ದಾಖಲೆಯ 2 ಕೋಟಿ ಕಾರುಗಳನ್ನು ಉತ್ಪಾದಿಸಿದ ಮಾರುತಿ ಸುಜುಕಿ

ಹೊಸದಿಲ್ಲಿ: ದೇಶದ ಶೇ.50ರಷ್ಟು ಮಾರುಕಟ್ಟೆಯನ್ನು ಹೊಂದಿರುವ ಮಾರುತಿ ಸುಜುಕಿ ಭಾರತದಲ್ಲಿ 2 ಕೋಟಿ ಕಾರು ಉತ್ಪಾದಿಸುವ ಮೂಲಕ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ.

ಕೇವಲ 34.5 ವರ್ಷದಲ್ಲಿ ಮಾರುತಿ ಸುಜುಕಿ ಈ ಸಾಧನೆ ಮಾಡಿದ್ದು, ಈ ಹಿಂದಿದ್ದ ಜಪಾನ್‌ನ ದಾಖಲೆಯನ್ನು ಹಿಂದಿಕ್ಕಿದೆ.
ಸಂಸ್ಥೆಯ ನೂತನ ಮಾರುತಿ ಸುಜುಕಿ ಸ್ವಿಫ್ಟ್‌ ಐಕಾನಿಕ್‌ ಶೇಡ್‌ ಬ್ರೈಟ್‌ ರೆಡ್‌ ಕಾರನ್ನು ಗುಜರಾತ್‌ನ ಘಟಕದಲ್ಲಿ ತಯಾರಿಸುವ ಮೂಲಕ ಹೊಸ ದಾಖಲೆ ಬರೆಯಲಾಗಿದೆ.

2 ಕೋಟಿ ಕಾರುಗಳ ಪೈಕಿ 31.7 ಲಕ್ಷ ಆಲ್ಟೊ ಕಾರುಗಳನ್ನು ಉತ್ಪಾದಿಸಿ, ಅತ್ಯಧಿಕ ಉತ್ಪಾದನೆಯಾದ ಕಾರೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇದಲ್ಲದೆ 1983ರಿಂದ 2007ರ ವರೆಗೆ 29.1 ಲಕ್ಷದಷ್ಟು ಮಾರುತಿ 800 ಕಾರುಗಳನ್ನು ಉತ್ಪಾದಿಸಲಾಗಿದೆ. 19.4 ಲಕ್ಷ ಓಮ್ನಿ ಕಾರಗಳನ್ನು ಉತ್ಪಾದಿಸಲಾಗಿದ್ದು, ಇಂದಿಗೂ ಬೇಡಿಕೆಯ ಪಟ್ಟಿಯಲ್ಲಿ ಮಾರುತಿ ಓಮ್ನಿ ಸ್ಥಾನಪಡೆದುಕೊಂಡಿದೆ.

ಅಂತೆಯೇ ಮಾರುಕಟ್ಟೆಗೆ ಬಿಡುಗಡೆಗೊಂಡ ಅಲ್ಪ ಸಮಯದಲ್ಲಿ ಸ್ವಿಫ್ಟ್‌ ಕಾರುಗಳೂ 19.4 ಲಕ್ಷ ಉತ್ಪಾದನೆಯನ್ನು ಕಂಡಿದೆ. ಇದಲ್ಲದೆ ಡಿಸೈರ್‌, ಬಲೆನೋ, ವಿಟಾರಾ ಬ್ರಿಜಾಗಳು ಅತ್ಯುತ್ತಮ ಮಾರುಕಟ್ಟೆಯನ್ನು ಸಾಧಿಸುತ್ತಿವೆ ಎಂದು ಸಂಸ್ಥೆ ಹೇಳಿದೆ.

ಸಂಸ್ಥೆಯು 1994ರ ಮೇಯಲ್ಲಿ 10 ಲಕ್ಷ, 2005ರಲ್ಲಿ 50 ಲಕ್ಷ ಹಾಗೂ 2011 ಮಾರ್ಚ್‌ನಲ್ಲಿ 1 ಕೋಟಿ ಕಾರುಗಳನ್ನು ಉತ್ಪಾದಿಸಿ ದಾಖಲೆ ನಿರ್ಮಿಸಿತ್ತು. 2015ರಲ್ಲಿ ಸಂಸ್ಥೆ 1.5ಕೋಟಿ ಕಾರುಗಳನ್ನು ಉತ್ಪಾದಿಸಿದರೆ, ಬಳಿಕದ 3 ವರ್ಷಗಳಲ್ಲಿ ಅತಿ ಹೆಚ್ಚು ಉತ್ಪಾದನೆ ಮಾಡುವ ಮೂಲಕ 2 ಕೋಟಿಯ ಗುರಿಯನ್ನು ಮುಟ್ಟಿದೆ.