ಕುಷ್ಟಗಿ: ಪಿಯುಸಿ ವಿಜ್ಞಾನ ವಿಭಾಗದ ಪರೀಕ್ಷೆ ಪೂರೈಸಿರುವ ವಿದ್ಯಾರ್ಥಿಗಳು ಉನ್ನತ ಶಿಕ್ಷ ಣ ಪ್ರವೇಶಕ್ಕಾಗಿ ಬರೆಯಬೇಕಿರುವ ಸಿಇಟಿ ಮತ್ತು ನೀಟ್ ಪರೀಕ್ಷೆಯ ತರಬೇತಿಯನ್ನು ಹೈ.ಕ.ಪ್ರದೇಶ ಅಭಿವೃದ್ಧಿ ಅನುದಾನದಲ್ಲಿ ಇಲ್ಲಿನ ಜೂನಿಯರ್ ಕಾಲೇಜಿನಲ್ಲಿ ಸೋಮವಾರ ಆರಂಭಿಸಲಾಯಿತು.
371ಜೆ ಕಾಯಿದೆಗೆ ಒಳಪಡುವ ಹೈ.ಕ.ಪ್ರದೇಶದ ಸರಕಾರಿ ಕಾಲೇಜುಗಳಲ್ಲಿ ಪಿಯುಸಿ ಓದಿರುವ ವಿದ್ಯಾರ್ಥಿಗಳಿಗಾಗಿ ಸಿಇಟಿ ತರಬೇತಿ ಸೌಕರ್ಯ ನೀಡಲಾಗಿದೆ. ಉಪಗ್ರಹ ಆಧರಿತ ತರಬೇತಿ ಏ.17ರಿಂದ ಮೇ 5ವರೆಗೆ ನಡೆಯಲಿದೆ. ಬೆಳಗ್ಗೆ 10ರಿಂದ 11.30ವರೆಗೆ ಜೀವಶಾಸ್ತ್ರ, 11ರಿಂದ 1ವರೆಗೆ ಭೌತಶಾಸ್ತ್ರ, 1.30ರಿಂದ 3ವರೆಗೆ ರಸಾಯನಶಾಸ್ತ್ರ, 3ರಿಂದ 4.30ವರೆಗೆ ಗಣಿತ ವಿಷಯಗಳ ಮೇಲೆ ಉಪಗ್ರಹ ಆಧಾರಿತ ತರಬೇತಿಯನ್ನು ನೀಡಲಾಗುತ್ತಿದೆ. ಪ್ರತಿ ವಿಷಯದ ತರಬೇತಿ ನಂತರ ವಿದ್ಯಾರ್ಥಿಗಳೊಂದಿಗೆ ಸಂವಾದ ಹಾಗೂ ಸಮಸ್ಯೆಗಳಿಗೆ ಪರಿಹಾರ ನೀಡಲು ಸ್ಥಳೀಯವಾಗಿ ಪ್ರಭು ಡಾಣಿ, ಉದಯ, ಜಗದೀಶ ಮತ್ತು ಏಜಾಜ್ಬಾಬಾ ಅವರನ್ನು ಸಂಪನ್ಮೂಲ ವ್ಯಕ್ತಿಗಳನ್ನಾಗಿ ನಿಯೋಜಿಸಲಾಗಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿದ ಕಾಲೇಜಿನ ಪ್ರಾಚಾರ್ಯ ಡಾ.ಎಚ್.ಜಿ.ನೀರಗೇರಿ, ಪಿಯುಸಿ ಪರೀಕ್ಷೆಗೆ ಮೊದಲೇ ವಿದ್ಯಾರ್ಥಿಗಳಿಗೆ ಮಾಹಿತಿ ನೀಡಲಾಗಿದೆ. ಸಿಇಟಿ ಪರೀಕ್ಷೆಗೆ ದಾಖಲಾಗಿರುವ ವಿದ್ಯಾರ್ಥಿಗಳು ತರಬೇತಿಗೆ ಬರುತ್ತಾರೆ. ತರಬೇತಿ ನಂತರ ಸ್ಟಡಿ ಮೆಟಿರಿಯಲ್ ನೀಡಲಾಗುತ್ತಿದೆ ಎಂದರು.