* ಉದಯಕುಮಾರ್‌ ಹಬ್ಬು
ವಾಸ್ತು ಮತ್ತು ಫೆಂಗ್‌ಶೂಯಿ ಸೂತ್ರಕ್ಕೂ ಪರಸ್ಪರ ಸಂಬಂಧವಿದೆ. ಫೆಂಗ್‌ಶೂಯಿ 'ಚಿ' ಶಕ್ತಿಯನ್ನು ಆಧರಿಸಿದೆ. ಮನೆಯ ಶಕ್ತಿ ಕೇಂದ್ರವೇ ಪೂಜಾಗೃಹ. ಪೂಜಾಗೃಹವನ್ನು ಹೇಗಿಟ್ಟುಕೊಳ್ಳಬೇಕು?
ಪೂಜಾ ಕೋಣೆ ಬಾಹ್ಯ ಶಕ್ತಿಗಳೊಡನೆ ಸಂಪರ್ಕಕ್ಕೆ ಬರುವ ಪ್ರಶಾಂತ ಕ್ಷೇತ್ರ. ದೇವರ ಕೋಣೆಯಿಂದಾಗಿ ಮನೆಯಲ್ಲಿ ಕಂಪನ ಶಕ್ತಿ ಉತ್ಪಾದನೆಯಾಗುತ್ತದೆ. ಹಾಗಾಗಿ ದೇವರ ಕೋಣೆ ನಿರ್ಮಿಸುವಾಗ ಕೆಲವೊಂದು ಅಂಶಗಳನ್ನು ಗಮನಿಸುವುದು ಒಳ್ಳೆಯದು.
ಸ್ಥಳದ ಆಯ್ಕೆ : ಈಶಾನ್ಯ ದಿಕ್ಕಿನಿಂದ ಸ್ವಲ್ಪ ದೂರವಿರಬೇಕು. ಮನೆಯ ಉತ್ತರ ಅಥವಾ ಪೂರ್ವ ದಿಕ್ಕಿನ ಬದಿಯಲ್ಲಿದ್ದರೆ ಒಳ್ಳೆಯದು. ಯಾವುದೇ ಕಾರಣಕ್ಕೂ ಪೂಜಾ ಕೋಣೆಯನ್ನು ದಕ್ಷಿಣ ಮತ್ತು ಆಗ್ನೇಯ ದಿಕ್ಕಿನಲ್ಲಿ ಸ್ಥಾಪಿಸಬಾರದು. ಮಲಗುವ ಕೋಣೆಯಲ್ಲಿ ಪೂಜಾಗೃಹ ಇರುವುದು ಒಳ್ಳೆಯದಲ್ಲ. ಅಡುಗೆ ಕೋಣೆಯ ಬದಿಯಲ್ಲಿ ಅಥವಾ ಮೆಟ್ಟಿಲುಗಳ ಕೆಳಗೆ ಸ್ಥಾಪಿಸುವುದು ಸರಿಯಲ್ಲ. ದೇವರ ಮೂರ್ತಿ ಪೂರ್ವ ದಿಕ್ಕಿನಲ್ಲಿರುವುದು ಒಳ್ಳೆಯದು. ಪೂಜಾ ಕೋಣೆಯ ಮಾಡು ಗೋಪುರ ಅಥವಾ ಪಿರಮಿಡ್‌ ಆಕಾರದಲ್ಲಿರಲಿ.
ಪೂಜಾ ಕೋಣೆಗೆ ಬಳಸುವ ಬಣ್ಣ ಪ್ರಶಾಂತವಾಗಿರಬೇಕು (ಮೃದು ಶೇಡುಗಳುಳ್ಳ ಹಳದಿ, ನೀಲಿ ಮತ್ತು ನೇರಳೆ ಬಣ್ಣ ಬಳಿಸಬಹುದು). ಪೂಜಾ ಕೋಣೆಯಲ್ಲಿ ಇಡುವ ಮೂರ್ತಿಗಳು 18 ಇಂಚುಗಳಿಗಿಂತ ಹೆಚ್ಚಾಗಿ ಇರಬಾರದು. ಬ್ರಹ್ಮ, ವಿಷ್ಣು, ಮಹೇಶ್ವರ, ಕಾರ್ತಿಕೇಯ, ಇಂದ್ರ, ಸೂರ್ಯನನ್ನು ಪೂರ್ವ ದಿಕ್ಕಿನಲ್ಲಿ ಇಡಬೇಕು. ಗಣೇಶ, ದುರ್ಗಾ, ಕುಬೇರ, ಷೋಡಶ ಮಾತೃಕೆ ಮತ್ತು ಭೈರವ ಉತ್ತರ ದಿಕ್ಕಿನಲ್ಲಿರಬೇಕು. ಹನುಮಂತ ಈಶಾನ್ಯ ದಿಕ್ಕಿನಲ್ಲಿದ್ದರೆ ಒಳ್ಳೆಯದು. ದೇವರ ಮೂರ್ತಿಗಳನ್ನು ಸ್ಥಾಪಿಸಿದ ಮೇಲಿನ ಸ್ಪ್ಯಾಬ್‌ ಅಥವಾ ಕ್ಯಾಬಿನ್ನಿನ ಮೇಲ್ಬದಿಯಲ್ಲಿ ಯಾವುದೇ ವಸ್ತುಗಳನ್ನು ಇಡುವುದು ಒಳ್ಳೆಯದಲ್ಲ. ದೇವರ ಮುಂಬದಿಯಲ್ಲಿ ಪೂಜಾ ಸಾಮಗ್ರಿ, ಆರತಿ, ಸೊಡಿಲುಗಳನ್ನು ಇಡಬೇಕು. ಪೂಜಾ ಕೋಣೆಯಲ್ಲಿ ಕಸದ ಬುಟ್ಟಿಯನ್ನು ಇಡುವುದು ಒಳ್ಳೆಯದಲ್ಲ. ಯಾವುದೇ ಕಾರಣಕ್ಕೂ ಕೈಕಾಲು ತೊಳೆಯದೆ ಪೂಜಾಗೃಹವನ್ನು ಪ್ರವೇಶಿಸುವುದು ಒಳ್ಳೆಯದಲ್ಲ. ದೇವರಿಗೆಂದು ತ್ರಿಕೋನಾಕೃತಿಯ ಜಾಗವನ್ನು ಬಿಡುವುದು ತರವಲ್ಲ.