಾಗೆ 'ಕಸ್ತೂರಿ ನಿವಾಸ' ಅಂತ ಟೈಟಲ್ ಇಡಲಾಗಿತ್ತು. ಇದು ಡಾ. ರಾಜ್‌ಕುಮಾರ್ ಅಭಿಮಾನಿಗಳಿಗೆ ಬೇಸರ ಉಂಟು ಮಾಡಿತ್ತು. ಅಭಿಮಾನಿಗಳ ಬೇಸರವನ್ನು ಅರಿತುಕೊಂಡ ಚಿತ್ರತಂಡ, ಶೀರ್ಷಿಕೆಯನ್ನು 'ಕಸ್ತೂರಿ ಮಹಲ್‌' ಎಂದು ಬದಲಾಯಿಸಿತ್ತು. ಇದೊಂದು ಹಾರರ್ ಥ್ರಿಲ್ಲರ್ ಮಾದರಿಯ ಸಿನಿಮಾವಾಗಿದೆ. ರುಬೇನ್ ರಾಜ್ ಮತ್ತು ರವೀಶ್ 'ಕಸ್ತೂರಿ ಮಹಲ್‌'ಗೆ ಹಣ ಹಾಕುತ್ತಿದ್ದಾರೆ.

ನಟಿ ರಚಿತಾ ರಾಮ್‌ ಹೊಸ ಸಿನಿಮಾಕ್ಕಾಗಿ ಅಣ್ಣಾವ್ರ 'ಕಸ್ತೂರಿ ನಿವಾಸ' ಟೈಟಲ್‌ ಮರುಬಳಕೆ

ಸದ್ಯ ರಚಿತಾ ರಾಮ್ ನಟನೆಯ '100', 'ಏಕ್‌ ಲವ್ ಯಾ' ಜೊತೆಗೆ ತೆಲುಗಿನಲ್ಲಿ ಮೊದಲ ಬಾರಿಗೆ ನಟಿಸಿರುವ 'ಸೂಪರ್ ಮಚ್ಚಿ' ಸಿನಿಮಾಗಳು ತೆರೆಗೆ ಸಿದ್ಧವಾಗಿವೆ. ಇದರೊಂದಿಗೆ 'ವೀರಂ', 'ಏಪ್ರಿಲ್‌', 'ಲಿಲ್ಲಿ' ಹಾಗೂ ಮಯೂರ ರಾಘವೇಂದ್ರ ಮತ್ತು ಎಸ್‌. ರವೀಂದ್ರನಾಥ್‌ ನಿರ್ದೇಶನದ ಸಿನಿಮಾಗಳ ಶೂಟಿಂಗ್ ಇನ್ನಷ್ಟೇ ಶುರುವಾಗಬೇಕಿದೆ.

ರಚಿತಾ ರಾಮ್ 'ಕಸ್ತೂರಿ ನಿವಾಸ' ಟೈಟಲ್‌ಗೆ ವಿರೋಧ: ಹೆಸರು ಬದಲಾಯಿಸಿದ ಸಿನಿಮಾ ತಂಡ!