5 ಕೋಟಿ ಬೆಲೆಬಾಳುವ ಚಪ್ಪಟೆ ಸುಂದರಿ ಲಂಬೋ ಎಂಟ್ರಿ

ಹೊಸದಿಲ್ಲಿ: ಇಟಲಿಯ ಐಕಾನಿಕ್ ಸೂಪರ್ ಕಾರು ಸಂಸ್ಥೆ ಲಂಬೋರ್ಗಿನಿ, ಅನಿ ನೂತನ ಎರಡು ಸೀಟುಗಳ ಅವೆಂಟಡಾರ್ ಎಸ್ ಕಾರನ್ನು ಬಿಡುಗಡೆಗೊಳಿಸಿದೆ. ಇದರ ದೆಹಲಿ ಎಕ್ಸ್ ಶೋ ರೂಂ ಬೆಲೆ 5.01 ಕೋಟಿ ರೂ.ಗಳಾಗಿವೆ.

ಕಳೆದ ತಿಂಗಳಲ್ಲಿ ಹ್ಯುರಕನ್ ಆರ್‌ಡಬ್ಲ್ಯುಡಿ ಸ್ಪೈಡರ್ ಬಿಡುಗಡೆಗೊಳಿಸಿದ್ದ ಲಂಬೋರ್ಗಿನಿ ಪ್ರಸಕ್ತ ಸಾಲಿನಲ್ಲಿ ಬಿಡುಗಡೆ ಮಾಡುತ್ತಿರುವ ಎರಡನೇ ಮಾದರಿ ಇದಾಗಿದೆ. ಇದು ಸ್ಟಾಂಡರ್ಡ್ ಅವೆಂಟಡಾರ್‌ಗಿಂತಲೂ ಹೆಚ್ಚಿನ ವೈಶಿಷ್ಟ್ಯಗಳನ್ನು ಗಿಟ್ಟಿಸಿಕೊಳ್ಳಲಿದೆ.

ಎರಡು ಸೀಟು ಸಂಯೋಜನೆಯ ಈ ಕೂಪೆ ಕಾರಿನಡಿಯಲ್ಲಿ ಅತ್ಯಂತ ಶಕ್ತಿಶಾಲಿ 6.5 ಲೀಟರ್ ನೈಸರ್ಗಿಕ ಚೋಷಿತ ವಿ12 ಎಂಜಿನ್ ಜೋಡಣೆ ಮಡಲಾಗಿದೆ. ಇದು 690 ಎನ್‌ಎಂ ತಿರುಗುಬಲದಲ್ಲಿ ಬರೋಬ್ಬರಿ 740 ಅಶ್ವಶಕ್ತಿ ಉತ್ಪಾದಿಸಲಿದೆ. ಹಾಗೆಯೇ ವಿದ್ಯುನ್ಮಾನವಾಗಿ ನಿಯಂತ್ರಿಸಬಹುದಾದ ಆಲ್ ವೀಲ್ ಡ್ರೈವ್ ಸಿಸ್ಟಂ ಹಾಗೂ ಸೆವನ್ ಸ್ಪೀಡ್ ಐಎಸ್‌ಆರ್ (Independent Shifting Rods) ಗೇರ್ ಬಾಕ್ಸ್ ಪ್ರಮುಖ ಆಕರ್ಷಣೆಯಾಗಿದೆ.

ಸಂಸ್ಥೆಯೇ ಹೇಳುವ ಪ್ರಕಾರ ಲಂಬೋರ್ಗಿನಿ ಅವೆಂಟಡಾರ್ ಎಸ್ ಕೇವಲ 2.9 ಸೆಕೆಂಡುಗಳಲ್ಲಿ ಗಂಟೆಗೆ 0-100 ಕೀ.ಮೀ. ವೇಗವರ್ಧಿಸಲು ಹಾಗೂ ಗಂಟೆಗೆ ಗರಿಷ್ಠ 350 ಕೀ.ಮೀ. ವೇಗದಲ್ಲಿ ಸಂಚರಿಸಲಿದೆ.

ಫೋರ್ ವೀಲ್ ಸ್ಟೀರ್ ತಂತ್ರಜ್ಞಾನವನ್ನು ಹೊಂದಿರುವ ಮೊದಲ ಲಂಬೋರ್ಗಿನಿ ಮಾದರಿ ಇದಾಗಿದ್ದು, ಅತ್ಯಧಿಕ ವೇಗದಲ್ಲೂ ತಿರುವಿನಲ್ಲೂ ಸ್ಥಿರತೆಯನ್ನು ಕಾಪಾಡಿಕೊಳ್ಳಲಿದೆ.

ಏತನ್ಮಧ್ಯೆ ಲಂಬೋ ಸ್ಟ್ಯಾಂಡರ್ಡ್ ಮಾದರಿಯು ಮೂರು ಚಾಲನಾ ವಿಧಗಳನ್ನು ಗಿಟ್ಟಿಸಿಕೊಂಡರೆ (ಸ್ಟ್ರಾಡಾ, ಸ್ಪೋರ್ಟ್, ಕೋರ್ಸಾ) ನೂತನ ಅವೆಂಟಡೊರ್ ಎಸ್ ಮಾದರಿಯಲ್ಲಿ ನಾಲ್ಕು ಚಾಲನಾ ವಿಧಗಳಿರಲಿದೆ. ಈ ಮೂರು ಹೊರತುಪಡಿಸಿ ಇಗೊ ಎಂಬ ಹೆಚ್ಚುವರಿ ಚಾಲನಾ ವಿಧ ಜೋಡಣೆಯಾಗಿದೆ.

ಭಾರತದಲ್ಲಿ ಪ್ರಮುಖವಾಗಿಯೂ ಫೆರಾರಿ ಎಫ್12ಬರ್ಲಿನೆಟ್ಟಾ ಹಾಗೂ ಆಸ್ಟನ್ ಮಾರ್ಟಿನ್ ವಾಂಗ್ವಿಷ್ ಸವಾಲನ್ನು ನೂತನ ಲಂಬೋ ಅವೆಂಟಡಾರ್ ಎಸ್ ಮಾದರಿಯು ಎದುರಿಸಲಿದೆ.