MG Hector: ಬರುತ್ತಿದೆ ಮೋರಿಸ್ ಗ್ಯಾರೇಜ್ ಇಸಿಮ್ ಸಹಿತ ಕಾರು

ಬ್ರಿಟನ್‌ನ ಪ್ರಸಿದ್ಧ ಕಾರು ತಯಾರಿಕ ಸಂಸ್ಥೆ ಮೋರಿಸ್ ಗ್ಯಾರೇಜ್ ದೇಶದಲ್ಲಿ ವಿವಿಧ ಮಾದರಿಯ ಕಾರುಗಳನ್ನು ಪರಿಚಯಿಸಲು ಸಿದ್ಧತೆ ನಡೆಸಿದೆ.

ಮೊದಲಿಗೆ ಭಾರತದಲ್ಲಿ ಮೋರಿಸ್ ಗ್ಯಾರೇಜ್ ಹೆಕ್ಟರ್ ಎಸ್‌ಯುವಿ ಕಾರು ಬಿಡುಗಡೆಯಾಗಲಿದ್ದು, ಅಂದಾಜು 15 ಲಕ್ಷ ರೂ. ಬೆಲೆ ಹೊಂದಿರಬಹುದು ಎನ್ನಲಾಗಿದೆ.

ವಿನ್ಯಾಸ, ತಾಂತ್ರಿಕ ವೈಶಿಷ್ಟ್ಯಕ್ಕಿಂತಲೂ ಎಂಜಿ ಹೆಕ್ಟರ್ ಇಸಿಮ್ ಸಹಿತ ಮಾರುಕಟ್ಟೆ ಪ್ರವೇಶಿಸುತ್ತಿದೆ. ಎಂಜಿ ಮಾರ್ವೆಲ್ ಎಕ್ಸ್ ಹೆಸರಿನಲ್ಲಿ ಸಂಪೂರ್ಣ ಎಲೆಕ್ಟ್ರಿಕ್ ಎಸ್‌ಯುವಿ ಕೂಡ ದೇಶದಲ್ಲಿ ಬಿಡುಗಡೆಯಾಗಲಿದೆ.

ಮಾರ್ವೆಲ್ ಎಕ್ಸ್ ಮತ್ತು ಹೆಕ್ಟರ್‌ನಲ್ಲಿ ಎಂಬೆಡೆಡ್ ಸಿಮ್ ಮೂಲಕ ಸ್ಮಾರ್ಟ್‌ಫೋನ್‌ನಲ್ಲಿ ಲಭ್ಯವಿರುವಂತೆ ಎಲ್ಲ ಮಾದರಿಯ ಆಯ್ಕೆಗಳನ್ನು ಕೂಡ ಕಾರಿನಲ್ಲಿಯೇ ಬಳಸುವ ಅವಕಾಶ ದೊರೆಯುತ್ತದೆ.


ನ್ಯಾವಿಗೇಷನ್, ಆ್ಯಪ್ಸ್, ಮಲ್ಟಿಮೀಡಿಯಾ ಮತ್ತು ಇತರ ಕೆಲಸಗಳನ್ನು ಸ್ಮಾರ್ಟ್‌ಫೋನ್‌ನಂತೆಯೇ ಸುಲಭವಾಗಿ ಬಳಸಬಹುದಾಗಿದ್ದು, IPv6 ರೆಡಿ ಮತ್ತು OTA ಸಹಿತ ಸಂಪರ್ಕ ವ್ಯವಸ್ಥೆಯಿದೆ. ಇದರಿಂದ ಕಾರಿನ ತಾಂತ್ರಿಕ ವಿವರ, ಕ್ಷಮತೆ ಕುರಿತು ನೇರವಾಗಿ ಚಾಲಕನಿಗೆ ಮಾಹಿತಿ ದೊರೆಯುತ್ತದೆ.

OTA ಮೊಬಿಲಿಟಿ ಟೆಸ್ಲಾ ಕಾರುಗಳಲ್ಲಿ ದೊರೆಯುತ್ತದೆ. ಮೋರಿಸ್ ಗ್ಯಾರೇಜ್ ತನ್ನದೇ ಆದ ಆಪರೇಟಿಂಗ್ ವ್ಯವಸ್ಥೆ ಪರಿಚಯಿಸಲಿದ್ದು, ಆ್ಯಪಲ್ ಮತ್ತು ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್‌ಗಳಿಗೆ ಪ್ರತ್ಯೇಕ ಆ್ಯಪ್ ಹೊರತರಲಿದೆ. ಭವಿಷ್ಯದ ತಂತ್ರಜ್ಞಾನವನ್ನು ಹೊಂದಿರುವ ಕಾರುಗಳಿಗೆ ಭಾರತದಲ್ಲಿ ಬೇಡಿಕೆ ಇದ್ದು, ಮೋರಿಸ್‌ ಗ್ಯಾರೇಜ್ ಈ ನಿಟ್ಟಿನಲ್ಲಿ ಪ್ರಯಾಣ ಬೆಳೆಸಿದೆ.