ರಸ್ತೆಗಿಳಿಯುತ್ತಿದೆ ಅಂಬಾಸಿಡರ್ ಎಲೆಕ್ಟ್ರಿಕ್ ಎಸ್‌ಯುವಿ

ಹೊಸದಿಲ್ಲಿ: ದೇಶದಲ್ಲಿ ಒಂದು ಕಾಲದಲ್ಲಿ ಭಾರಿ ಜನಪ್ರಿಯತೆ ಗಳಿಸಿದ್ದ ಅಂಬಾಸಿಡರ್‌ ಕಾರು 2022ರಲ್ಲಿ ಎಲೆಕ್ಟ್ರಿಕ್‌ ಎಸ್‌ಯುವಿ ಅವತಾರದಲ್ಲಿ ರಸ್ತೆಗಿಳಿಯುವ ಸಾಧ್ಯತೆ ಇದೆ!

ಫ್ರಾನ್ಸ್‌ ಮೂಲದ ಪಿಎಸ್‌ಎ ಗ್ರೂಪ್‌ನ ಅಧೀನ ಸಂಸ್ಥೆಯಾದ ಎಲೆಕ್ಟ್ರಿಕ್‌ ಕಾರು ಕಂಪನಿ ಸಿಟ್ರೋನ್‌, ಭಾರತೀಯ ಮಾರುಕಟ್ಟೆಗೆ ಮರು ಪ್ರವೇಶಿಸಲು ಯತ್ನಿಸುತ್ತಿದೆ. ಈ ಬಾರಿ ಅಂಬಾಸಿಡರ್‌ ಬ್ರ್ಯಾಂಡ್‌ ಅನ್ನು ಮತ್ತೆ ಬಿಡುಗಡೆಗೊಳಿಸಲು ಮುಂದಾಗಿದೆ.

ತಮಿಳುನಾಡಿನ ಹೊಸೂರಿನಲ್ಲಿರುವ ಘಟಕದಲ್ಲಿ ಸಿಟ್ರೋನ್‌ ಹೂಡಿಕೆ ಮಾಡಲಿದೆ. ಭಾರತದಲ್ಲಿ ಸಿಕೆ ಬಿರ್ಲಾ ಗ್ರೂಪ್‌ನಿಂದ 80 ಕೋಟಿ ರೂ.ಗೆ ಅಂಬಾಸಿಡರ್‌ ಬ್ರ್ಯಾಂಡ್‌ ಅನ್ನು ಸಿಟ್ರೋನ್‌ ಖರೀದಿಸಿತ್ತು. ಇದೀಗ ಕಂಪನಿಯು ಅಂಬಾಸಿಡರ್‌ ಕಾರನ್ನು ಎಲೆಕ್ಟ್ರಿಕ್‌ ಎಸ್‌ಯುವಿಯಾಗಿ ಪರಿವರ್ತಿಸಲು ಮುಂದಾಗಿದೆ.

ಪ್ರಸ್ತುತ ಸಿಟ್ರೋನ್ ಅಭಿವೃದ್ಧಿಪಡಿಸಿರುವ ಏರ್‌ಕ್ರಾಸ್‌ ಎಸ್‌ಯುವಿಯನ್ನು ದೇಶದ ವಿವಿಧೆಡೆ ಪರೀಕ್ಷಾರ್ಥ ಚಾಲನೆ ಮೂಲಕ ಪರಿಶೀಲಿಸುತ್ತಿದೆ.
ಅದರ ಜತೆಗೇ ಅಂಬಾಸಿಡರ್‌ ಬ್ರ್ಯಾಂಡ್ ಕೂಡ ಜನಪ್ರಿಯತೆ ಗಳಿಸಿದ್ದು, ಅದೇ ಹೆಸರಿನಲ್ಲಿ ಆಕರ್ಷಕ ಎಲೆಕ್ಟ್ರಿಕ್ ಎಸ್‌ಯುವಿ ಬಿಡುಗಡೆ ಮಾಡಿ ಭಾರತದ ಕಾರುಮಾರುಕಟ್ಟೆಯಲ್ಲಿ ಧೂಳೆಬ್ಬಿಸಲಿದೆ.

ಅದರೊಂದಿಗೆ ಪ್ರೀಮಿಯರ್‌ ಅಟೋಮೊಬೈಲ್ ಲಿ. ಪ್ಯುಗೆಟ್ 309 ಸೆಡಾನ್ ಕಾರನ್ನು ಮಾರಾಟ ಮಾಡಲಿದೆ.