ನಿಮ್ಮದು ಮಂಗನಂತಹ ಚಂಚಲ ಮನಸ್ಸು ಎನ್ನುವುದುನ್ನು ತಿಳಿಸುವ ಲಕ್ಷಣಗಳಿವು

ನಮ್ಮ ಮನಸ್ಸು ಸದಾ ಒಂದಲ್ಲಾ ಒಂದು ವಿಷಯದಲ್ಲಿ ತೊಡಗಿಸಿಕೊಂಡೇ ಇರುತ್ತದೆ. ಇದನ್ನೇ ನಾವು ಆಲೋಚನೆ ಎಂದು ಕರೆಯುತ್ತೇವೆ. ಆರೋಗ್ಯಕರ ಮನಸ್ಸಿನಲ್ಲಿ ಒಂದು ವಿಷಯದ ಕುರಿತ ಆಲೋಚನೆ ಅದಕ್ಕೆ ಸಂಬಂಧಿಸಿದ ವಿಷಯಗಳ ಕುರಿತೇ ಇದ್ದರೆ ಇದು ಆರೋಗ್ಯಕರ. ಅದರ ಬದಲಿಗೆ, ಈ ಕ್ಷಣ ಒಂದು ಆಲೋಚನೆ, ಮರುಕ್ಷಣ ಹಿಂದಿನ ಆಲೋಚನೆಗೆ ಸಂಬಂಧವೇ ಇಲ್ಲದ ಇನ್ನೊಂದು ವಿಷಯದ ಆಲೋಚನೆ ಎದುರಾದರೆ ಇದು ಮರ್ಕಟ ಮನದ ಸೂಚನೆಯಾಗಿದೆ. ಈ ವ್ಯಕ್ತಿಗಳು ಅತಿ ಹೆಚ್ಚು ಮೆದುಳಿಗೆ ಕೆಲಸ ನೀಡುವ ಮೂಲಕ ವಿಪರೀತ ದಣಿಯುತ್ತಾರೆ. ಅಲ್ಲದೇ ಇವರಿಂದ ಸೂಕ್ತ ನಿರ್ಧಾರಗಳನ್ನು ಪಡೆಯಲಾಗದು. ಪರಿಣಾಮವಾಗಿ ಇವರು ಯಾವುದೇ ಸಾಧನೆಯಾಗಲೀ ಯಶಸ್ಸು ಆಗಲೀ ಕಲಿಯುವಿಕೆಯೇ ಆಗಲಿ ಏನನ್ನೂ ಮಾಡದ ಸ್ಥಿತಿಯಲ್ಲಿರುತ್ತಾರೆ.

ಮರ್ಕಟ ಮನಸ್ಸಿನ ವ್ಯಕ್ತಿಗಳು ಸದಾ ಆತಂಕದಲ್ಲಿರುತ್ತಾರೆ ಮತ್ತು ಇವರ ಮನಸ್ಸೂ ಚಂಚಲವಾಗಿರುತ್ತದೆ. ಇವರ ಮನಸ್ಸಿನಲ್ಲಿ ಬರುವ ಆಲೋಚನೆಗಳೆಲ್ಲಾ ಕೆಟ್ಟ ಸಂಗತಿಯಲ್ಲಿ ಕೊನೆಗೊಳ್ಳುವಂತಹದ್ದೇ ಆಗಿರುತ್ತವೆ. ಇಲ್ಲದ ಸಲ್ಲದುದನ್ನು ಊಹಿಸಿಕೊಂದು ಇವರು ಚಿಂತಿತರಾಗಿರುತ್ತಾರೆ. ಇದೆಲ್ಲದಕ್ಕೂ ತಾನೇ ಕಾರಣ ಎಂಬ ತಪ್ಪಿತಸ್ಥ ಭಾವನೆಯೂ ಇವರಿಗೆ ಇರುತ್ತದೆ.
ಈ ಸ್ಥಿತಿ ಅತಿ ಅಪಾಯಕಾರಿಯಾಗಿದ್ದು ದಿನೇ ದಿನೇ ಇವರ ಮನಃಸ್ಥಿತಿ ಆಧೋಗತಿಗೆ ಇಳಿಯುತ್ತಾ ಹೋಗುತ್ತದೆ ಹಾಗೂ ಇದರ ಪರಿಣಾಮವೂ ಗಾಬರಿ ಪಡಿಸುವಂತಹದ್ದೇ ಇರುತ್ತದೆ.

ಈ ಸ್ಥಿತಿಯನ್ನು ಸರಿಪಡಿಸುವುದು ಅತಿ ಅಗತ್ಯವಾಗಿದೆ. ನಿಮ್ಮ ದಿನಚರಿಯಲ್ಲಿ ಸಾಕಷ್ಟು ವಿಶ್ರಾಂತಿಯನ್ನು ಅಳವಡಿಸಿಕೊಳ್ಳಬೇಕು ಹಾಗೂ ನಿಮ್ಮ ಯೋಚನೆಗಳ ಕೊನೆಯಲ್ಲಿ ಬರುವ ಋಣಾತ್ಮಕ ಚಿಂತನೆಗಳನ್ನೆಲ್ಲಾ ಧನಾತ್ಮಕ ಪರಿಣಾಮಕ್ಕೆ ಬದಲಿಸಿಕೊಳ್ಳಬೇಕು. ದೀರ್ಘ ಉಸಿರಾಟದ ವ್ಯಾಯಾಮಗಳು, ಸರಳವಾದ ಸ್ನಾಯುಗಳನ್ನು ಸಡಿಲಿಸುವ ವ್ಯಾಯಾಮಗಳು, ತಜ್ಞರ ನಿರ್ದೇಶನದಲ್ಲಿ ನಿರ್ವಹಿಸಬಹುದಾದ ಧ್ಯಾನ ಮೊದಲಾದವು ಈ ಸ್ಥಿತಿಯಿಂದ ಹೊರತರುತ್ತವೆ ಹಾಗೂ ಶಾಂತತೆಯ ಭಾವನೆಯನ್ನು ಉತ್ತೇಜಿಸುತ್ತವೆ.

ಮರ್ಕಟ ಮನಸ್ಸಿನ ಜನರ ಮನಸ್ಸನ್ನು ಇನ್ನಷ್ಟು ವ್ಯಗ್ರಗೊಳಿಸುವ ಸಾಧನವೆಂದರೆ ಸ್ಮಾರ್ಟ್ ಫೋನ್ ಮತ್ತು ಸಾಮಾಜಿಕ ಜಾಲತಾಣಗಳು. ಪ್ರತಿ ಕ್ಷಣಕ್ಕೊಮ್ಮೆ ಬರುವ ನೋಟಿಫಿಕೇಶನ್‌ಅನ್ನು ಇವರು ಯಾವುದೋ ಆಪತ್ತಿನ ಸೂಚನೆ ಬಂದಿದೆ ಎಂಬಂತೆ ಪರಿಗಣಿಸಿ ಉದ್ವೇಗಕ್ಕೆ ಒಳಗಾಗುತ್ತಾರೆ. ಅಷ್ಟೇ ಅಲ್ಲ, ಇಂದು ಲಭಿಸುತ್ತಿರುವ ಆಗಾಧ ಮಾಹಿತಿಯಲ್ಲಿ ಯಾವುದು ತನಗೆ ತಪ್ಪಿ ಹೋಗುತ್ತದೆಯೋ ಎಂಬ ಆತಂಕ ಈ ಮನಸ್ಸನ್ನು ಇನ್ನಷ್ಟು ವ್ಯಗ್ರಗೊಳಿಸುತ್ತದೆ.

ಈ ಸ್ಥಿತಿಯಿಂದ ಹೊರಬರಲು ಸಾಕಷ್ಟು ಶಿಸ್ತಿನ ಅಗತ್ಯವಿದೆ. ಮೊದಲಾಗಿ ನಿಮ್ಮ ಕರ್ತವ್ಯ ಮತ್ತು ಕಾರ್ಯಗಳನ್ನು ಪಟ್ಟಿ ಮಾಡಿ ಇದಕ್ಕೆ ಆದ್ಯತೆಗಳನ್ನು ನೀಡಿ. ಎಲ್ಲಿಯವರೆಗೂ ಈ ಕರ್ತವ್ಯ ಮತ್ತು ಕಾರ್ಯಗಳನ್ನು ಪೂರ್ಣಗೊಳಿಸುವುದಿಲ್ಲವೋ ಅಲ್ಲಿಯವರೆಗೂ ಮೊಬೈಲ್ ನೋಡದಿರಿ. ನಿಮ್ಮ ದಿನದ ಅವಧಿಯಲ್ಲಿ ಪ್ರಮುಖ ಕಾರ್ಯಗಳಿಗೆ ಪ್ರಥಮವಾಗಿ ಆದ್ಯತೆ ನೀಡಿ ಪೂರ್ಣಗೊಳಿಸಿ. ಅಲ್ಲಿಯವರೆಗೂ ನಿಮ್ಮ ಮನಸ್ಸನ್ನು ಸೆಳೆಯುವ ಮೊಬೈಲಿನ ನೋಟಿಫಿಕೇಶ‌ನ್‌ಅನ್ನು ಸದ್ದಿಲ್ಲದಂತೆ (ಮ್ಯೂಟ್) ಮಾಡಿ.
ಇದನ್ನೂ ಓದಿ: ಮೆದುಳಿಗೆ ಹಾನಿಮಾಡುವ ನಿಮ್ಮ ಈ ಅಭ್ಯಾಸಗಳನ್ನು ಈಗ್ಲೇ ಬದಲಿಸೋದು ಒಳ್ಳೆಯದು​

ಮರ್ಕಟ ಮನದ ಜನರು ಸದಾ ದಣಿದೇ ಇರುತ್ತಾರೆ. ದಿನದ ಯಾವುದೋ ವಿಷಯದ ಬಗ್ಗೆ ಅತಿಯಾದ ಚಿಂತನೆಯಿಂದಾಗಿ ಅತಿಯಾದ ಮಾನಸಿಕ ಒತ್ತಡ ಮತ್ತು ದಣಿವು ಎದುರಾಗಬಹುದು. ಇದರಿಂದ ಪಾರಾಗಲು, ಮೊದಲಾಗಿ ನಿಮ್ಮ ಮನಸ್ಸನ್ನು ದಣಿಯದಂತೆ ಮಾಡಲು ಶಾಂತವಾಗಲು ಬಿಡಬೇಕು. ಇದಕ್ಕೆ ನೆರವಾಗುವ ಸ್ವತಃ ಮಾಡಬಹುದಾದ ಕೆಲಸಗಳನ್ನು ಮಾಡಬಹುದು. ಸಾಕಷ್ಟು ನಿದ್ದೆ, ನಿಯಮಿತ ವ್ಯಾಯಾಮ ಮಾಡುತ್ತಿರಬೇಕು ಮತ್ತು ಪೌಷ್ಟಿಕ ಆಹಾರವನ್ನೂ ಸೇವಿಸಬೇಕು. ನಿಮ್ಮ ದಿನನಿತ್ಯದ ಕೆಲಸಗಳ ಹೊರತಾಗಿ ನಿಮಗೆ ಹೊಸದಾಗಿರುವ ಯಾವುದಾದರೂ ಒಂದು ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳಬೇಕು. ಅಲ್ಲದೇ ನಿಮಗಾಗಿ ನೀವು ಸಮಯ ನೀಡಿಕೊಳ್ಳುವ ಮೂಲಕ ಮರ್ಕಟ ಮನಸ್ಸನ್ನು ಶಾಂತಗೊಳಿಸಬಹುದು.

ಮರ್ಕಟ ಮನದ ಇನ್ನೊಂದು ಲಕ್ಷಣವೆಂದರೆ ಮುಂದೂಡುವಿಕೆ. ಈ ವ್ಯಕ್ತಿಗಳು ಅತ್ಯಂತ ಕಡೆಯ ಕ್ಷಣದವರೆಗೂ ಆ ಕೆಲಸವನ್ನು ಮುಂದೂಡುತ್ತಾ ಬರುತ್ತಾರೆ. ಹೀಗೆ ಮಾಡುವುದರಿಂದ ಇದು ಮನಸ್ಸಿನ ಒತ್ತಡವನ್ನು ಹೆಚ್ಚಿಸಿ ಇನ್ನಷ್ಟು ವ್ಯಗ್ರಗೊಳಿಸುತ್ತದೆ. ಕಟ್ಟ ಕಡೆಯ ಕ್ಷಣದಲ್ಲಿ ಇದನ್ನು ಪೂರ್ಣಗೊಳಿಸಬೇಕಾದ ಧಾವಂತದಿಂದ ಮನಸ್ಸಿನ ಒತ್ತಡ ಇನ್ನಷ್ಟು ಹೆಚ್ಚುತ್ತದೆ ಹಾಗೂ ಪರೋಕ್ಷ ಪರಿಣಾಮಗಳು ಇನ್ನೂ ಹೆಚ್ಚಿನದಾಗಬಹುದು.

ಮುಂದೂಡುವಿಕೆಯ ಅಭ್ಯಾಸ ನಿಮಗಿದ್ದರೆ ಇದನ್ನು ಸರಿಪಡಿಸಲು ಕೆಲವು ಕ್ರಮಗಳನ್ನು ಅನುಸರಿಸಬೇಕಾಗುತ್ತದೆ. ನಿಮ್ಮ ಕಾರ್ಯಗಳನ್ನು ಅತಿ ಮುಖ್ಯ, ಮುಖ್ಯ ಮತ್ತು ಸಾಮಾನ್ಯ ಎಂದು ವರ್ಗೀಕರಿಸಿ ಆದ್ಯತೆಯ ಪ್ರಕಾರ ಮುಗಿಸಿಕೊಳ್ಳುತ್ತಾ ಬರಬೇಕು. ಒಂದು ಸಮಯದಲ್ಲಿ ಒಂದೇ ಕೆಲಸ ಮಾಡಬೇಕು. ಪ್ರತಿ ಕೆಲಸವನ್ನೂ ಅದಕ್ಕೆ ತಗಲುವ ಸಮಯವನ್ನು ಆಧರಿಸಿ ಗುರಿಗಳನ್ನು ಹಮ್ಮಿಕೊಳ್ಳಬೇಕು ಹಾಗೂ ನೀವು ಮಾಡುವ ಕಾರ್ಯಗಳು ಈ ಸಮಯದ ಒಳಗೇ ಮುಗಿಯುವಂತೆ ನಿರ್ವಹಿಸಬೇಕು. ತನ್ಮೂಲಕ ನಿಮಗೆ ನೀವೇ ಒಂದು ಕಟ್ಟುಪಾಡನ್ನು ವಿಧಿಸಿಕೊಂಡು ಕಾರ್ಯ ನಿರ್ವಹಿಸುವ ಮೂಲಕ ಅಷ್ಟೂ ಹೊತ್ತು ಬೇರೆ ಆಲೋಚನೆಗಳು ಮನಕ್ಕೆ ಬಾರದಂತೆ ನೋಡಿಕೊಳ್ಳಬೇಕು.
ಇದನ್ನೂ ಓದಿ: ಪಾರ್ಶ್ವವಾಯು ಸಂಭವಿಸುವ ಮುನ್ನ ಈ ಕೆಲವು ಲಕ್ಷಣಗಳು ಗೋಚರಿಸುತ್ತವಂತೆ

ಈ ವ್ಯಕ್ತಿಗಳ ಮನಸ್ಸು ಹಿಂದಿನ ವಿಷಯಗಳ ಮತ್ತು ಆಗಿ ಹೋಗಿದ್ದ ಸಂಗತಿಗಳನ್ನೇ ಮೆಲುಕು ಹಾಕುತ್ತಿರುತ್ತದೆ. ಇವರಿಗೆ ಭವಿಷ್ಯದ ದೂರದೃಷ್ಟಿಯ ಕೊರತೆ ಇರುತ್ತದೆ ಹಾಗೂ ಇಂದಿನ ದಿನದಲ್ಲಿ ಮುಂದಿನ ದಿನಕ್ಕಾಗಿ ಏನನ್ನು ಮಾಡಬೇಕೋ ಅದನ್ನು ಮಾಡದೇ ಹೋಗುತ್ತದೆ. ಉದಾಹರಣೆಗೆ ನಿಮ್ಮ ಗ್ರಾಹಕ ಒಬ್ಬರನ್ನು ಭೇಟಿಯಾಗಬೇಕಿದ್ದು ನಿಮ್ಮ ಮನ ಇದು ಸಾಧ್ಯವಾಗದಂತಹ ಯೋಚನೆಗಳನ್ನುಯೋಚಿಸುತ್ತದೆ.

ಇದರಿಂದ ಹೊರಬರಲು, ಮೊದಲಾಗಿ ಸರಳವಾದ ಮತ್ತು ಸುಲಭದ ಕೆಲಸಗಳನ್ನು ಮಾಡಿ ಮುಗಿಸಿ. ಬಳಿಕವೇ ಇತರ ಕಾರ್ಯಗಳನ್ನು ನಿರ್ವಹಿಸಿ. ಆದಷ್ಟೂ ಮಟ್ಟಿಗೆ ಧ್ಯಾನವನ್ನು ಅನುಸರಿಸಿ. ಮನಸ್ಸು ಬೇರೆಡೆಗೆ ಹೊರಳದೇ ಇರಲು, ನೀವು ಈಗ ಯಾವ ವಿಷಯದ ಮೇಲೆ ಗಮನ ಹರಿಸಬೇಕಿತ್ತೋ, ಅದೇ ವಿಷಯದ ಬಗ್ಗೆ ಸತತವಾಗಿ ಮೆಲುಕು ಹಾಕುವಂತೆ ಮಾಡಬೇಕು. ನೀವು ಹಾಗೆ ಮಾಡುವಾಗ, ಒಂದೇ ವಿಷಯದ ಬಗ್ಗೆ ಯೋಚಿಸಿ ಮತ್ತು ಅದನ್ನು ನಿಮ್ಮ ಮನಸ್ಸಿನಲ್ಲಿ ಸಾಧ್ಯವಾದಷ್ಟು ಪುನರಾವರ್ತಿಸಿ. ನಿಮ್ಮ ಉಸಿರಾಟ, ಸಂವೇದನೆಗಳು, ದೃಶ್ಯಗಳು ಮತ್ತು ಸುತ್ತ ಮುತ್ತಲಿಂದ ಬರುತ್ತಿರುವ ಶಬ್ದಗಳ ಬಗ್ಗೆ ಗಮನ ಹರಿಸಲು ಮರೆಯದಿರಿ.

ನಿದ್ರೆಯ ಕೊರತೆಗೆ ಹಲವು ಗಂಭೀರ ಅನಾರೋಗ್ಯಗಳೂ ಕಾರಣವಾಗಬಹುದು. ಹಲವಾರು ಆಲೋಚನೆಗಳು ಮತ್ತು ಚಿಂತನೆಗಳು ಮನಸ್ಸಿನಲ್ಲಿ ಬರುತ್ತಾ ಇರುತ್ತವೆ ಹಾಗೂ ಒಂದು ವಿಷಯದಿಂದ ಇನ್ನೊಂದು ವಿಷಯಕ್ಕೆ ಜಿಗಿಯಲು ಬಯಸುವ ಚಡಪಡಿಕೆಯ ಮನಸ್ಸು ನಿಮ್ಮ ನಿದ್ರೆಯನ್ನು ಭಂಗಗೊಳಿಸಬಹುದು. ರಾತ್ರಿಯಿಡೀ ಮಲಗಲು ಮತ್ತು ವಿಶ್ರಾಂತಿ ಪಡೆಯುವುದು ಕಷ್ಟವಾಗುತ್ತದೆ. ಇದು ಸುಖನಿದ್ರೆ ಮತ್ತು ವಿಶ್ರಾಂತಿಯ ಕೊರತೆಗೆ ಕಾರಣವಾಗುವುದಲ್ಲದೆ, ಮರುದಿನ ಮಾನಸಿಕ ಕಿರಿರಿ ಮತ್ತು ಆಯಾಸಕ್ಕೂ ಕಾರಣವಾಗುತ್ತದೆ, ಇದು ನಿಮ್ಮ ವೈಯಕ್ತಿಕ ಮತ್ತು ವೃತ್ತಿಪರ ಜೀವನದ ಮೇಲೆ ಪರಿಣಾಮ ಬೀರುತ್ತದೆ.

ಆದ್ದರಿಂದ, ಈ ರೀತಿಯ ಸಮಯದಲ್ಲಿ ಮರ್ಕಟ ಮನವನ್ನು ಸಂತೈಸಲು, ನಿಮಗೆ ಸೂಕ್ತವಾದ ದಿನಚರಿ ಒಂದನ್ನು ನೀವೇ ರೂಪಿಸಿಕೊಳ್ಳಬೇಕು. ಮಲಗುವ ಕೋಣೆಯ ಬೆಳಕು ಅತಿ ಕಡಿಮೆ ಇರಲಿ. ಮನಸ್ಸನ್ನು ಮುದಗೊಳಿಸಲು ನೆರವಾಗುವ ಸಂಗೀತವನ್ನು ಆಲಿಸಿ. ಮಲಗುವ ಮುನ್ನ ನಿದ್ದೆ ಕೆಡಿಸುವ ಕೆಫೀನ್‌ಅನ್ನು ಸೇವಿಸದಿರಿ ಅಥವಾ ಟೀವಿ ರೇಡಿಯೋ ಮೊದಲಾದ ಮಾಧ್ಯಮಗಳನ್ನು ನೋಡದಿರಿ / ಕೇಳದಿರಿ.