ಚಿನ್ನದ ವ್ಯಾಪಾರಿಗೆ ವಂಚನೆ

ವಿಕ ಸುದ್ದಿಲೋಕ ಬೆಂಗಳೂರು

ಆಭರಣ ಚಿನ್ನ ಕೊಡುವುದಾಗಿ ಹೇಳಿ ಪರಿಚಿತ ಚಿನ್ನದ ವ್ಯಾಪಾರಿಯಿಂದ 1 ಕೆ.ಜಿ 400 ಗ್ರಾಂ ಅಪರಂಜಿ ಚಿನ್ನ ಪಡೆದ ವ್ಯಕ್ತಿಯೊಬ್ಬರು ವಂಚಿಸಿರುವ ಘಟನೆ ನಗರತ್‌ಪೇಟೆಯಲ್ಲಿ ನಡೆದಿದೆ.

ಕಿಲಾರಿ ರಸ್ತೆ ಆಭರಣ ವ್ಯಾಪಾರಿ ಬಾಪು ಬಾಲು ಸಾವಂತ್‌(34) ವಂಚನೆಗೆ ಒಳಗಾದವರು.

ಚಿಕ್ಕಲಸಂದ್ರದ ಉತ್ತರಹಳ್ಳಿ ರಸ್ತೆಯ ನಿವಾಸಿ ದಲ್ಪತ್‌ ರಾಜ್‌(60) ಎಂಬುವವರು ವಂಚನೆ ಮಾಡಿದ್ದಾರೆಂದು ಆರೋಪಿಸಿ ಹಲಸೂರು ಗೇಟ್‌ ಪೊಲೀಸ್‌ ಠಾಣೆಗೆ ಬಾಲು ಸಾವಂತ್‌ ದೂರು ನೀಡಿದ್ದಾರೆ.

ಏ.12ರಂದು ಅಂಗಡಿ ಬಳಿಗೆ ಬಂದಿದ್ದ ದಲ್ಪತ್‌, ತುರ್ತಾಗಿ 300 ಗ್ರಾಂ ಅಪರಂಜಿ ಚಿನ್ನ ಕೊಡಿ. ಅದರ ಬದಲಿಗೆ ರಾತ್ರಿಯೇ ಆಭರಣ ಚಿನ್ನ ಕೊಡುವುದಾಗಿ ಹೇಳಿ ಪಡೆದುಕೊಂಡು ಹೋಗಿದ್ದ. ಏ.13ರಂದು ಮತ್ತೆ ಅಂಗಡಿ ಬಳಿಗೆ ಬಂದು 1 ಕೆಜಿ 100 ಗ್ರಾಂ ಚಿನ್ನ ಪಡೆದು ರಾತ್ರಿ ವೇಳೆಗೆ ವಾಪಸ್‌ ತಂದು ಕೊಡುವುದಾಗಿ ಹೇಳಿ ಹೋಗಿದ್ದಾನೆ. ಆದರೆ, ರಾತ್ರಿ 10 ಗಂಟೆಯಾದರೂ ಚಿನ್ನ ಮರಳಿಸಿಲ್ಲ. ಕರೆ ಮಾಡಿದಾಗ ಮೊಬೈಲ್‌ ಫೋನ್‌ ಸ್ವಿಚ್ಡ್‌ ಆಫ್‌ ಮಾಡಿಕೊಂಡಿದ್ದಾನೆ. ಆಭರಣ ಪಡೆದು ವಂಚಿಸಿರುವ ಆರೋಪಿಯನ್ನು ಪತ್ತೆ ಮಾಡಿ ಕಾನೂನು ಕ್ರಮ ತೆಗೆದುಕೊಳ್ಳುವಂತೆ ದೂರಿನಲ್ಲಿ ಬಾಲು ಸಾವಂತ್‌ ಕೋರಿದ್ದಾರೆ.

ಬಾಲು ಸಾವಂತ್‌ ಯಾವ ಕಾರಣಕ್ಕೆ ಇಷ್ಟೊಂದು ಚಿನ್ನವನ್ನು ಕೊಟ್ಟಿದ್ದಾರೆ ಎಂಬುದು ಆರೋಪಿಯ ಬಂಧನದ ಬಳಿಕ ತಿಳಿದು ಬರಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಹಲಸೂರು ಗೇಟ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.