- ಕಣಿತಹಳ್ಳಿ ಎನ್‌.ಚಂದ್ರೇಗೌಡ
ಪೆಬ್ರಿನ್‌ ಪೆಡಂಭೂತ:
ರಾಜ್ಯದಲ್ಲಿರಾಮನಗರ, ಚಿಕ್ಕಬಳ್ಳಾಪುರ, ಕೋಲಾರ, ಜಿಲ್ಲೆಗಳಲ್ಲಿ ಅತಿಹೆಚ್ಚು ರೇಷ್ಮೆ ಬೆಳೆಯಲಾಗುತ್ತಿದೆ. ಕೊರೊನಾ ಕಾಲದಲ್ಲಿರೇಷ್ಮೆಗೂಡಿನ ದರದಲ್ಲಿ ಭಾರೀ ಏರಿಕೆಯಾಗಿತ್ತು. ಸಾಕಷ್ಟು ರೈತರು ರೇಷ್ಮೆ ಕೃಷಿ ಕಡೆಗೆ ವಾಲಿದ್ದರು. ಆದರೆ, ಈಗ ಬೆಲೆ ಕುಸಿತ ಹಾಗೂ ಪೆಬ್ರಿನ್‌ ಹೊಡೆತಕ್ಕೆ ರೇಷ್ಮೆಕೃಷಿಗೆ ವಿದಾಯ ಹೇಳುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಪ್ರತಿ ಕೆ.ಜಿ. ರೇಷ್ಮೆಗೂಡು 1000 ರೂ.ವರೆಗೂ ಮಾರಾಟವಾಗಿತ್ತು. ಆದರೆ, ಈಗ ಪ್ರತಿ ಕೆ.ಜಿ. ಗೂಡಿನ ಬೆಲೆ ಕೇವಲ 300ರೂ.ಗೆ ಕುಸಿದಿದ್ದು ರೈತರು ನಷ್ಟ ಅನುಭವಿಸುತ್ತಿದ್ದಾರೆ. ತೀವ್ರ ಬರ ಹಿನ್ನೆಲೆ ಹಿಪ್ಪುನೇರಳೆ ಸೊಪ್ಪಿನ ಕೊರತೆಯಿಂದ ಬೆಲೆ ಏರಿಕೆಯಾಗಿದೆ. ಹೀಗಾಗಿ ರೇಷ್ಮೆಗೂಡಿನ ಬೆಲೆಗಿಂತ ಉತ್ಪಾದನಾ ವೆಚ್ಚವೇ ಹೆಚ್ಚಾಗಿದೆ.ರೇಷ್ಮೆಕೃಷಿಗೆ ಗಂಡಾಂತರ
ರೇಷ್ಮೆ ಬಿತ್ತನೆ ಮೊಟ್ಟೆಗಳಿಗೆ ತೀವ್ರವಾಗಿ ಹರಡುತ್ತಿರುವ ಗಂಟುರೋಗದ ಸೋಂಕು ಮತ್ತೆ ಉಲ್ಬಣಗೊಂಡಿದೆ. ತಕ್ಷಣವೇ ನಿಯಂತ್ರಿಸದಿದ್ದರೆ ವರ್ಷದೊಳಗೆ ರೇಷ್ಮೆ ಉದ್ಯಮ ಪೂರ್ತಿ ನಶಿಸಿ ಹೋಗುವ ಸಾಧ್ಯತೆಯಿದೆ. ರೋಗವು ತೀವ್ರಗೊಂಡರೆ ರೇಷ್ಮೆ ಬೆಳೆಗಾರರು ಬೀದಿ ಪಾಲಾಗಲಿದ್ದಾರೆ. ವರ್ಷದ ಆರಂಭದಲ್ಲಿ ತಾಯಿ ಚಿಟ್ಟೆಯಿಂದ ಬರುವ ಈ ಗಂಟುರೋಗವನ್ನು ನಿಯಂತ್ರಿಸದೇ ಹೋದರೆ ಉಲ್ಬಣವಾಗಲಿದೆ.ಬಿತ್ತನೆ ಪ್ರದೇಶಗಳಲ್ಲಿ ಚಿಟ್ಟೆ ಪರೀಕ್ಷೆ, ಸೋಂಕು ನಿವಾರಣೆ, ಬಿತ್ತನೆ ಮಾರುಕಟ್ಟೆಯಲ್ಲಿ ನೂಲು ಬಿಚ್ಚಾಣಿಕೆಗೆ ಹೋಗುವ ಗೂಡಿಗೆ ಹಬೆ ನೀಡುವ ಕ್ರಮಗಳನ್ನು ಕೈಗೊಳ್ಳಬೇಕು. ಆದರೆ, ರೇಷ್ಮೆ ಇಲಾಖೆಯಲ್ಲಿನ ಸಿಬ್ಬಂದಿ ಕೊರತೆಯಿಂದ ಸರಿಯಾಗಿ ನಿರ್ವಹಣೆ ಮಾಡಲಾಗುತ್ತಿಲ್ಲ. ಹೀಗಾಗಿ ಮತ್ತೆ ಪೆಬ್ರಿನ್‌ ಉಲ್ಬಣಗೊಂಡಿದೆ.
ಎಚ್ಚೆತ್ತುಕೊಳ್ಳದಿದ್ದರೆ ಸಂಕಷ್ಟ:
ಸೋಂಕಿತ ರೇಷ್ಮೆ ಮೊಟ್ಟೆ ಹಾಗೂ ಹುಳುಗಳನ್ನು ಸುಟ್ಟು ಹಾಕಬೇಕು. ವಿಜ್ಞಾನಿಗಳು ಹಾಗೂ ತಜ್ಞ ಸಿಬ್ಬಂದಿಯನ್ನು ಈ ಕೂಡಲೇ ಗಂಟುರೋಗ ಸೋಂಕಿತ ಪ್ರದೇಶಗಳಿಗೆ ನಿಯೋಜಿಸಿ, ಗುಣಮಟ್ಟ ಪರೀಕ್ಷೆ ಮಾಡಿಸಿ ಪೆಬ್ರಿನ್‌ ರೋಗವನ್ನು ನಿಯಂತ್ರಣಕ್ಕೆ ತರಬೇಕು. ಈ ಪೆಬ್ರಿನ್‌ ರೋಗಾಣು ಸೋಂಕಿತ ಸಂತತಿಯನ್ನು ಸಂಪೂರ್ಣ ನಾಶಪಡಿಸಬೇಕು. ರೈತರ ರೇಷ್ಮೆ ಹುಳು ಸಾಕಣೆ ಮನೆಗಳಲ್ಲಿ ಸೋಂಕು ನಿವಾರಣೆ ಮಾಡಬೇಕು. ಇಲ್ಲವಾದಲ್ಲಿ ಸೋಂಕು ಉಲ್ಬಣಗೊಂಡು ಇಡೀ ರೇಷ್ಮೆ ಬೆಳೆಯೇ ಅವಸಾನಗೊಳ್ಳಲಿದೆ.ಪೆಬ್ರಿನ್‌ ಕಂಟಕ:
ಪೆಬ್ರಿನ್‌ಪೂರಿತ ರೇಷ್ಮೆ ಗೂಡಿನಿಂದ ಶುರುವಾಗುವ ಪ್ರಕ್ರಿಯೆ ಇಡೀ ರೇಷ್ಮೆ ಬೆಳೆಯನ್ನು ಆಹುತಿ ತೆಗೆದುಕೊಳ್ಳುತ್ತದೆ. ರೇಷ್ಮೆ ಕೃಷಿಯ 3ನೇ ಹಂತದಲ್ಲಿ ಹುಳಗಳು ಸರಿಯಾಗಿ ಬೆಳವಣಿಗೆ ಹೊಂದುವುದಿಲ್ಲ. ಆಗಲೇ ಎಚ್ಚೆತ್ತುಕೊಂಡು ನಾಶಪಡಿಸಿದರೆ ಹೆಚ್ಚಿನ ನಷ್ಟದಿಂದ ಪಾರಾಗಬಹುದು. ಇಲ್ಲವಾದಲ್ಲಿಅಸಮತೋಲನವಾಗಿ ಬೆಳೆದ ಹುಳುಗಳು ಕೊನೆಗೆ ಸರಿಯಾಗಿ ಗೂಡನ್ನು ಕಟ್ಟುವುದಿಲ್ಲ. ಇದರಿಂದ ಸಾವಿರಾರು ರೂ. ಬಂಡವಾಳ ಹಾಕುವ ರೈತರಿಗೆ ಬಂಡವಾಳವೂ ವಾಪಸ್‌ ಆಗದೇ ನಷ್ಟವಾಗಲಿದೆ.ರೇಷ್ಮೆ ಇಲಾಖೆ ಅಸಹಾಯಕತೆ:
ರೇಷ್ಮೆ ಇಲಾಖೆಗೂ ವಿಲೀನ ಭೀತಿ ಎದುರಾದಾಗಿನಿಂದ ಸಿಬ್ಬಂದಿ ನೇಮಕವಾಗಿಲ್ಲ. ಇರುವ ಸಿಬ್ಬಂದಿ ಸದ್ಯದ ರೇಷ್ಮೆ ಕೃಷಿಯನ್ನು ನಿಭಾಯಿಸಲು ಸಾಧ್ಯವಾಗುತ್ತಿಲ್ಲ. ಹಿಂದೆಲ್ಲಾರೇಷ್ಮೆ ಕೃಷಿಕರಿಗೆ ಇಲಾಖೆ ವತಿಯಿಂದ ಉಚಿತವಾಗಿ ಸೋಂಕು ನಿವಾರಕಗಳು ಸೇರಿದಂತೆ ರೇಷ್ಮೆ ಕೃಷಿಗೆ ಅವಶ್ಯವಿರುವ ಸಾಮಗ್ರಿಗಳನ್ನು ಉಚಿತವಾಗಿ ವಿತರಿಸಲಾಗುತ್ತಿತ್ತು. ಆದರೆ, ವ್ಯವಸ್ಥೆ ನಿಂತು ವರ್ಷಗಳೇ ಕಳೆದಿವೆ.ಇನ್ನು ಆಗಾಗ್ಗೆ ಮೊಟ್ಟೆ ಬಿತ್ತನೆ ಕೋಠಿ ಮತ್ತು ಚಾಕಿ ಸಾಕಣೆ ಕೇಂದ್ರಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಬೇಕಾಗಿತ್ತು. ಆದರೆ, ಸಿಬ್ಬಂದಿ ಕೊರತೆಯಿಂದ ಇದು ಸರಿಯಾಗಿ ನಡೆಯುತ್ತಿಲ್ಲ. ಇನ್ನು ಬಿತ್ತನೆ ವಲಯದಲ್ಲೂ ಕಟ್ಟೆಚ್ಚರ ವಹಿಸಬೇಕಿತ್ತು. ಅಲ್ಲಿಯೂ ಸಿಬ್ಬಂದಿ ಕೊರತೆಯಿಂದ ಪರಿಶೀಲನೆ ನಡೆಯದೇ ಈ ಅವಾಂತರ ಸಂಭವಿಸಿದೆ ಎಂದು ರೇಷ್ಮೆ ಮೊಟ್ಟೆ ತಯಾರಕರು ಆರೋಪಿಸುತ್ತಾರೆ.
ಎರಡು ವರ್ಷಗಳ ಹಿಂದೆ ಪೆಬ್ರಿನ್‌ ಕಾಣಿಸಿಕೊಂಡಿತ್ತು. ಆಗ ಬಿತ್ತನೆ ಏರಿಯಾದಲ್ಲಿಸುರಕ್ಷತಾ ಕ್ರಮಗಳನ್ನು ಕೈಗೊಂಡಿದ್ದರಿಂದ ನಿಯಂತ್ರಣಕ್ಕೆ ಬಂದಿತ್ತು. ಈಗ ಮತ್ತೆ ಪೆಬ್ರಿನ್‌ ರೋಗ ಆವರಿಸಿದ್ದು, ಸರಿಯಾಗಿ ಬೆಳೆಗಳು ಆಗುತ್ತಿಲ್ಲ. ಇದರಿಂದ ರೇಷ್ಮೆ ಬೆಳೆಗಾರರಿಗೆ ಸಾಕಷ್ಟು ನಷ್ಟವಾಗುತ್ತಿದೆ. ರೇಷ್ಮೆಗೂಡಿನ ಬೆಲೆ ಕೂಡಾ ಕುಸಿದಿರುವುದರಿಂದ ರೇಷ್ಮೆ ಕೃಷಿಗೆ ಭಾರೀ ಸಮಸ್ಯೆ ಎದುರಾಗಿದೆ. ಸರಕಾರ ಮಧ್ಯಪ್ರವೇಶಿಸಿ ಇದನ್ನು ತಡೆಯದಿದ್ದರೆ ರೇಷ್ಮೆ ಉದ್ಯಮವೇ ಹಾಳಾಗಲಿದೆ.
- ಕೃಷ್ಣಮೂರ್ತಿ, ರೇಷ್ಮೆ ಮೊಟ್ಟೆ ಉತ್ಪಾದಕರು
ಮಾರುಕಟ್ಟೆಯಲ್ಲಿರೇಷ್ಮೆಗೂಡಿಗೆ ಬೆಲೆಯೇ ಇಲ್ಲ. ಇನ್ನೊಂದೆಡೆ ಪೆಬ್ರಿನ್‌ ರೋಗದಿಂದ ಸರಿಯಾದ ಇಳುವರಿಯೂ ಬರುತ್ತಿಲ್ಲ. ಹೀಗಾಗಿ ರೇಷ್ಮೆಕೃಷಿ ಈಗ ಅವಸಾನದತ್ತ ಹೋಗುತ್ತಿದೆ. ರೈತರು ಸಾಲ ಮಾಡಿ ಬಂಡವಾಳ ಹಾಕಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ರೇಷ್ಮೆ ಇಲಾಖೆ ಸಿಬ್ಬಂದಿ ಕೊರತೆ ಹಾಗೂ ಅನುದಾನ ಕೊರತೆ ಎಂದು ಹೇಳಿಕೊಂಡು ಅಸಹಾಯಕವಾಗಿ ಕೂತಿದೆ. ಹೀಗಾಗಿ ಸರಕಾರವೇ ರೇಷ್ಮೆ ಬೆಳೆಗಾರರನ್ನು ರಕ್ಷಿಸಬೇಕಿದೆ.
- ಮಂಜುನಾಥ್‌, ರೇಷ್ಮೆ ಚಾಕಿ ಸಾಕಣೆದಾರರು