ಪ್ರಶಸ್ತಿ ಹಿಗ್ಗಿನಿಂದ ರಾಷ್ಟ್ರಪತಿಗೆ ಆಶೀರ್ವದಿಸಿದೆ: ಸಾಲುಮರದ ತಿಮ್ಮಕ್ಕ

ಬೆಂಗಳೂರು :''ಪದ್ಮಶ್ರೀ ಪ್ರಶಸ್ತಿ ಕೊಟ್ಟಿದ್ದಕ್ಕೆ ಖುಷಿಯಾಯ್ತು. ಅದೇ ಹಿಗ್ಗಿನಲ್ಲಿ ರಾಷ್ಟ್ರಪತಿಯವರನ್ನು ಆಶೀರ್ವಾದ ಮಾಡಿದೆ ಅಷ್ಟೇ''

ಇದು ಇತ್ತೀಚಿಗೆ ಪದ್ಮಶ್ರೀ ಪ್ರಶಸ್ತಿ ಸ್ವೀಕರಿಸುವ ವೇಳೆ ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಅವರ ತಲೆ ಮುಟ್ಟಿ ಆಶೀರ್ವಾದ ಮಾಡಿದ ಬಳಿಕ ದೇಶಾದ್ಯಂತ ಸುದ್ದಿಯಾಗಿರುವ ಸಾಲು ಮರದ ತಿಮ್ಮಕ್ಕ ಅವರ ಪ್ರತಿಕ್ರಿಯೆ.

ಡಾ.ಜಿ.ಪರಮೇಶ್ವರ ದಂಪತಿಯಿಂದ ಗೌರವ ಸ್ವೀಕರಿಸಿದ ಬಳಿಕ ಸುದ್ದಿಗಾರರೊಂದಿಗೆ ಸೋಮವಾರ ಮಾತನಾಡಿದ ಸಾಲು ಮರದ ತಿಮ್ಮಕ್ಕ ''ದಿಲ್ಲಿಗೆ ತೆರಳಿ ಪ್ರಶಸ್ತಿ ಪಡೆಯುವುದೆಂದರೆ ನನ್ನಂಥವರಿಗೆ ಕನಸಿನ ಮಾತು. ಪ್ರಶಸ್ತಿ ಸ್ವೀಕಾರದ ವೇಳೆ ಸಂತೋಷ ಜಾಸ್ತಿಯಾಗಿತ್ತು. ಅದೇ ಖುಷಿಯಲ್ಲಿ ರಾಷ್ಟ್ರಪತಿಯವರನ್ನು ಆಶೀರ್ವದಿಸಿದೆ. ಪ್ರಶಸ್ತಿ ಪಡೆದು ವಾಪಸಾಗುವಾಗ ಪ್ರಧಾನಿ ಮೋದಿಯವರಿಗೂ ನಮಸ್ಕರಿಸಿದೆ. ಅದಕ್ಕೆ ಪ್ರತಿಯಾಗಿ ಅವರೂ ನಮಸ್ಕಾರ ಮಾಡಿದರು. ಇದು ಮರೆಯಲಾರದ ಕ್ಷಣ,'' ಎಂದು ಭಾವುಕರಾದರು.

ತಿಮ್ಮಕ್ಕ ಅವರು ರಾಷ್ಟ್ರಪತಿಗೆ ಆಶೀರ್ವಾದ ಮಾಡಿದ ಭಾವಚಿತ್ರ ನಾಡಿನೆಲ್ಲೆಡೆ ವೈರಲ್‌ ಆಗಿತ್ತು. ಸ್ವತ: ರಾಮನಾಥ್‌ ಕೋವಿಂದ್‌ ಅವರು ತಮ್ಮ ಟ್ವಿಟರ್‌ ಖಾತೆಯಲ್ಲಿ ತಿಮ್ಮಕ್ಕ ನಡೆಯನ್ನು ಮೆಚ್ಚಿಕೊಂಡಿದ್ದರು. ಈ ಚಿತ್ರವನ್ನು ನೆಟ್ಟಿಗರು ದೊಡ್ಡ ಮಟ್ಟದಲ್ಲಿ ಶೇರ್‌ ಮಾಡಿದ್ದರು.


ತಿಮ್ಮಕ್ಕ ಸೇವೆ ಎಲ್ಲರಿಗೂ ಮಾದರಿ :
ಇದಕ್ಕೂ ಮುನ್ನ ತಿಮ್ಮಕ್ಕ ಅವರನ್ನು ಡಾ.ಜಿ.ಪರಮೇಶ್ವರ ದಂಪತಿ ಗೌರವಿಸಿದರು. ''ಸಣ್ಣ ಹಳ್ಳಿಯಲ್ಲಿ ಇದ್ದುಕೊಂಡೇ ಹಿರಿದಾದ ಸೇವೆ ಮಾಡಿರುವ ತಿಮ್ಮಕ್ಕ ಅವರ ಸೇವೆ ಎಲ್ಲರಿಗೂ ಮಾದರಿಯಾಗಿದೆ. ಮಕ್ಕಳಿಲ್ಲವೆಂದು ರಸ್ತೆಯುದ್ದಕ್ಕೂ ಗಿಡ ನೆಟ್ಟು ಮರಗಳಾಗಿಸಿ ಅವುಗಳನ್ನೇ ತನ್ನ ಮಕ್ಕಳಂತೆ ಸಲಹಿದ್ದು ದೊಡ್ಡ ವಿಷಯ. ಅವರ ಪರಿಸರ ಕಾಳಜಿ ನಮ್ಮೆಲ್ಲರಿಗೂ ಪ್ರೇರಣೆ ನೀಡಿದೆ,'' ಎಂದು ಡಾ,ಪರಮೇಶ್ವರ ಸ್ಮರಿಸಿದರು.