ಕರಾವಳಿಯಲ್ಲಿ ಗುರುವಾರ ಆರೆಂಜ್‌‌, ಶುಕ್ರವಾರ ರೆಡ್‌ ಅಲರ್ಟ್‌; ಭಾರಿ ಮಳೆ ಸಾಧ್ಯತೆ

ಬೆಂಗಳೂರು: ನೈಋುತ್ಯ ಮುಂಗಾರು ಉತ್ತರ ಹಾಗೂ ದಕ್ಷಿಣ ಒಳನಾಡಿನಲ್ಲಿ ಸಕ್ರಿಯವಾಗಿರುವ ಬೆನ್ನಲ್ಲೇ, ಕರಾವಳಿ ಜಿಲ್ಲೆಗಳಲ್ಲಿ ಗುರುವಾರ ಆರೆಂಜ್‌ ಅಲರ್ಟ್‌ ಹಾಗೂ ಶುಕ್ರವಾರ ರೆಡ್‌ ಅಲರ್ಟ್‌ ಘೋಷಿಸಲಾಗಿದೆ.

ರಾಜ್ಯದ ಕರಾವಳಿ ತೀರದುದ್ದಕ್ಕೂ 45-55 ಕಿ.ಮೀ. ವೇಗದಲ್ಲಿ ಗಾಳಿ ಬೀಸುತ್ತಿದ್ದು, ಬಿರುಗಾಳಿಯ ವಾತಾವರಣ ಇರಲಿದೆ. ಜೊತೆಗೆ ಮಂಗಳೂರಿನಿಂದ ಕಾರವಾರದವರೆಗೂ 2.3-2.6 ಮೀ. ಎತ್ತರದವರೆಗೆ ಅಲೆಗಳು ಏಳಲಿದ್ದು, ಮೀನುಗಾರರು ಸಮುದ್ರಕ್ಕೆ ಇಳಿಯಬಾರದು ಎಂದು ಹವಾಮಾನ ಇಲಾಖೆ ಎಚ್ಚರಿಕೆ ನೀಡಿದೆ.

ಗುರುವಾರ ಕರಾವಳಿಯ ಉತ್ತರ ಕನ್ನಡ, ದಕ್ಷಿಣ ಕನ್ನಡ, ಉಡುಪಿ ಹಾಗೂ ಮಲೆನಾಡಿನ ಜಿಲ್ಲೆಗಳಾದ ಚಿಕ್ಕಮಗಳೂರು, ಶಿವಮೊಗ್ಗ, ಕೊಡಗು, ಹಾಸನದಲ್ಲಿ ಗುಡುಗು ಸಹಿತ ಭಾರಿ ಮಳೆಯಾಗಲಿದೆ. ಬೆಂಗಳೂರು ನಗರ, ಗ್ರಾಮಾಂತರ, ರಾಮನಗರ, ಚಿಕ್ಕಬಳ್ಳಾಪುರ, ತುಮಕೂರು, ಚಿತ್ರದುರ್ಗ, ದಾವಣೆಗೆರೆ, ಮಂಡ್ಯ, ಮೈಸೂರು, ಚಾಮರಾಜನಗರ, ಬೆಳಗಾವಿ, ಬೀದರ್‌, ಧಾರವಾಡ, ಗದಗ, ಹಾವೇರಿ, ಕಲಬುರಗಿ, ರಾಯಚೂರು ಜಿಲ್ಲೆಗಳಲ್ಲಿ ಯಲ್ಲೋ ಅಲರ್ಟ್‌ ಘೋಷಿಸಲಾಗಿದೆ.

ಹೆಸರಘಟ್ಟದಲ್ಲಿ ಅತಿ ಹೆಚ್ಚು ಮಳೆ

ಬೆಂಗಳೂರಿನಲ್ಲಿ ಮಂಗಳವಾರ ರಾತ್ರಿ ಧಾರಾಕಾರ ಮಳೆ ಸುರಿದಿದ್ದು ಹೊರವಲಯದ ಹೆಸರಘಟ್ಟದಲ್ಲಿ 150 ಮಿ.ಮೀ.ನಷ್ಟು ಅತಿ ಹೆಚ್ಚು ಮಳೆ ದಾಖಲಾಗಿದೆ. ಗುಬ್ಬಿ, ಕೊರಟಗೆರೆ, ಕೆಐಎಎಲ್ ‌(ದೇವನಹಳ್ಳಿ) ತಲಾ 100, ಹೊಸದುರ್ಗ 90, ಸಂತೇಬೆನ್ನೂರು, ದಾವಣಗೆರೆ, ಬುಕ್ಕಾಪಟ್ಟಣ ತಲಾ 80, ಚಿಕ್ಕೋಡಿ, ಸೋವಾರಪೇಟೆ, ಬಂಗಾರಪೇಟೆ, ದೊಡ್ಡಬಳ್ಳಾಪುರ, ದಾವಣಗೆರೆ ತಲಾ 70, ಹೊಸಕೋಟೆ, ಹಿರಿಯೂರು ತಲಾ 60, ಭರಮಸಾಗರ, ಚಳ್ಳಕೆರೆ ತಲಾ 50, ಯಲಹಂಕ ಐಎಎಫ್‌, ರಾಮಗಿರಿ ತಲಾ 40, ಭದ್ರಾವತಿ, ಮುದಗಲ್‌, ನೆಲಮಂಗಲ, ಚನ್ನಗಿರಿ, ಪಾವಗಡದಲ್ಲಿ ತಲಾ 30 ಮಿ.ಮೀ. ಮಳೆಯಾಗಿದೆ.

ಬುಧವಾರವೂ ಬೆಂಗಳೂರಿನಲ್ಲಿ ಮಳೆಯಾಗುತ್ತಿದ್ದು, ಸಂಜೆಯಿಂದ ಒಂದೇ ಸಮನೆ ಎಡೆಬಿಡದೆ ವರ್ಷಧಾರೆ ಸುರಿಯುತ್ತಿದೆ.

ಮಳೆ ಪ್ರಮಾಣ(ಮಿ.ಮೀ.)
ಗರಿಷ್ಠ: ಹೆಸರಘಟ್ಟ - 150
ಕನಿಷ್ಠ: ಸಂಡೂರು - 10