ಸಿದ್ಧಗಂಗಾ ಶ್ರೀಗಳ ಕಾರ್ಯ ಸಾರ್ವಕಾಲಿಕ ಪ್ರೇರಣೆ

ಧಾರವಾಡ : ತ್ರಿವಿಧ ದಾಸೋಹಿ ತುಮಕೂರು ಸಿದ್ಧಗಂಗಾ ಕ್ಷೇತ್ರದ ಡಾ.ಶಿವಕುಮಾರ ಶ್ರೀಗಳು ಕೈಗೊಂಡ ಕಾರ್ಯಗಳು ಸಾರ್ವಕಾಲಿಕ ಪ್ರೇರಣೆಗಳಾಗಿವೆ ಎಂದು ಮುರುಘಾಮಠದ ಪೀಠಾಧಿಪತಿ ಮಲ್ಲಿಕಾಜುನ ಶ್ರೀ ಅಭಿಪ್ರಾಯಪಟ್ಟರು.

ಇಲ್ಲಿನ ಕೆಲಗೇರಿ ರಸ್ತೆಯಲ್ಲಿನ ಬನಶಂಕರಿ ಕಲ್ಯಾಣ ಮಂಟಪದಲ್ಲಿ ಕುಸಮ ನಗರದ ನಿವಾಸಿಗಳು ಇತ್ತೀಚೆಗೆ ಹಮ್ಮಿಕೊಂಡಿದ್ದ ಸಿದ್ಧಗಂಗಾ ಶ್ರೀಗಳ ಪುಣ್ಯಸ್ಮರಣೋತ್ಸವದ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದರು.

ಪ್ರಾಧ್ಯಾಪಕ ಡಾ.ಶಂಭುಲಿಂಗಪ್ಪ ಹೆಗಡಾಳ ಮಾತನಾಡಿ, ಶಿವಕುಮಾರ ಶ್ರೀಗಳು ಭಕ್ತಿ, ಜ್ಞಾನ, ವೈರಾಗ್ಯದ ತ್ರಿವೇಣಿ ಸಂಗಮವಾಗಿದ್ದರು. ಸಾವಿರಕ್ಕೊಬ್ಬ ಸತ್ಯವಂತ, ಲಕ್ಷ ಕ್ಕೊಬ್ಬ ಭಕ್ತ, ಕೋಟಿಗೊಬ್ಬ ಶರಣ ಎಂಬಂತೆ ಸಾಮಾನ್ಯರಾಗಿ ಜನಿಸಿದ ಶ್ರೀಗಳು, ತಮ್ಮ ಶರಣ ಬದುಕಿನ ಮೂಲಕ ಚಿರಸ್ಥಾಯಿಯಾದರು. ಶಿವಕುಮಾರ ಸ್ವಾಮೀಜಿಯಂಥ ಮಹಾತ್ಮರನ್ನು ನೆನೆಯಲು ಮತ್ತು ಅನುಕರಿಸಲು ಪ್ರಯತ್ನಿಸಬೇಕು. ಆ ಮೂಲಕ ನಮ್ಮ ಬದುಕು ಹಸನು ಮಾಡಿಕೊಳ್ಳಬೇಕು ಎಂದರು.

ಡಾ.ಪಿ.ಎಸ್‌.ಹಳಿಯಾಳ ಉಪನ್ಯಾಸ ನೀಡಿದರು. ಚಂದ್ರಶೇಖರ ವೈದ್ಯಮಠ, ಡಾ.ಮಠ, ಪೂರ್ಣಾ ಪಾಟೀಲ, ಪ್ರೊ.ಬಿ.ಬಿ.ಮಾಶಾಳ, ವಿಜಯಾನಂದ ಶೆಟ್ಟಿ, ಪ್ರೊ.ವಿ.ಎಂ.ದೊಡಮನಿ, ಗಿರೀಶ ಮಂಗೋಣಿ, ಮಹಾಂತೇಶ ಸಾಲೋಟಗಿ, ದೇವರಾಜ ನಾಡಿಗ, ಮಲ್ಲಿಕಾರ್ಜುನ ಮುರಡಿ, ಬಸವರಾಜ ವೈದ್ಯಮಠ, ಕುಸಮ ನಗರ ಹಾಗೂ ಸುತ್ತಲಿನ ಬಡಾವಣೆಗಳ ನಿವಾಸಿಗಳು ಪಾಲ್ಗೊಂಡಿದ್ದರು.