ದಾವಣಗೆರೆಯಲ್ಲಿ ಭತ್ತದ ಗದ್ದೆಗೆ ಸಿಂಪಡಿಸಿದ ಕಳೆನಾಶಕದಿಂದ 330 ಅಡಕೆ ಮರಗಳು ನಾಶ

ಬಸವಾಪಟ್ಟಣ (ದಾವಣಗೆರೆ): ಭತ್ತದ ಗದ್ದೆಯ ಹುಲ್ಲಿನ ಹತೋಟಿಗೆ ಸಿಂಪಡಿಸಿದ ಕಳೆ ನಾಶಕದ ಪರಿಣಾಮ ಗದ್ದೆಯ ಪಕ್ಕದ ಸುಮಾರು 330 ಅಡಕೆ ಗಿಡಗಳು ಸುಟ್ಟು ನಾಶವಾಗಿರುವ ಘಟನೆ ಚನ್ನಗಿರಿ ತಾಲೂಕು ಕಣಿವೆಬಿಳಚಿ ಗ್ರಾಮದಲ್ಲಿ ನಡೆದಿದೆ.ನಾಶವಾಗಿರುವ ಫಸಲು ಬಿಡುವ 12 ವರ್ಷದ ಅಡಕೆ ಗಿಡಗಳು, ಕಣಿವೆಬಿಳಚಿ ಗ್ರಾಮದ ರೈತರಾದ ಆಂಜನಾಬೋವಿ ಮತ್ತು ಹನುಮಂತಪ್ಪ ಎಂಬುವರಿಗೆ ಸೇರಿದ್ದಾಗಿದೆ. ಗದ್ದೆಯ ಪಕ್ಕದಲ್ಲಿರುವ ಅಡಕೆ ಗಿಡಗಳಿಗೆ ಬೇರುಗಳ ಮೂಲಕ ಕಳೆನಾಶಕ ಔಷ ತಗುಲಿ, ಮರಗಳು ಸುಟ್ಟಿವೆ.
ಕೃಷಿಭೂಮಿಗೆ ಕೀಟನಾಶಕಕ್ಕಿಂತ ಕಳೆನಾಶಕವೇ ಹೆಚ್ಚು ಅಪಾಯಕಾರಿ: ಜಿಕೆವಿಕೆ ಎಚ್ಚರಿಕೆ!

ರೈತನಿಂದ ಪೊಲೀಸರಿಗೆ ದೂರು

''ಪಕ್ಕದ ಜಮೀನಿನವರು ಭತ್ತದ ನಾಟಿ ಮಾಡಿ ಕೀಟನಾಶಕವನ್ನು ಭತ್ತದ ಗದ್ದೆಗೆ ಹಾಕಿದ್ದು, ಗದ್ದೆಯ ಪಕ್ಕದ ಬದುವಿನಲ್ಲಿರುವ ಆಂಜನಾಬೋವಿ ಅವರಿಗೆ ಸೇರಿದ 230 ಮತ್ತು ಹನುಮಂತಪ್ಪಗೆ ಸೇರಿದ 100 ಮರಗಳು ಸುಳಿ ಒಣಗಿ ಗಿಡಗಳು ಸಂಪೂರ್ಣ ನಾಶವಾಗಿವೆ. ಜಮೀನಿಗೆ ಕಳೆನಾಶಕ ಸಿಂಪಡಿಸಿದ ವ್ಯಕ್ತಿ ಮತ್ತು ಔಷಧ ಕಂಪನಿ ಮಾಲೀಕ, ಔಷಧಿ ಮಾರಾಟಗಾರನ ವಿರುದ್ಧ ಶುಕ್ರವಾರ ಬಸವಾಪಟ್ಟಣ ಪೊಲೀಸ್‌ ಠಾಣೆಯಲ್ಲಿದೂರು ದಾಖಲು ಮಾಡಿದ್ದೇನೆ'' ಎಂದು ರೈತ ಆಂಜನಾಬೋವಿ 'ವಿಕ'ಗೆ ತಿಳಿಸಿದರು.

8 ತಿಂಗಳ ಹಿಂದೆ ಪಕ್ಕದ ಜಮೀನಿನವರಾದ ಚೌಡಕ್ಕ ದೊಡ್ಡವೆಂಕಟಾಬೋವಿ ಎಂಬುವರು ಭತ್ತದ ನಾಟಿ ಮಾಡಲು ಬೇರೆಯವರಿಗೆ ಜಮೀನು ಗುತ್ತಿಗೆ ನೀಡಿದ್ದು, ಗುತ್ತಿಗೆ ಪಡೆದವರು ಭತ್ತದ ಕಳೆಯನ್ನು ನಿವಾರಿಸಲು ಕಳೆನಾಶಕ ಸಿಂಪಡಿಸಿದ ಪರಿಣಾಮ ಸುಮಾರು ನಾಲ್ಕರಿಂದ ಐದು ತಿಂಗಳ ಒಳಗೆ ಮರಗಳು ಒಣಗುತ್ತಾ ನಾಶವಾಗಿವೆ ಎಂದು ರೈತ ದೂರಿನಲ್ಲಿ ತಿಳಿಸಿದ್ದಾರೆ.
ತುಮಕೂರು : ಬಿಸಿಲಲ್ಲಿಒಣಗುತ್ತಿರುವ ತೆಂಗು ಅಡಕೆ ರಕ್ಷಣೆಗೆ ಹರ ಸಾಹಸ

99 ಲಕ್ಷ ರೂ. ಪರಿಹಾರಕ್ಕೆ ಆಗ್ರಹ

ಒಂದು ಮರಕ್ಕೆ ಕನಿಷ್ಟ 2 ಕೆಜಿ ಅಡಕೆ ಬರುತ್ತಿತ್ತು. ಅದರಂತೆ 330 ಗಿಡಗಳಿಂದ ವರ್ಷಕ್ಕೆ 660 ಕೆಜಿ ಅಡಕೆ ಬರುತ್ತದೆ. ಒಂದು ಕ್ವಿಂಟಾಲ್‌ಗೆ 50 ಸಾವಿರ ರೂ. ದರವಿದೆ. ಈಗ ಮರಗಳು ಸುಟ್ಟು ಹೋಗಿರುವುದರಿಂದ ವರ್ಷಕ್ಕೆ 3.30 ಲಕ್ಷ ರೂ. ನಷ್ಟ ಆಗುತ್ತದೆ. ಅಡಕೆ ಮರಗಳು ಕನಿಷ್ಠ 30 ವರ್ಷ ಬಾಳುತ್ತವೆ. ಅದರಂತೆ 30 ವರ್ಷಕ್ಕೆ 99 ಲಕ್ಷ ರೂ. ನನಗೂ ಮತ್ತು ನನ್ನ ಅಣ್ಣನಿಗೂ ಸೇರಿ ನಷ್ಟ ಉಂಟಾಗಿರುತ್ತದೆ. ಕಂಪನಿ ಮಾಲೀಕರು, ಔಷಧ ಮಾರಾಟಗಾರ ಮತ್ತು ಜಮೀನು ಗುತ್ತಿಗೆದಾರರು ಈ ನಷ್ಟದ ಪರಿಹಾರ ನೀಡಬೇಕು ಎಂದು ರೈತರು ಠಾಣೆಗೆ ನೀಡಿರುವ ದೂರಿನಲ್ಲಿ ಒತ್ತಾಯಿಸಿದ್ದಾರೆ.