ಚೀನಿ ವಾಸ್ತು ಶಾಸ್ತ್ರ ಫೂಂಗ್‌ ಶ್ವೇ ಪ್ರಕಾರ ಅಡುಗೆ ಮನೆಯು ಯಾಂಗ್‌ ಶಕ್ತಿಯಿಂದ ಕೂಡಿರುತ್ತದೆ. ಅಡುಗೆ ಮನೆಯ ಸ್ಟವ್‌ ಹಾಗೂ ಪಾತ್ರೆ ತೊಳೆಯುವ ವಾಶ್‌ ಬೇಸಿನ್‌ ಒಂದರ ಪಕ್ಕ ಇನ್ನೊಂದು ಇರಬಾರದು.
ಸ್ಟವ್‌ ಕುಟುಂಬದ ಸಂಪತ್ತನ್ನು ಪ್ರತಿನಿಧಿಸುವುದು. ಅಡುಗೆ ಮನೆಯಲ್ಲಿ ಅಗ್ನಿ ಮೂಲ ಧಾತುವಿಗೆ ಸೇರಿದ ವಸ್ತುಗಳನ್ನು ಇಡಬಾರದು. ಇದು ಆಕಸ್ಮಿಕ ಅಗ್ನಿ ಅನಾಹುತಕ್ಕೆ ಕಾರಣವಾಗುತ್ತದೆ. ಅಡುಗೆ ಮನೆಯ ಮೇಲೆ (ಮಹಡಿಯಲ್ಲಿ) ಟಾಯ್ಲೆಟ್‌ ಇರಕೂಡದು. ಇದರಿಂದ ಆಹಾರ ಕಲುಷಿತವಾಗುವುದು.
ಅಡುಗೆ ಮನೆ ಶುಭ ಭಾಗದಲ್ಲಿರಬೇಕು. ಅಡುಗೆ ಮಾಡುವಾಗ ಯಾವ ವ್ಯಕ್ತಿ ಅಡುಗೆ ಮಾಡುತ್ತಿರುವರೋ ಅವರ ಬೆನ್ನು ಅಡುಗೆ ಮನೆಯ ಬಾಗಿಲಿಗೆ ಅಭಿಮುಖವಾಗಿರಬಾರದು. ಅಂದರೆ ಅಡುಗೆ ಮಾಡುವವರು ಅಡುಗೆ ಮನೆಗೆ ಬರುವ ವ್ಯಕ್ತಿಯನ್ನು ಕುತ್ತಿಗೆ ಹೊರಳಿಸದೇ ನೋಡುವಂತಿರಬೇಕು.
ಅಡುಗೆ ಮನೆಯ ಬಾಗಿಲಿಗೆ ಮುಖ ಮಾಡಿ ಅಡುಗೆ ಮಾಡಬೇಕು. ಅಡುಗೆ ಮನೆಯು ಆರೋಗ್ಯವನ್ನು ಪ್ರತಿನಿಧಿಸುತ್ತದೆ. ಯಾವಾಗಲೂ ಸ್ಟವ್‌, ಬರ್ನರ್‌ಗಳು ಧೂಳು, ಜಿಡ್ಡು ಹಾಗೂ ನೀರಿನಿಂದ ಕೊಳಕಾಗದಂತೆ ನೋಡಿಕೊಳ್ಳಬೇಕು.
ಅಡುಗೆ ಮನೆಯು ಅದೃಷ್ಟದ ಮೇಲೆ ಪರಿಣಾಮ ಬೀರುತ್ತದೆ. ಹೀಗಾಗಿ ಅಲ್ಲಿ ನೀರು ಅನಗತ್ಯ ಹರಿಯದಂತೆ ನೋಡಿಕೊಳ್ಳಬೇಕು. ನೀರು ಸಂಪತ್ತಿಗೆ ಪ್ರತೀಕವಾಗಿದೆ. ನಲ್ಲಿಯಲ್ಲಿ ನೀರು ಸೋರುತ್ತಿದ್ದರೆ ಬೇಗನೆ ದುರಸ್ತಿ ಮಾಡಬೇಕು.