ನಾಗರ ಪಂಚಮಿ ಸಂಭ್ರಮಕ್ಕೆ ಸೋಷಿಯಲ್‌ ಮೀಡಿಯಾ ಸಾಥ್‌

ನಾಗರ ಪಂಚಮಿ ಸಂಭ್ರಮಕ್ಕೆ ಸೋಷಿಯಲ್‌ ಮೀಡಿಯಾಗಳೂ ಸಾಥ್‌ ನೀಡಿವೆ. ಸ್ಯಾಂಡಲ್‌ವುಡ್‌ ತಾರೆಯರು ಟ್ವಿಟ್ಟರ್‌, ಫೇಸ್‌ಬುಕ್‌, ಇನ್‌ಸ್ಟಾಗ್ರಾಂ ಇತ್ಯಾದಿಗಳಲ್ಲಿ ಹಬ್ಬದ ಸಂಭ್ರಮ ಹಂಚಿಕೊಂಡಿದ್ದಾರೆ.

ನಂದಿನಿ ಕೆ.ಎಲ್‌

ಸ್ಯಾಂಡಲ್‌ವುಡ್‌ ತಾರೆಯರೂ ನಾಗರಪಂಚಮಿ ಹಬ್ಬದ ಸಂಭ್ರಮದಲ್ಲಿದ್ದಾರೆ. ನಟಿಯರಾದ ಮಮತಾ ರಾವುತ್‌, ಮೇಘಶ್ರೀ, ಕಾರುಣ್ಯ ಗೌಡ, ನಭಾ ನಟೇಶ್‌ ಮುಂತಾದವರು ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಅಭಿಮಾನಿಗಳಿಗೆ ಶುಭ ಕೋರಿದ್ದಾರೆ.

ಹಾವಿನ ದರ್ಶನಕ್ಕೆ ಕಾಯುತ್ತಿರುವ ಮಮತಾ

ನನಗೆ ಕಳೆದ ಎರಡು ವರ್ಷಗಳಿಂದ ಹಾವಿನ ಬಗ್ಗೆ ಅತಿಯಾದ ಭಕ್ತಿ ಬಂದಿದೆ. ಪ್ರತಿ ವರ್ಷವೂ ತಪ್ಪದೆ ಹತ್ತಿರದ ನಾಗದೇವತೆ ದೇವಸ್ಥಾನಕ್ಕೆ ಅಮ್ಮನೊಂದಿಗೆ ಹೋಗಿ ಹಾಲು ಮತ್ತು ತಂಬಿಟ್ಟು ನೀಡಿ ಪೂಜೆ ಮಾಡಿ ಬರುತ್ತೇನೆ. ಯಾವಾಗಲೂ ಪ್ರತ್ಯಕ್ಷ ಹಾವು ಬಂದು ದರ್ಶನ ಕೊಡಲಿ ಎಂದು ಹಾತೊರೆಯುತ್ತಿದ್ದೇನೆ. ಈ ಬಾರಿಯಾದರೂ ಹಾವು ನನ್ನ ಮುಂದೆ ಬಂದು ದರ್ಶನ ಕೊಡಲಿ. ಅದಕ್ಕೆ ಕೈ ಮುಗಿದು ಪ್ರಾರ್ಥಿಸುವೆ ಎಂದು ನಟಿ ಮಮತಾ ರಾವುತ್‌ ಇನ್‌ಸ್ಟಾಗ್ರಾಮ್‌ನಲ್ಲಿ ಬರೆದುಕೊಂಡಿದ್ದಾರೆ.

ನಾಗ ಭಕ್ತೆ ಮೇಘಶ್ರೀ

ಮಲೆನಾಡಿನಲ್ಲಿರುವ ನಮ್ಮೂರಲ್ಲಿ ನಾಗರ ಪಂಚಮಿ ಹಬ್ಬವನ್ನು ವಿಶೇಷವಾಗಿ ಮಾಡುತ್ತಾರೆ. ಮನೆಯಲ್ಲಿ ನನ್ನಮ ವೈವಿಧ್ಯಮಯ ಖಾದ್ಯ ತಯಾರಿಸಿ ಪೂಜೆ ಮಾಡುತ್ತೇವೆ. ನಾನು ನಾಗಕ್ನನಿಕೆಯಲ್ಲಿ ಹಾವಿನ ಪಾತ್ರವನ್ನೇ ನಿರ್ವಹಿಸುತ್ತಿದ್ದೆ. ಆಗಿನಿಂದಲೇ ಹಾವುಗಳ ಬಗ್ಗೆ ಭಕ್ತಿ ಹೆಚ್ಚಾಯಿತು ಎಂದು ನಟಿ ಮೇಘಶ್ರೀ ಸೋಷಿಯಲ್‌ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ.

ಹಬ್ಬದ ಸಂಭ್ರಮದಲ್ಲಿ ನಭಾ

ಪ್ರತಿ ಹಬ್ಬಕ್ಕೂ ಸಾಂಪ್ರದಾಯಿಕ ಉಡುಗೆ ಧರಿಸಿ ಅಮ್ಮ ಮಾಡಿದ ಖಾದ್ಯಗಳನ್ನು ತಿನ್ನುವ ಸಡಗರವೇ ಚೆಂದ. ಹಬ್ಬಗಳನ್ನು ಹೆಣ್ಣು ಮಕ್ಕಳು ಎಂಜಾಯ್‌ ಮಾಡಬೇಕು ಎಂದು ನಟಿ ನಭಾ ನಟೇಶ್‌ ಸಾಮಾಜಿಕ ಜಾಲತಾಣಗಳಲ್ಲಿ ಸಲಹೆ ನೀಡಿದ್ದಾರೆ.

ಹಾವಿಗೆ ತೊಂದರೆ ಕೊಡಬೇಡಿ ಎಂದ ಕಾರುಣ್ಯ

ನಾಗರ ಪಂಚಮಿಯಂದು ನಮ್ಮ ಮನೆಯಲ್ಲಿ ನನ್ನ ತಂಗಿ, ಅಮ್ಮ ಮತ್ತು ನಾನು ದೇವಸ್ಥಾನಕ್ಕೆ ಹೋಗಿ ಪ್ರಾರ್ಥನೆ ಮಾಡುತ್ತೇವೆ. ಅಮ್ಮ ಶ್ರದ್ದೆಯಿಂದ ಪೂಜೆ ಮಾಡುತ್ತಾರೆ. ಈ ದಿನ ನಾವು ನಾನ್‌ವೆಜ್‌ ಸೇವಿಸುವುದಿಲ್ಲ. ಹಾವಿಗೆ ನಾವು ತೊಂದರೆ ಕೊಡದಿದ್ದರೆ ಅದು ನಮಗೇನೂ ಮಾಡುವುದಿಲ್ಲ. ನಿಜ ಹಾವು ಬಂದಾಗ ಗಡಿಬಿಡಿ ಮಾಡದೇ ಅದರ ಪಾಡಿಗೆ ಅದನ್ನು ಬಿಡಿ ಎಂದು ನಟಿ ಕಾರುಣ್ಯ ಗೌಡ ಸೂಚಿಸಿದ್ದಾರೆ.