ರಾಜ್ಯಾಧ್ಯಕ್ಷ ಸ್ಥಾನ ನಿಭಾಯಿಸಲು ಸಿದ್ಧ

ಶಿವಮೊಗ್ಗ: ಸರಕಾರಿ ನೌಕರರ ಸಂಘದ ಚುನಾವಣೆಯಲ್ಲಿ ನಮ್ಮ ತಂಡಕ್ಕೆ ಅಭೂತಪೂರ್ವ ಜಯ ಸಿಕ್ಕಿದೆ ಎಂದು ಸಂಘದ ಹಂಗಾಮಿ ಜಿಲ್ಲಾಧ್ಯಕ್ಷ ಸಿ.ಎಸ್‌.ಷಡಾಕ್ಷ ರಿ ಹೇಳಿದರು.

ಸುದ್ದಿಗೋಷ್ಠಿಯಲ್ಲಿ ಶನಿವಾರ ಅವರು ಮಾತನಾಡಿ, ಕಳೆದ ನಮ್ಮ ಅವಧಿಯಲ್ಲಿ ಆದ ಅಭಿವೃದ್ಧಿ ಕೆಲಸಗಳನ್ನು ನೋಡಿ ಮತದಾರರು ನಮ್ಮ ತಂಡವನ್ನು ಮತ್ತೊಮ್ಮೆ ಗೆಲ್ಲಿಸಿಕೊಟ್ಟಿದ್ದಾರೆ. ಹೀಗಾಗಿ ಚುನಾವಣೆಯಲ್ಲಿ ನಾವು ಯಾವುದೇ ಹಣ, ಹೆಂಡದ ಅಮೀಷವೊಡ್ಡದೆ ನಮ್ಮ ತಂಡ ಭರ್ಜರಿಯಾಗಿ ಜಯಗಳಿಸಿದೆ ಎಂದರು.

ತಾಲೂಕಿನ ಆರು ಸ್ಥಾನ ಸೇರಿದಂತೆ ಒಟ್ಟು ಜಿಲ್ಲೆಯಲ್ಲಿ 68 ಸ್ಥಾನಗಳಿಗೆ ಚುನಾವಣೆ ನಡೆದಿದೆ. ಇದರಲ್ಲಿ 60ಕ್ಕೂ ಹೆಚ್ಚು ನಮ್ಮ ತಂಡದ ಅಭ್ಯರ್ಥಿಗಳು ಗೆಲುವು ಸಾಧಿಸಿದ್ದಾರೆ. ಜುಲೈ 1ರಿಂದ 6ರವರೆಗೆ ಜಿಲ್ಲಾಧ್ಯಕ್ಷ ಮತ್ತು ತಾಲೂಕು ಅಧ್ಯಕ್ಷ ಮತ್ತು ಪದಾಧಿಕಾರಿಗಳ ಚುನಾವಣೆ ನಡೆಯಲಿದೆ ಎಂದರು.

ಯಾವುದೇ ಗೊಂದಲವಿಲ್ಲದೆ ಶಾಂತರೀತಿಯಿಂದ ಚುನಾವಣೆ ನಡೆದಿದೆ. ಕೇಂದ್ರ ಸ್ಥಾನದ ಚುನಾವಣಾ ಅಧಿಕಾರಿ ಸೇರಿದಂತೆ ತಾಲೂಕಲ್ಲಿ ಕಾರ್ಯನಿರ್ವಹಿಸಿದ ಎಲ್ಲ ಚುನಾವಣಾ ಅಧಿಕಾರಿಗಳಿಗೂ ನಮ್ಮ ಮೇಲೆ ಪ್ರೀತಿ, ನಂಬಿಕೆ, ವಿಶ್ವಾಸವಿಟ್ಟು ಗೆಲ್ಲಿಸಿದ ಎಲ್ಲ ನೌಕರರಿಗೂ ಕೃತಜ್ಞತೆಗಳು. ಮುಂದಿನ ದಿನಗಳಲ್ಲಿ ಒಂದು ತಂಡವಾಗಿ ಸರಕಾರಿ ನೌಕರರ ಸಮಸ್ಯೆಗಳಿಗೆ ದನಿಯಾಗುವುದಾಗಿ ತಿಳಿಸಿದರು. ಗೋಷ್ಠಿಯಲ್ಲಿ ಪ್ರಮುಖರಾದ ಎಸ್‌.ವೈ. ರಮೇಶ್‌, ಕೃಷ್ಣಮೂರ್ತಿ, ಕಾಂತರಾಜು, ಮೋಹನ್‌ ಕುಮಾರ್‌, ಪಾಪಣ್ಣ, ಶಶಿಕುಮಾರ್‌, ರವಿ, ಅರುಣ್‌ಕುಮಾರ್‌, ಸುರೇಶ್‌, ರಾಜಪ್ಪ, ಪ್ರಸನ್ನ, ಮಾರುತಿ ಮತ್ತಿತರರು ಇದ್ದರು.

=============================
ಚುನಾವಣೆ ಸಂದರ್ಭ ತಾವು ಸ್ಪರ್ಧೆ ಮಾಡುವುದಾಗಿ ಬಯಸಿದ್ದರಿಂದ ಚುನಾವಣೆವರೆಗೂ ಸಂಘದಲ್ಲಿ ಎರಡು ಗುಂಪು ಇದ್ದದ್ದು ನಿಜ. ಆದರೆ ಈಗ ಆ ಗುಂಪುಗಾರಿಕೆ ಇಲ್ಲ. ಎಲ್ಲರೂ ಒಟ್ಟಾಗಿ ಪ್ರಾಮಾಣಿಕ ಕೆಲಸ ಮಾಡುತ್ತೇವೆ. ಹೊಸದಾಗಿ ಚುನಾಯಿತರಾದ ಎಲ್ಲ ನಿರ್ದೇಶಕರು ನೀವೇ ಮತ್ತೊಮ್ಮೆ ಜಿಲ್ಲಾಧ್ಯಕ್ಷ ರಾಗಿ ಎಂದು ಹೇಳುತ್ತಿದ್ದಾರೆ. ಅವರೆಲ್ಲರ ಪ್ರೀತಿಯಿಂದ ಮತ್ತೊಮ್ಮೆ ಜಿಲ್ಲಾಧ್ಯಕ್ಷ ರಾಗಲು ಸಿದ್ಧನಿದ್ದೇನೆ. ಜತೆಗೆ ರಾಜ್ಯಾಧ್ಯಕ್ಷ ರ ಹುದ್ದೆ ನಿಭಾಯಿಸಲೂ ಸಿದ್ಧನಿದ್ದೇನೆ.
-ಸಿ.ಎಸ್‌.ಷಡಾಕ್ಷರಿ, ಜಿಲ್ಲಾ ಸರಕಾರಿ ನೌಕರರ ಸಂಘ ಹಂಗಾಮಿ ಅಧ್ಯಕ್ಷ.