ಜುಲೈ 2ಕ್ಕೆ ಸೂರ್ಯಗ್ರಹಣ: ಗ್ರಹಣದ ವೇಳೆ ಗರ್ಭಿಣಿಯರು ಈ ತಪ್ಪುಗಳನ್ನು ಮಾಡಬಾರದು

2019ರಲ್ಲಿ ಐದು ಗ್ರಹಣಗಳು ಸಂಭವಿಸುತ್ತಿದ್ದು, ಈ ಪೈಕಿ ಜುಲೈ ತಿಂಗಳಲ್ಲಿ ಎರಡು ಕೌತುಕದ ವಿಸ್ಮಯ ನಡೆಯಲಿದೆ. 2019ರ ಜುಲೈ ತಿಂಗಳಿನಲ್ಲಿ ಸೂರ್ಯ ಗ್ರಹಣ ಹಾಗೂ ಚಂದ್ರ ಗ್ರಹಣ ಎರಡೂ ಸಂಭವಿಸಲಿದೆ.

ಜುಲೈ 2ರಂದು ಅಂದರೆ ಆಷಾಢ ಮಾಸ ಆರಂಭಕ್ಕೂ ಮುಂಚಿತವಾಗಿ ಸೂರ್ಯಗ್ರಹಣ ಸಂಭವಿಸಲಿದ್ದರೆ, ಜುಲೈ 17ರಂದು ಚಂದ್ರ ಗ್ರಹಣ ಗೋಚರಿಸಲಿದೆ. ಜುಲೈ 2ರಂದು ಸಂಪೂರ್ಣ ಸೂರ್ಯಗ್ರಹಣ ಸಂಭವಿಸಲಿದ್ದು, ಆದರೆ ಇದು ಭಾರತದಲ್ಲಿ ಗೋಚರಿಸುವುದಿಲ್ಲ. ಇನ್ನು, ಖಗ್ರಾಸ ಚಂದ್ರಗ್ರಹಣ ಜುಲೈ 17ರಂದು ನಡೆಯಲಿದ್ದು, ಭಾರತದಲ್ಲಿ ಗೋಚರಿಸಲಿದೆ.

ಆದರೆ, ಗ್ರಹಣದ ಬಗ್ಗೆ ಧರ್ಮದಲ್ಲಿ ಹಲವಾರು ನಂಬಿಕೆಗಳಿವೆ, ಆ ನಂಬಿಕೆಯಂತೆ ಕೆಲವೊಂದು ಶಾಸ್ತ್ರ ನಿಯಮಗಳನ್ನು ಪಾಲಿಸುವುದು ಒಳ್ಳೆಯದೆಂದು ನಂಬಲಾಗಿದೆ. ಇಲ್ಲಿ ನಾವು ಸೂರ್ಯಗ್ರಹಣದಂದು ಗರ್ಭಿಣಿಯರು ಏನು ಮಾಡಬಹುದು, ಏನು ಮಾಡಬಾರದು ಎಂಬುವುದರ ಕುರಿತು ಹೇಳಿದ್ದೇವೆ.

ಈ ಸುದ್ದಿಯನ್ನು ನೋಡಿ: ಜುಲೈ 2ಕ್ಕೆ ಸೂರ್ಯಗ್ರಹಣ: ಉತ್ತಮ ಆರೋಗ್ಯ, ಗೌರವ, ಸಂಪತ್ತು ಪ್ರಾಪ್ತಿ!
ಗರ್ಭಿಣಿಯರು ಸೂರ್ಯಗ್ರಹಣ ನೋಡಬಹುದಾ?

ನಮ್ಮ ಶಾಸ್ತ್ರ, ಧರ್ಮ, ಪದ್ಧತಿಯಲ್ಲಿ ಗರ್ಭಿಣಿಯರು ಸೂರ್ಯಗ್ರಹಣವನ್ನು ನೋಡುವಂತಿಲ್ಲ, ಸೂರ್ಯಗ್ರಹಣವನ್ನು ನೋಡುವುದು ಗರ್ಭದಲ್ಲಿರುವ ಮಗುವಿನ ಆರೋಗ್ಯಕ್ಕೆ ಒಳ್ಳೆಯದಲ್ಲ ಎನ್ನುವ ನಂಬಿಕೆ ಇದೆ.

ಗರ್ಭಿಣಿಯರಿಗೆ, ಚಿಕ್ಕ ಮಕ್ಕಳಿಗೆ, ವಯಸ್ಸಾದವರಿಗೆ ಹಾಗೂ ಕಾಯಿಲೆಯಿಂದ ಬಳಲುತ್ತಿರುವವರಿಗೆ ಗ್ರಹಣಕಾಲದಲ್ಲಿ ಪಾಲಿಸುವ ಕೆಲವೊಂದು ಧಾರ್ಮಿಕ ಆಚರಣೆಗಳಿಂದ ವಿನಾಯಿತಿ ನೀಡಲಾಗಿದೆ. ಆದ್ದರಿಂದ ಗರ್ಭಿಣಿಯರು ಸೂರ್ಯಗ್ರಹಣದಂದು ಮನೆಯಲ್ಲಿ ವಿಶ್ರಾಂತಿ ತೆಗೆದುಕೊಳ್ಳುವುದು ಒಳ್ಳೆಯದು. ಅದರ ಹೊರತಾಗಿ ನಿರ್ದಿಷ್ಟವಾದ ನಿಯಮವೆಂಬುವುದು ಇಲ್ಲ.

ಈ ದಿನ ಗರ್ಭಿಣಿಯರು ಹೊರಗಡೆ ಸುತ್ತಾಡದೇ, ಮನೆಯಲ್ಲೇ ವಿಶ್ರಾಂತಿ ತೆಗೆದುಕೊಳ್ಳಬೇಕು. ಇವರಿಗೆ ತಿನ್ನುವುದು, ಕುಡಿಯುವುದು, ನೈಸರ್ಗಿಕ ಕರೆಗಳಿಗೆ ಹೋಗುವುದು ಇವುಗಳಿಗೆ ಯಾವುದೇ ನಿರ್ಬಂಧವಿರುವುದಿಲ್ಲ.

ಈ ದಿನದಂದು ದೇವರಿಗೆ ತುಪ್ಪದ ದೀಪ ಹಚ್ಚಿದರೆ ಶುಭವಾಗುವುದು ಎಂಬ ನಂಬಿಕೆ ಇದೆ. ಅಲ್ಲದೆ, ಈ ಸಮಯದಲ್ಲಿ ದೇವರ ನಾಮ ಜಪ ಮಾಡುವುದು ಕೂಡ ಒಳ್ಳೆಯದು ಎಂದು ಹೇಳಲಾಗುವುದು. ಗ್ರಹಣದ ಬಳಿಕ ಸ್ನಾನ ಮಾಡಿ.