ಮಾರುತಿ ಜನಪ್ರಿಯ ರಿಟ್ಜ್ ಕಾರಿಗೆ ಬಿತ್ತು ಬ್ರೇಕ್

ಹೊಸದಿಲ್ಲಿ: ದೇಶದ ಅತಿ ದೊಡ್ಡ ಪ್ರಯಾಣಿಕ ಕಾರು ಸಂಸ್ಥೆ ಮಾರುತಿ ಸುಜುಕಿ, ತನ್ನ ಜನಪ್ರಿಯ ರಿಟ್ಜ್ ಹ್ಯಾಚ್‌ಬ್ಯಾಕ್ ಮಾರಾಟಕ್ಕೆ ಬ್ರೇಕ್ ಹಾಕಿದೆ. ದೇಶೀಯ ಹಾಗೂ ಅಂತರಾಷ್ಟ್ರೀಯ ಮಾರುಕಟ್ಟೆಯಿಂದ ರಿಟ್ಜ್ ಮಾರಾಟವನ್ನು ಸ್ಥಗಿತಗೊಳಿಸಲಾಗಿದೆ.

2009ನೇ ಇಸವಿಯಲ್ಲಿ ಮೊದಲ ಬಾರಿಗೆ ಬಿಡುಗಡೆಗೊಂಡಿರುವ ರಿಟ್ಜ್ ಪೆಟ್ರೋಲ್ ಹಾಗೂ ಡೀಸೆಲ್ ಆವೃತ್ತಿಗಳು ಒಟ್ಟು ನಾಲ್ಕು ಲಕ್ಷಕ್ಕೂ ಹೆಚ್ಚು ಯುನಿಟ್ ಮಾರಾಟವನ್ನು ಕಂಡಿದೆ.

ಆದರೆ ಬರ ಬರುತ್ತಾ ರಿಟ್ಜ್ ಮಾರಾಟ ಕುಸಿತವನ್ನು ಕಂಡಿತ್ತು. ಇದೀಗ ಆಧುನಿಕ ಕಾರುಗಳಿಗೆ ಹೆಚ್ಚಿನ ಆದ್ಯತೆ ಕೊಡುವ ಹಾಗೂ ತನ್ನ ಶ್ರೇಣಿಯ ಕಾರುಗಳಿಗೆ ತಾಜಾತನ ನೀಡುವ ನಿಟ್ಟಿನಲ್ಲಿ ರಿಟ್ಜ್ ಮಾರಾಟವನ್ನು ನಿಲುಗಡೆಗೊಳಿಸಲಾಗುತ್ತಿದೆ ಎಂದು ಮಾರುತಿ ವಕ್ತಾರ ತಿಳಿಸಿದ್ದಾರೆ.

ಮಾರುತಿ ರಿಟ್ಜ್ ನಿರ್ಮಾಣ ಹಾಗೂ ಮಾರಾಟ ಸ್ಥಗಿತಗೊಳಿಸಲಾಗುವುದಾದರೂ ಮುಂದಿನ 10 ವರ್ಷಗಳಿಗೆ ಬಿಡಿಭಾಗಗಳು ಲಭ್ಯತೆ ಸಿಗಲಿದೆ ಎಂಬುದನ್ನು ಮಾರುತಿ ಖಚಿತಪಡಿಸಿದೆ.

ಹೊಸತಾಗಿ ಬಿಡುಗಡೆಯಾಗಿರುವ ಇಗ್ನಿಸ್, ಸೆಲೆರಿಯೊ, ಬಲೆನೊ, ಸಿಯಾಝ್, ಬ್ರಿಝಾ ಜೊತೆಗೆ ಸ್ವಿಫ್ಟ್ ಹಾಗೂ ಆಲ್ಟೊ ಮಾದರಿಗಳು ಹೆಚ್ಚಿನ ಮಾರಾಟವನ್ನು ಗಿಟ್ಟಿಸಿಕೊಳ್ಳುತ್ತಿದೆ. ಸಂಸ್ಥೆಯು ಇತ್ತೀಚೆಗಷ್ಟೇ ಕಳಪೆ ಬೇಡಿಕೆಯ ಹಿನ್ನಲೆಯಲ್ಲಿ ಪ್ರೀಮಿಯಂ ಕ್ರಾಸೋವರ್ ಎಸ್-ಕ್ರಾಸ್ ಮಾರಾಟವನ್ನು ಹಿಂಪಡದಿತ್ತು.