ಬಿಎಂಡಬ್ಲ್ಯೂ ಎಕ್ಸ್‌-1 ಪೆಟ್ರೋಲ್‌ ಆವೃತ್ತಿ ಭಾರತದ ಮಾರುಕಟ್ಟೆ ಪ್ರವೇಶಿಸಿದೆ. ಈ ಹಿಂದೆ ಕೇವಲ ಡೀಸೆಲ್‌ ಮಾದರಿ ಮಾತ್ರ ಭಾರತದಲ್ಲಿ ಲಭ್ಯವಿತ್ತು.
2.0 ಲೀಟರ್‌ ಪೆಟ್ರೋಲ್‌ ಎಂಜಿನ್‌ ಹೊಂದಿರುವ ಇದರ ಬೆಲೆ 35.75 ಲಕ್ಷ ರೂ.ನಿಂದ ಆರಂಭವಾಗುತ್ತದೆ. 1,998 ಸಿಸಿ, ನಾಲ್ಕು ಸಿಲಿಂಡರ್‌ ಟ್ವಿನ್‌ ಪವರ್‌ ಟರ್ಬೋ ಎಂಜಿನ್‌ನ್ನು ಇದು ಹೊಂದಿದೆ. ಎಂಟು ಸ್ಟೆಪ್ಟ್ರೋನಿಕ್‌ ಅಟೋಮೆಟಿಕ್‌ ಸ್ಪೋರ್ಟ್ಸ್ ಗೇರ್‌ ಬ್ಯಾಕ್ಸ್‌, ಪೆಡಲ್‌ ಶಿಫ್ಟರ್‌ ಹಾಗೂ ಲಾಂಚ್‌ ಕಂಟ್ರೋಲ್‌ ಸಿಸ್ಟಂ ಕೂಡ ಹೊಂದಿದೆ. 7.7 ಸೆಕೆಂಡುಗಳಲ್ಲಿ 0-100 ಕಿ.ಮೀ. ವೇಗವನ್ನು ಇದು ಪಡೆಯುವ ಸಾಮರ್ಥ್ಯ ಹೊಂದಿದ್ದು, ಪ್ರತಿ ಲೀಟರ್‌ ಪೆಟ್ರೋಲ್‌ಗೆ 16.30 ಕಿ.ಮೀ. ಮೈಲೇಜ್‌ ನೀಡುತ್ತದೆ ಎಂದು ಸಂಸ್ಥೆ ಹೇಳಿಕೊಂಡಿದೆ.
ಇದರಲ್ಲಿರುವ ಫೀಚರ್‌ಗಳು ಡೀಸೆಲ್‌ ಮಾದರಿಯ ರೀತಿಯಲ್ಲೇ ಇದೆ. ಡಿಆರ್‌ಎಲ್‌ ಸಹಿತ ಎಲ್‌ಇಡಿ ಹೆಡ್‌ ಲ್ಯಾಂಪ್‌, ಕಾರ್ನರಿಂಗ್‌ ಲೈಟ್‌ಗಳು, ಡ್ಯುಯೆಲ್‌ ಝೋನ್‌ ಕ್ಲೈಮೇಟ್‌ ಕಂಟ್ರೋಲ್‌, ಇಲೆಕ್ಟ್ರಿಕಲ್ಲೀ ಅಡ್ಜೆಸ್ಟೇಬಲ್‌ ಚಾಲಕ ಮತ್ತು ಸಹ ಪ್ರಯಾಣಿಕರ ಸೀಟುಗಳು, ಚಾಲಕನಿಗೆ ಮೆಮೊರಿ ಫಂಕ್ಷನ್‌, ಪನೋರಮಾ ರೂಫ್‌, ಬಿಎಂಡಬ್ಲ್ಯೂ ಐಡ್ರೈವ್‌ನಡಿ ಕೆಲಸ ಮಾಡುವ 6.5 ಇಂಚಿನ ಇನ್‌ಫೋಟೈನ್‌ಮೆಂಟ್‌ ಸಿಸ್ಟಂ, ಬ್ಲೂಟೂಥ್‌ ಕನೆಕ್ಟಿವಿಟಿ, ಹಿಂಭಾಗ ಕ್ಯಾಮರಾ ಮೊದಲಾದ ಸೌಲಭ್ಯಗಳಿವೆ.
ಸುರಕ್ಷತೆಯ ವಿಷಯಕ್ಕೆ ಬಂದರೆ ಆರು ಏರ್‌ ಬ್ಯಾಗ್‌ಗಳು, ಎಬಿಎಸ್‌, ಕಾರ್ನರಿಂಗ್‌ ಬ್ರೇಕ್‌ ಕಂಟ್ರೋಲ್‌, ಡೈನಾಮಿಕ್‌ ಸ್ಟೆಬಿಲಿಟಿ ಕಂಟ್ರೋಲ್‌, ಡೈನಾಮಿಕ್‌ ಟ್ರಾಕ್ಷನ್‌ ಕಂಟ್ರೋಲ್‌, ಐಎಸ್‌ಒಎಫ್‌ಐಎಕ್ಸ್‌ ಚೈಲ್ಡ್‌ ಸೀಟ್‌ ಮೌಂಟ್‌ ಇದೆ. ಇದು ಚಾಲಕನ ಏಕಾಗ್ರತೆ ತಪ್ಪಿ ಅವಘಡ ಸಂಭವಿಸುವ ಸಾಧ್ಯತೆಯಿದ್ದರೆ, ಆ ಬಗ್ಗೆ ಚಾಲಕನನ್ನು ಎಚ್ಚರಿಸುವ ಅಟೆಂಟಿವ್‌ ಅಸಿಸ್ಟ್‌ ಸಿಸ್ಟಂ ಕೂಡ ಇದೆ.