ರಾಯರ ಸ್ಮರಣೆಯಿಂದ ಸಂಕಷ್ಟ ದೂರ

ಗುತ್ತಲ :ರಾಯರ ನಿತ್ಯ ಸ್ಮರಣೆಯಿಂದ ಸಕಲ ಕಷ್ಟಗಳು ಪರಿಹಾರವಾಗುತ್ತವೆ. ಅವರ ಉಪಾಸನೆ ಮಾಡುವ ಮೂಲಕ ಎಲ್ಲರೂ ರಾಯರ ಕೃಪೆಗೆ ಪಾತ್ರರಾಗಬೇಕು ಎಂದು ಮಂತ್ರಾಲಯ ಶ್ರೀರಾಘವೇಂದ್ರ ಮಠದ ಸುಬುಧೇಂದ್ರ ತೀರ್ಥ ಸ್ವಾಮಿಗಳು ಹೇಳಿದರು.
ಭಾನುವಾರ ಇಲ್ಲಿನ ಅಕ್ಷತಾ ವೃಂದಾವನವಿರುವ ರಾಯರ ಮಠಕ್ಕೆ ಭೇಟಿ ನೀಡಿ ಆಶೀರ್ವಚನ ನೀಡಿದ ಅವರು ರಾಜ್ಯದ ಬಹುತೇಕ ಊರುಗಳಲ್ಲಿ ರಾಯರ ವೃಂದಾವನಗಳಿವೆ. ಭಕ್ತರು ಅವರ ಸೇವೆಯನ್ನು ಮಾಡುತ್ತಿದ್ದು ಆ ಮೂಲಕ ಸಕಲ ಇಷ್ಟಾರ್ಥಗಳನ್ನು ಈಡೇರಿಸಿಕೊಳ್ಳ್ಳುತ್ತಿದ್ದಾರೆ. ರಾಯರು ಜಾತ್ಯತೀತವಾಗಿ ಸಕಲ ಭಕ್ತರನ್ನು ಉದ್ಧರಿಸುತ್ತಿದ್ದು ಅವರ ಸೇವೆ ಮಾಡಿದವರಿಗೆ ಸಂಕಷ್ಟ ಬರುವುದಿಲ್ಲ ಎಂದು ಸ್ವಾಮಿಗಳು ಹೇಳಿದರು.

ರಾಯರ ಮಠದ ಕಟ್ಟಡ ಹಾಗೂ ನವೀಕರಣ ಕಾಮಗಾರಿ ವೀಕ್ಷಿಸಿದ ಶ್ರೀಗಳು ಮೆಚ್ಚುಗೆ ವ್ಯಕ್ತಪಡಿಸಿದರು. ರಾಘವೇಂದ್ರ ಮುಳಗುಂದ ಅವರು ಪ್ರಗತಿಯ ಮಾಹಿತಿ ವಿವರಿಸಿದರು.

ಇದೇ ವೇಳೆ ಮಠದ ಉಸ್ತುವಾರಿ ಸಮಿತಿಯ ರಾಘವೇಂದ್ರ ಮುಳಗುಂದ, ವಿನಾಯಕ ನಾಡಗೇರ ,ಶ್ರೀಧರ ಆಚಾರ ಹುಬ್ಬಳೀಕರ, ಲಕ್ಷ್ಮಣರಾವ್‌ ಕುಲಕರ್ಣಿ, ಗಾಯತ್ರಿ ಮಹಿಳಾ ಮಂಡಳದ ಸದಸ್ಯೆಯರು ಉಪಸ್ಥಿತರಿದ್ದರು.