ಟೊಯೊಟಾ ಬಹುನಿರೀಕ್ಷಿತ ಕಾರು ಭರ್ಜರಿ ಅನಾವರಣ

ಹೊಸದಿಲ್ಲಿ: ಪ್ರಸಕ್ತ ಸಾಲಿನಲ್ಲಿ ನಡೆಯಲಿರುವ ಅತಿ ದೊಡ್ಡ ಲಾಂಚ್‌ಗಳಲ್ಲಿ ಒಂದಾಗಿರುವ ಟೊಯೊಟಾ ಯಾರಿಸ್ ಭರ್ಜರಿ ಅನಾವರಣ ಕಂಡಿದೆ.

ದಿಲ್ಲಿಯಲ್ಲಿ ಸಾಗುತ್ತಿರುವ ಪ್ರತಿಷ್ಠಿತ 2018 ಆಟೋ ಎಕ್ಸ್‌ಪೊದಲ್ಲಿ ಜಪಾನ್ ಮೂಲದ ಮುಂಚೂಣಿಯ ವಾಹನ ಸಂಸ್ಥೆ ಟೊಯೊಟಾ ಕಿರ್ಲ್ಕೊಸರ್ ಮೋಟಾರ್ ಸಂಸ್ಥೆಯು ಅತಿ ನೂತನ ಯಾರಿಸ್ (Yaris) ಕಾರನ್ನು ಪ್ರದರ್ಶಿಸಿದೆ.

ಬಿ ಸೆಗ್ಮೆಂಟ್ ಕಾರು ವಿಭಾಗದಲ್ಲಿ ಟೊಯೊಟಾ ಯಾರಿಸ್ ಹೊಸ ನಿರೀಕ್ಷೆಯನ್ನುಂಟು ಮಾಡಿದೆ. ಗುಣಮಟ್ಟ, ಬಾಳ್ವಿಕೆ ಮತ್ತು ವಿಶ್ವಾಸಾರ್ಹತೆ (QDR) ತತ್ವಶಾಸ್ತ್ರದಲ್ಲಿ ಈ ವಿಶ್ವ ದರ್ಜೆಯ ಸೆಡಾನ್ ಕಾರು ಹೆಚ್ಚು ಐಷಾರಾಮಿಯೆನಿಸಿದೆ.

ಆಕ್ರಮಣಕಾರಿ ವಿನ್ಯಾಸ, ಹೆಚ್ಚು ಸ್ಥಳಾವಕಾಶ, ಆರಾಮದಾಯಕತೆಗೆ ಆದ್ಯತೆ ಕೊಡಲಾಗಿದೆ.

ಯಾರಿಸ್ ಹೆಸರು ಏಕೆ?
ಗ್ರೀಕ್ ದೇವತೆ ಚಾರೀಸ್ (charis) ಗಾಗಿ ಕಾರಿಗೆ ಯಾರಿಸ್ ಎಂಬ ಹೆಸರು ಇಡಲಾಗಿದ್ದು, ಇದು ಸೌಂದರ್ಯ ಮತ್ತು ಸೊಬಗನ್ನು ಸಾರುತ್ತದೆ.

ಐದು ವಿಶಿಷ್ಟತೆಗೆ ಇದು ವಿಶ್ವ ದರ್ಜೆಯಲ್ಲಿ ಹೆಸರು ಮಾಡಿದೆ. ಅವುಗಳಲ್ಲಿ ಮುಂದುವರಿದ ಮತ್ತು ಭಾವನಾತ್ಮಕ ವಿನ್ಯಾಸ, ವಿಸ್ತಾರವಾದ ಸೌಲಭ್ಯ, ಉತ್ತಮ ಸವಾರಿ ಗುಣಮಟ್ಟ ಹಾಗೂ ಶಾಂತತೆ, ಕ್ರಿಯಾತ್ಮಕ ದಕ್ಷತೆ, ಸುರಕ್ಷತೆ ಮತ್ತು ತಂತ್ರಜ್ಞಾನಗಳು ಸೇರಿವೆ.