ದೇಶದ ರಸ್ತೆಯಲ್ಲಿನ್ನು ಎನ್‌ಫೀಲ್ಡ್‌ ಕ್ಲಾಸಿಕ್‌ ಸದ್ದು..

ಬಹು ನಿರೀಕ್ಷೆಯ ರಾಯಲ್‌ ಎನ್‌ಫೀಲ್ಡ್‌ ಕ್ಲಾಸಿಕ್‌ 350 ಕೊನೆಗೂ ಭಾರತದ ಮಾರುಕಟ್ಟೆ ಪ್ರವೇಶಿಸಿದೆ. ಎಬಿಎಸ್‌ನಿಂದ ಸಜ್ಜಿತವಾಗಿರುವ ಇದರ ಬೆಲೆ 1.53 ಲಕ್ಷ ರೂ.ನಿಂದ ಆರಂಭವಾಗುತ್ತಿದ್ದು, ಎಬಿಎಸ್‌ ರಹಿತ ಆವೃತ್ತಿ 58,000 ರೂ. ಕಡಿಮೆ ಬೆಲೆಗೆ ಸಿಗುತ್ತದೆ.

ಕಂದು ಮತ್ತು ಕೆಂಪು ಬಣ್ಣಗಳಲ್ಲಿ ಇದು ಲಭ್ಯವಾಗುತ್ತಿದ್ದು, ಸದ್ಯಕ್ಕೆ ಹಂತ ಹಂತವಾಗಿ ಪೂರೈಕೆ ಮಾಡುವುದಾಗಿ ಸಂಸ್ಥೆ ತಿಳಿಸಿದೆ. 346 ಸಿಸಿ ಸಿಂಗಲ್‌ ಸಿಲಿಂಡರ್‌ ಏರ್‌ ಕೂಲ್ಡ್‌ ಎಂಜಿನ್‌ ಹೊಂದಿರುವ ಇದು 5,250 ಆರ್‌ಪಿಎಂನಲ್ಲಿ 19.8 ಬಿಎಚ್‌ಪಿ ಶಕ್ತಿ ಉತ್ಪಾದಿಸುತ್ತದೆ.

ಐದು ಸ್ಪೀಡ್‌ ಗೇರ್‌ಗಳನ್ನು ಹೊಂದಿರುವ ಇದು 280 ಮಿ.ಮೀ. ಡಿಸ್ಕ್‌ಬ್ರೇಕ್‌ನ್ನು ಮುಂಭಾಗ ಹಾಗೂ 240 ಮಿ.ಮೀ. ಡಿಸ್ಕ್‌ ಬ್ರೇಕ್‌ನ್ನು ಹಿಂಭಾಗದಲ್ಲಿ ಹೊಂದಿದೆ.

ಟೆಲಿಸ್ಕೋಪಿಕ್‌ ಫೋರ್ಕ್‌ ಮುಂಭಾಗದಲ್ಲಿದ್ದು, ಹಿಂಭಾಗದಲ್ಲಿ ಟ್ವಿನ್‌ ಶಾಕ್‌ ಅಬ್ಸರ್ವರ್‌ ಇದೆ. ಏಪ್ರಿಲ್‌ 1ರಿಂದ ಎಬಿಎಸ್‌ ಕಡ್ಡಾಯಗೊಳಿಸಿ ಸರಕಾರ ನಿಯಮ ಜಾರಿ ಮಾಡಿರುವ ಹಿನ್ನೆಲೆಯಲ್ಲಿ ಅದಕ್ಕೆ ಹೊಂದಿಕೊಳ್ಳುವ ರೀತಿಯಲ್ಲಿ ಬೈಕ್‌ ಸಿದ್ಧವಾಗಿದೆ ಎಂದು ಸಂಸ್ಥೆ ತಿಳಿಸಿದೆ.