Mahindra Thar Next Gen: ಮಹೀಂದ್ರಾ ಥಾರ್‌ ಪರೀಕ್ಷೆ

ಮಹೀಂದ್ರಾದ ಜನಪ್ರಿಯ ಥಾರ್‌ ಮುಂದಿನ ಪೀಳಿಗೆಯ ಜೀಪ್ ಬಿಡುಗಡೆಗೆ ಸಜ್ಜಾಗುತ್ತಿದ್ದು, ಮುಂಭಾಗದಲ್ಲಿ ಎರಡು ಏರ್‌ಬ್ಯಾಗ್, ಎಬಿಎಸ್‌, ಸೀಟ್ ಬೆಲ್ಟ್ ರಿಮೈಂಡರ್‌, ರಿವರ್ಸ್ ಪಾರ್ಕಿಂಗ್ ಅಸಿಸ್ಟ್‌ನಂತಹ ಗರಿಷ್ಠ ಮತ್ತು ನೂತನ ಭದ್ರತಾ, ಸುರಕ್ಷತಾ ವೈಶಿಷ್ಟ್ಯಗಳನ್ನು ಅಳವಡಿಸಿಕೊಳ್ಳಲಿದೆ.

ಮುಂದಿನ ಪೀಳಿಗೆಯ ಮಹೀಂದ್ರಾ ಥಾರ್‌ನ ಎರಡನೇ ರೋಡ್‌ ಟೆಸ್ಟ್‌ ಮಾಡಲಾಗಿದೆ. 2020ರಲ್ಲಿ ಲಾಂಚ್‌ ಆಗುವ ನಿರೀಕ್ಷೆಯಿರುವ ಇದು ಭಾರತ್‌ ಸ್ಟೇಜ್‌-6 (ಬಿಎಸ್‌-6)ನ ಎಲ್ಲಾ ನಿಯಮಗಳನ್ನು ಅಳವಡಿಸಿಕೊಳ್ಳಲಿದೆ. ಮಾಲಿನ್ಯ ನಿಯಂತ್ರಣ ಮತ್ತು ಸುರಕ್ಷತೆಯ ಕುರಿತ ಬಿಎಸ್‌-6 ನಿಯಮಗಳ ಪಾಲನೆಗಾಗಿ ಯಾಂತ್ರಿಕ ಬದಲಾವಣೆಗಳನ್ನು ಇದರಲ್ಲಿ ಮಾಡಲಾಗಿದೆ ಎಂದು ತಿಳಿದು ಬಂದಿದೆ.

ಸದ್ಯ ಉತ್ಪಾದನೆಯ ಮಾದರಿಯಷ್ಟೇ ಕಂಡು ಬಂದಿರುವುದರಿಂದ ಹೆಚ್ಚಿನ ವಿವರಗಳು ಲಭ್ಯವಾಗಿಲ್ಲ. ಆದರೂ ವಿಲ್ಲೀ ಸಿಜೆ-5ನಿಂದ ವಿನ್ಯಾಸವು ಪ್ರೇರಿತವಾಗಿರುವುದು ಮೇಲ್ನೋಟಕ್ಕೆ ಕಂಡು ಬರುತ್ತಿದೆ. ಮುಂಭಾಗ ಮಾತ್ರ ಈಗಿನ ಜೀಪ್‌ ರಾಂಗ್ಲರ್‌ ರೀತಿಯಲ್ಲೇ ಕಂಡು ಬರುತ್ತಿದ್ದು, ಏಳು ಸ್ಲಾಟ್‌ ಗ್ರಿಲ್‌, ರೌಂಡ್‌ ಫಾಗ್‌ ಲ್ಯಾಂಪ್‌ಗಳನ್ನು ಹೊಂದಿದೆ.

ಉತ್ಪಾದನೆಯ ಹಂತದಲ್ಲಿರುವುದರಿಂದ ಇಂಡಿಕೇಟರ್‌ಗಳ ವಿನ್ಯಾಸ ತಿಳಿದು ಬಂದಿಲ್ಲ. ಮುಂದಿನ ಹಂತದಲ್ಲಿ ಇದನ್ನು ಸಂಸ್ಥೆ ಅಳವಡಿಸಬಹುದು ಎಂದು ಹೇಳಲಾಗಿದೆ. ಇನ್ನು ಒಟ್ಟಾರೆಯಾಗಿ ಹೇಳುವುದಾದರೆ ಹಳೆಯ ಥಾರ್‌ಗಿಂತ ಇದು ಇನ್ನಷ್ಟು ದೊಡ್ಡದಾಗಿರುವಂತೆ ಕಂಡು ಬರುತ್ತಿದೆ.

ಕಳೆದ ಬಾರಿಯ ಪರೀಕ್ಷೆಯ ಸಂದರ್ಭದಲ್ಲಿ ಕ್ಯಾಬಿನ್‌ನಲ್ಲಿ ಹಲವಾರು ಬದಲಾವಣೆ ಮಾಡಿರುವುದು ಗೊತ್ತಾಗಿತ್ತು. ಕಪ್ಪು ಬಣ್ಣದ ಡ್ಯಾಶ್‌ಬೋರ್ಡ್‌, ಇದರಲ್ಲಿ ಟಚ್‌ಸ್ಕ್ರೀನ್‌ ಡಿಸ್ಪ್ಲೇ ಇತ್ತು. ಮಧ್ಯ ಭಾಗದಲ್ಲಿ ವೃತ್ತಾಕಾರದ ಎಸಿ ಕಿಂಡಿಗಳು ಕೂಡ ಇದ್ದವು. ಅಟೋಮೆಟಿಕ್‌ ಕ್ಲೈಮೇಟ್‌ ಕಂಟ್ರೋಲ್‌ನ್ನು ಇದರಲ್ಲಿ ಅಳವಡಿಸುವ ಸಾಧ್ಯತೆ ಹೆಚ್ಚಿದೆ.

ಇನ್ನು ಹೊಸ ಸ್ಟೇರಿಂಗ್‌ ವೀಲ್‌ ಮತ್ತು ಅದರ್ಲೇ ಆಡಿಯೋ, ದೂರವಾಣಿ ಕರೆ ನಿಯಂತ್ರಣ ಬಟನ್‌ಗಳಿವೆ. ಇದಲ್ಲದೆ ಮಲ್ಟಿ ಇನ್‌ಫಾರ್ಮೇಶನ್‌ ಡಿಸ್‌ಪ್ಲೇ (ಎಂಐಡಿ) ಕೂಡ ಇರಲಿದೆ. 2.2 ಲೀಟರ್‌ ಎಂಹಾಕ್‌ ಎಂಜಿನ್‌ನ್ನು ಇದು ಹೊಂದಿರಲಿದೆ.