![ಸಾಂದರ್ಭಿಕ ಚಿತ್ರ ಸಾಂದರ್ಭಿಕ ಚಿತ್ರ](https://vijaykarnataka.com/thumb/76314032/76314032.jpg?imgsize=91456&width=380&height=214&resizemode=75)
ಬೆಂಗಳೂರು: ಕಾಮಾಕ್ಷಿಪಾಳ್ಯದ ರಂಗನಾಥಪುರದಲ್ಲಿ ವೃದ್ಧ ದಂಪತಿಯನ್ನು ಮನೆಯಲ್ಲಿ ಉಸಿರುಗಟ್ಟಿಸಿ ಕೊಲೆ ಮಾಡಲಾಗಿದೆ.
ನರಸಿಂಹರಾಜು (70) ಮತ್ತು ಅವರ ಪತ್ನಿ ಸರಸ್ವತಿ (64) ಕೊಲೆಯಾದವರು. ಘಟನೆ ನಂತರ ಇವರ ಪುತ್ರ ಸಂತೋಷ್ (34) ಎಂಬಾತ ಮೊಬೈಲ್ ಫೋನ್ ಸ್ವಿಚ್ ಆಫ್ ಮಾಡಿಕೊಂಡು ಕಾಣೆಯಾಗಿದ್ದಾನೆ.
ಮದುವೆ ಬ್ರೋಕರ್ಆಗಿ ಕೆಲಸ ಮಾಡುತ್ತಿದ್ದ ನರಸಿಂಹರಾಜು, 20 ವರ್ಷಗಳಿಂದ ಯಾವುದೇ ಕೆಲಸ ಮಾಡದೆ ಮನೆಯಲ್ಲಿ ಇರುತ್ತಿದ್ದರು. ಶಿಕ್ಷಕಿಯಾಗಿದ್ದ ಸರಸ್ವತಿ ಅವರು ಕೆಲ ವರ್ಷಗಳ ಹಿಂದೆ ನಿವೃತ್ತರಾಗಿದ್ದರು. ಆಡಿಟರ್ ವೃತ್ತಿ ಮಾಡುತ್ತಿದ್ದ ಪುತ್ರ ಸಂತೋಷ್ಗೆ ವಿವಾಹವಾಗಿದೆ. ಪತ್ನಿ ಗರ್ಭಿಣಿಯಾಗಿದ್ದು, ಕೆಲ ವಾರಗಳ ಹಿಂದೆ ತವರಿಗೆ ಹೋಗಿದ್ದಾರೆ.
ಕಾಮಾಕ್ಷಿಪಾಳ್ಯದಲ್ಲಿ ಕಚೇರಿ ಹೊಂದಿದ್ದ ಸಂತೋಷ್, ಪತ್ನಿ ಮತ್ತು ಪಾಲಕರ ಜೊತೆ ಬಾಡಿಗೆ ಮನೆಯಲ್ಲಿ ವಾಸವಿದ್ದ. ಮನೆ ಕೆಲಸಕ್ಕೆ ಶಾಂತಮ್ಮ ಎಂಬುವರು ಬರುತ್ತಿದ್ದರು. ಬುಧವಾರ ಬೆಳಗ್ಗೆ ಎಂದಿನಂತೆ ಶಾಂತಮ್ಮ ಕೆಲಸಕ್ಕೆ ಬಂದಿದ್ದಾರೆ. ಆದರೆ, ಮನೆ ಬಾಗಿಲು ತೆಗೆದಿತ್ತು. ಒಳಗೆ ಪ್ರವೇಶಿಸಿದಾಗ ಹಾಲ್ನಲ್ಲಿ ನರಸಿಂಹರಾಜು, ಮಲಗುವ ಕೊಠಡಿಯಲ್ಲಿ ಸರಸ್ವತಿ ಬಿದ್ದಿದ್ದರು. ಗಾಬರಿಗೊಂಡ ಶಾಂತಮ್ಮ ಸ್ಥಳೀಯರಿಗೆ ತಿಳಿಸಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಧಾವಿಸಿದ ಕಾಮಾಕ್ಷಿಪಾಳ್ಯ ಠಾಣೆ ಪೊಲೀಸರು, ಬೆರಳಚ್ಚು ಮತ್ತು ಶ್ವಾನ ದಳ ಸಿಬ್ಬಂದಿ ಮಾಹಿತಿ ಸಂಗ್ರಹಿಸಿದ್ದಾರೆ.
'ದಂಪತಿಯನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿರುವಂತಿದೆ. ಮೈ ಮೇಲೆ ಯಾವುದೇ ಗಾಯಗಳು ಇಲ್ಲ. ಅವರ ಮಗ ಸಂತೋಷ ಕಾಣೆಯಾಗಿದ್ದಾನೆ. ಅಪರಿಚಿತರಿಂದ ಕೊಲೆ ಎಂದು ಕೇಸ್ ದಾಖಲಿಸಿಕೊಂಡು ಆರೋಪಿಗಳ ಬಂಧನಕ್ಕೆ ಬಲೆ ಬೀಸಲಾಗಿದೆ'' ಎಂದು ಪೊಲೀಸ್ ಅಧಿಕಾರಿ ತಿಳಿಸಿದರು.
ಮಗನ ಬಗ್ಗೆ ಅಸಮಾಧಾನ ತೋಡಿಕೊಂಡಿದ್ದ ದಂಪತಿ
ಕೆಲ ತಿಂಗಳ ಹಿಂದೆ ಸಂತೋಷ್ ಬಗ್ಗೆ ವೃದ್ಧ ದಂಪತಿ ಸ್ಥಳೀಯರ ಬಳಿ ಅಸಮಾಧಾನ ತೋಡಿಕೊಂಡಿದ್ದರು. ಪೊಲೀಸ್ ಠಾಣೆಗೆ ದೂರು ನೀಡಲು ಯೋಜಿಸಿದ್ದರು. ಆದರೆ, ನಂತರ ಠಾಣೆಗೆ ದೂರು ನೀಡಿರಲಿಲ್ಲ. ಸರಿ ಹೋಗಬಹುದು. ನಮ್ಮ ಹಣೆ ಬರಹದಲ್ಲಿ ಬರೆದಂತೆ ಆಗುತ್ತದೆ ಎಂದು ಹೇಳಿದ್ದರು ಎಂದು ತಿಳಿದು ಬಂದಿದೆ.
ದಂಪತಿ ಕೊಲೆ ಬಳಿಕ ಮಗ ಸಂತೋಷ್ ಕಾಣೆಯಾಗಿರುವ ಕಾರಣ ಆತನ ಮೇಲೆ ಸಂಶಯ ವ್ಯಕ್ತವಾಗಿದೆ. ಕೊಲೆಯಾದ ದಂಪತಿ ಮತ್ತು ಮಗನ ನಡುವೆ ಜಗಳವಾಗಿರುವ ಕುರಿತು ಮಾಹಿತಿ ಇಲ್ಲ. ತನಿಖೆ ನಡೆಯುತ್ತಿದೆ ಎಂದು ಪೊಲೀಸರು ತಿಳಿಸಿದರು.