ಆ್ಯಂಟಿ ಒಬೆಸಿಟಿ ಇಂಜೆಕ್ಷನ್‌ ತೆಗೆದುಕೊಳ್ಳುವ ಮೊದಲು ಯೋಚಿಸಿ

ಭಾರತದಲ್ಲಿ ಸ್ಥೂಲಕಾಯ ಸಮಸ್ಯೆ ದಾಖಲೆ ಪ್ರಮಾಣದಲ್ಲಿ ಏರಿಕೆಯಾಗುತ್ತಿದೆ. ತೂಕ ಇಳಿಸಿಕೊಳ್ಳಲು ಜನರು ನಾನಾ ಸರ್ಕಸ್‌ ನಡೆಸುತ್ತಿದ್ದಾರೆ. ಹಲವರು ಸರ್ಜರಿ ಮೊರೆ ಹೋದರೆ, ಕೆಲವರು ಡಯಟ್‌ ಪಾಲನೆ ಮಾಡುತ್ತಾರೆ. ಹಲವಷ್ಟು ಮಂದಿ ತೂಕ ಇಳಿಸುವ ಔಷಧಗಳ ಮೊರೆ ಹೋಗುತ್ತಾರೆ. ಈಗ ತೂಕ ಇಳಿಸುವ ಇಂಜೆಕ್ಷನ್‌ನತ್ತ ಆಸಕ್ತಿ ತೋರುತ್ತಿದ್ದಾರೆ. ಆದರೆ ಆ ಇಂಜೆಕ್ಷನ್‌ ತೆಗೆದುಕೊಳ್ಳುವ ಮೊದಲು ಮತ್ತೊಮ್ಮೆ ಯೋಚಿಸುವುದು ಉತ್ತಮ.

ತೂಕ ಇಳಿಸಿಕೊಳ್ಳಬೇಕೆಂಬ ಆಕಾಂಕ್ಷಿಗಳಿಂದಾಗಿ ವಿಕ್ಟೊಜಾ ಇಂಜೆಕ್ಷನ್‌ಗೆ ಭಾರತದಲ್ಲಿ ಬೇಡಿಕೆ ಕುದುರಿದೆ. ಆದರೆ ಇದು ಮೊದಲಿಗೆ ಡಯಾಬಿಟಿಸ್‌ ನಿಯಂತ್ರಣಕ್ಕೆ ನೀಡುತ್ತಿದ್ದ ಇಂಜೆಕ್ಷನ್‌. ಸ್ಥೂಲ ಕಾಯ ಚಿಕಿತ್ಸೆಗೆ ಬಳಸುತ್ತಿರಲಿಲ್ಲ. ಇದರಿಂದ ತೂಕ ಇಳಿಸಿಕೊಂಡರೆ ಥೈರಾಯ್ಡ್, ಕ್ಯಾನ್ಸರ್ ಸೇರಿದಂತೆ ಇತರ ಆರೋಗ್ಯ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತದೆ. ಇದರಿಂದ ತೂಕ ಇಳಿಕೆ ತಾತ್ಕಾಲಿಕ ಫಲಿತಾಂಶ ಎನ್ನುತ್ತಾರೆ ಆರೋಗ್ಯ ತಜ್ಞರು. ಹೀಗಾಗಿ
ಇದರ ಬಳಕೆಗೆ ಮುಂದಾಗುವವರು ತಜ್ಞರ ಜತೆ ಚರ್ಚಿಸಿ ಅವರ ಸಲಹೆಯಂತೆ ನಡೆದುಕೊಳ್ಳುವುದು ಒಳ್ಳೆಯದು.

ಈ ಇಂಜೆಕ್ಷನ್‌ ನಾವು ಸೇವಿಸುವ ಆಹಾರದ ಪ್ರಮಾಣವನ್ನು ನಿಯಂತ್ರಿಸುತ್ತದೆ ಎಂಬುದು ನಿಜ. ಹೊಟ್ಟೆ ತುಂಬಿದ ಅನುಭವ ನೀಡುವ ಕಾರಣ ತೂಕ ಇಳಿಕೆಗೆ ಸಹಕಾರಿಯಾಗುತ್ತದೆ ಎಂಬ ವಾದವೂ ಇದೆ. ಯಾವುದಕ್ಕೂ ಈ ನಿಟ್ಟಿನಲ್ಲಿ ಸಾವಧಾನದ ಮತ್ತು ಎಚ್ಚರಿಕೆಯ ಹೆಜ್ಜೆ ಇಡಿ.