ಒಂದೇ ತಿಂಗಳಲ್ಲಿ 38,500 ಬುಕ್ಕಿಂಗ್ ಸ್ವೀಕರಿಸಿದ ನೂತನ ಸ್ಯಾಂಟ್ರೋ

ಹೊಸದಿಲ್ಲಿ: ಬಿಡುಗಡೆಗೊಂಡ ಕೇವಲ ಒಂದು ತಿಂಗಳ ಅವಧಿಯಲ್ಲಿ ಹ್ಯುಂಡೈ ಸ್ಯಾಂಟ್ರೋ ದಾಖಲೆ ಪ್ರಮಾಣದಲ್ಲಿ ಬುಕ್ಕಿಂಗ್ ಸ್ವೀಕರಿಸಿದ್ದು, ಇಲ್ಲಿಯವರೆಗೂ ಸುಮಾರು 38,500ಕ್ಕೂ ಅಧಿಕ ಮುಂಗಡ ಬುಕ್ಕಿಂಗ್ ಹರಿದುಬಂದಿದೆ.

ಈಗಾಗಲೇ ಮುಂಗಡ ಬುಕ್ಕಿಂಗ್ ಮಾಡಿಕೊಂಡವರ ಪೈಕಿ ಶೇ30ರಷ್ಟು ಎಎಂಟಿ (ಆಟೋಮ್ಯಾಟಿಕ್ ಮ್ಯಾನ್ಯುವಲ್ ಟ್ರಾನ್ಸ್‌ಮಿಷನ್) ಹಾಗೂ ಶೇ.18ರಷ್ಟು ಗ್ರಾಹಕರು ಸಿಎನ್‌ಜಿ ಆವೃತ್ತಿಯನ್ನು ಬುಕ್ ಮಾಡಿದ್ದಾರೆಂದು ಹುಂಡೈ ಮೋಟರ್ಸ್ ಇಂಡಿಯಾ ತಿಳಿಸಿದೆ.

ಭಾರತದಲ್ಲಿ ಹುಂಡೈ ಬ್ರಾಂಡ್‌ನ ಕಾರುಗಳು ಜನಪ್ರಿಯವಾಗಿದ್ದು, ಕಾರು ಪ್ರಿಯರು ಸಕಾರಾತ್ಮಕ ಪ್ರತಿಕ್ರಿಯೆ ನೀಡಿದ್ದಾರೆ ಎಂದು ಹುಂಡೈ ಮೋಟರ್ ಇಂಡಿಯಾ ಲಿಮಿಟೆಡ್‌ನ ಎಂಡಿ ಹಾಗೂ ಸಿಇಒ ವಾಯ್.ಕೆ.ಕೂ ಪ್ರಕಟನೆಯಲ್ಲಿ ತಿಳಿಸಿದ್ದಾರೆ.

ಪ್ರಸಕ್ತ ಸಾಲಿನ ಅಕ್ಟೋಬರ್ 23ರಂದು ಜನಪ್ರಿಯ ಸ್ಯಾಂಟ್ರೊ ಕಾರನ್ನು ಹೊಸ ವಿನ್ಯಾಸದೊಂದಿಗೆ ಮಾರುಕಟ್ಟೆಗೆ ಪರಿಚಯಿಸಲಾಗಿತ್ತು. ಜಾಗತಿಕವಾಗಿ ಇಲ್ಲಿಯವರೆಗೂ 18.6 ಲಕ್ಷ ಸ್ಯಾಂಟ್ರೋ ಆವೃತ್ತಿಗಳು ಮಾರಾಟವಾಗಿವೆ.