ಪುರಾತನ ಶಿವ ದೇವಸ್ಥಾನವನ್ನು ಪೊರೆಯುತ್ತಿರುವ ಮುಸ್ಲಿಂ ಕುಟುಂಬ

ದಿಸ್‌ಪುರ: ಸುಮಾರು 500 ವರ್ಷದ ಹಳೆಯ ಶಿವ ದೇವಸ್ಥಾನವನ್ನು ಮುಸ್ಲಿಂ ಕುಟುಂಬವೊಂದು ರಕ್ಷಿಸಿ ಪೊರೆಯುತ್ತ ಬಂದಿದೆ.

ಗುವಾಹಟಿಯ ರಂಗಾಮಹಲ್‌ನಲ್ಲಿರುವ ಶಿವ ದೇವಸ್ಥಾನಕ್ಕೆ 500 ವರ್ಷಇತಿಹಾಸವಿದ್ದು, ಹಿಂದೂ ಮತ್ತು ಮುಸ್ಲಿಂ ಸಮುದಾಯಗಳು ಭಕ್ತಿಯಿಂದ ಶಿವನನ್ನು ಪೂಜಿಸುತ್ತಿದ್ದಾರೆ. ದೇವಸ್ಥಾನವನ್ನು ನೋಡಿಕೊಳ್ಳುತ್ತಿರುವ ಹಾಜಿ ಮತಿಬಾರ್‌ ರೆಹ್ಮಾನ್‌ ಕೈಲಾಸವಾಸಿ ಶಿವನನ್ನು ಅತ್ಯಂತ ಭಕ್ತಿಯಿಂದ ಪೂಜಿಸುತ್ತಾರೆ.

'ನಾನು ಶಿವನನ್ನು ನಾನಾ ಎಂದು ಕರೆಯುತ್ತೇನೆ. ಇದು ಸುಮಾರು 500 ವರ್ಷಗಳ ಹಳೆಯ ದೇವಸ್ಥಾನ. ನಮ್ಮ ಕುಟುಂಬ ಈ ದೇವಸ್ಥಾನವನ್ನು ನಿರ್ವಹಿಸುತ್ತಿದೆ. ಹಿಂದೂ ಮತ್ತು ಮುಸ್ಲಿಂ ಸಮುದಾಯದ ಭಕ್ತರು ಇಲ್ಲಿಗೆ ಆಗಮಿಸಿ ಪೂಜೆಗಳನ್ನು ಸಮರ್ಪಿಸುತ್ತಾರೆ' ಎಂದು ಮತಿಬಾರ್‌ ರೆಹ್ಮಾನ್‌ ತಿಳಿಸಿದ್ದಾರೆ.

ಭಗವಾನ್‌ ಶಿವ ದೇವಸ್ಥಾನದಲ್ಲಿ ಮುಸ್ಲಿಮರು ದುವಾ ಅರ್ಪಿಸುತ್ತಾರೆ. ಹಿಂದೂಗಳು ಪೂಜೆ ನಡೆಸುತ್ತಾರೆ. ಎಲ್ಲರೂ ಅತ್ಯಂತ ಭಕ್ತಿಯಿಂದ ಇಲ್ಲಿಗೆ ಆಗಮಿಸುತ್ತಾರೆ. ನಾವೂ ಇಲ್ಲಿ ದುವಾ ಸಮರ್ಪಿಸುತ್ತೇವೆ ಎಂದು ರೆಹ್ಮಾನ್‌ ತಿಳಿಸಿದ್ದಾರೆ.

ಹಿಂದೂ ಮತ್ತು ಮುಸ್ಲಿಂ ಸಮುದಾಯದ ಭಕ್ತರು ಆಗಮಿಸುತ್ತಿರುವುದರಿಂದ ಉಭಯ ಸಮುದಾಯಗಳ ನಡುವೆ ಉತ್ತಮ ಬಾಂಧವ್ಯ ವೃದ್ಧಿಸಿದೆ.

ಇದೇ ರೀತಿ ಕಾಶ್ಮೀರದಲ್ಲಿ ಇಬ್ಬರು ಮುಸ್ಲಿಂ ಮೌಲ್ವಿಗಳು 900 ವರ್ಷದ ಇತಿಹಾಸ ಹೊಂದಿರುವ ಶಿವ ದೇವಸ್ಥಾನವನ್ನು ನೋಡಿಕೊಳ್ಳುತ್ತಿದ್ದಾರೆ. ಕಾಶ್ಮೀರ ಪಂಡಿತರು ಗ್ರಾಮವನ್ನು ತೊರೆದ ನಂತರ ಮುಸ್ಲಿಂ ಮೌಲ್ವಿಗಳಾದ ಮೊಹಮ್ಮದ್‌ ಅಬ್ದುಲ್ಲಾ ಮತ್ತು ಗುಲಾಮ್‌ ಹಸನ್‌ ಶಿವ ದೇವಸ್ಥಾನವನ್ನು ನೋಡಿಕೊಳ್ಳಲು ಆರಂಭಿಸಿದರು. ಕಣಿವೆ ರಾಜ್ಯದಲ್ಲಿ ಮುಸ್ಲಿಂ ಮೌಲ್ವಿಗಳು ನಿರ್ವಹಿಸುತ್ತಿರುವ ಏಕೈಕ ದೇವಸ್ಥಾನ ಇದಾಗಿದೆ.