'ಪ್ರೀತಿಯ ಅರಸಿ' ಧಾರಾವಾಹಿಗೆ ನಾಯಕಿಯಾದ ರಕ್ಷಾ ನಿಂಬರ್ಗಿ; ಇದು ಶ್ರುತಿ ನಾಯ್ಡು ಸೀರಿಯಲ್

ಉದಯ ಟಿವಿಯಲ್ಲಿ ಈಗಾಗಲೇ ಹಲವಾರು ಯಶಸ್ವಿ ಧಾರಾವಾಹಿಗಳು ಪ್ರಸಾರವಾಗಿವೆ. ಇತ್ತೀಚಿಗಷ್ಟೆ ಆರಂಭವಾದ ಸಿಂಪಲ್ ಸುನಿ ನಿರ್ಮಾಣದ 'ಶಾಂಭವಿ' ಧಾರಾವಾಹಿಗೂ ವೀಕ್ಷಕರಿಂದ ಮೆಚ್ಚುಗೆ ಸಿಕ್ಕಿದೆ. ಉಳಿದಂತೆ 'ಕನ್ಯಾದಾನ', 'ಆನಂದರಾಗ', 'ಅಣ್ಣ ತಂಗಿ','ಸೇವಂತಿ', 'ಜನನಿ', 'ರಾಧಿಕಾ', 'ಗೌರಿಪುರದ ಗಯ್ಯಾಳಿಗಳು' ಮುಂತಾದ ಧಾರಾವಾಹಿಗಳು ವೀಕ್ಷಕರ ಪ್ರೀತಿಗೆ ಪಾತ್ರವಾಗಿವೆ. ಇದೀಗ ಈ ಸಾಲಿಗೆ ಮತ್ತೊಂದು ಧಾರಾವಾಹಿ ಸೇರ್ಪಡೆ ಆಗಲಿದೆ. ಹೌದು, ಅಕ್ಟೋಬರ್‌ 16ರಿಂದ ಪ್ರತಿದಿನ ರಾತ್ರಿ 9ಕ್ಕೆ 'ಪ್ರೀತಿಯ ಅರಸಿ' ಎಂಬ ಹೊಸ ಧಾರಾವಾಹಿ ಉದಯ ಟಿವಿಯಲ್ಲಿ ಪ್ರಸಾರವಾಗಲಿದೆ.

'ಪ್ರೀತಿಯ ಅರಸಿ' ಧಾರಾವಾಹಿಯು ಅಪೂರ್ಣ ಮನಸ್ಸುಗಳ ಪರಿಪೂರ್ಣ ಪ್ರೇಮಕಥೆಯನ್ನು ಹೊಂದಿದೆಯಂತೆ. ಸಾಮಾನ್ಯವಾಗಿ ಗಂಡು ಎಂದರೆ ಹೊರ ಪ್ರಪಂಚದಲ್ಲಿ ದುಡಿಯುವುದು, ಹೆಣ್ಣು ಎಂದರೆ ಮನೆ ನಿಭಾಯಿಸುವ ಜವಾಬ್ದಾರಿ ಹೊತ್ತವಳು ಎನ್ನುವುದು ಲೋಕಾರೂಡಿ. ಆದೆರ ಈ ಧಾರಾವಾಹಿಯಲ್ಲಿ ಕಥಾನಾಯಕಿ ಅಂಜಲಿ ಮತ್ತು ಕಥಾ ನಾಯಕ ರಾಕಿ, ಇವರಿಬ್ಬರೂ ಈ ಸಾಮಾನ್ಯ ಜಗತ್ತಿನಲ್ಲಿ ವಿಭಿನ್ನ ಯೋಚನಾಲಹರಿ ಹೊಂದಿರುವವರು. ತನ್ನ ಉದ್ಯೋಗದಲ್ಲಿ ಅತ್ಯುನ್ನತ ಮಟ್ಟಕ್ಕೇರುವುದು ಅಂಜಲಿಯ ಕನಸಾದರೆ, ಕುಟುಂಬವೇ ಸರ್ವಸ್ವ, ಮನೆಯೇ ಎಲ್ಲಕ್ಕಿಂತ ಮುಖ್ಯ ಅನ್ನೋದು ಹೀರೋ ರಾಕಿಯ ಧೃಡ ನಿರ್ಧಾರ. ಪ್ರೀತಿಯನ್ನು ಅರಸುತ್ತಿರುವ ಅಂಜಲಿ, ರಾಕಿಯ ಪ್ರೀತಿಯ ಅರಸಿಯಾಗುವಳೇ ಎಂಬ ಕಥೆಯನ್ನು ಇದು ಹೊಂದಿದೆ.