ಟಾಟಾ ನೆಕ್ಸನ್‌ಗೆ ವರ್ಷದ ಕಾರು ಪ್ರಶಸ್ತಿ

ಹೊಸದಿಲ್ಲಿ: 10ನೇ ಆವೃತ್ತಿಯ ಟೈಮ್ ಆಟೋ ಪ್ರಶಸ್ತಿಯನ್ನು ಪ್ರಕಟಿಸಲಾಗಿದ್ದು, ದೇಶದ ಅತಿ ದೊಡ ವಾಹನ ಸಂಸ್ಥೆ ಟಾಟಾ ಮೋಟಾರ್ಸ್ ನಿರ್ಮಿತ ನೆಕ್ಸನ್ ಕ್ರೀಡಾ ಬಳಕೆಯ ವಾಹನವನ್ನು ವರ್ಷದ ಕಾರು ಪ್ರಶಸ್ತಿಗೆ ಭಾಜನವಾಗಿದೆ.

ಇವೊ ಇಂಡಿಯಾ ಹಾಗೂ ಫಾಸ್ಟ್ ಬೈಕ್ಸ್ ಇಂಡಿಯಾ ಸಹಯೋಗದಲ್ಲಿ ವರ್ಷದ ಕಾರು ಪ್ರಶಸ್ತಿಗಳನ್ನು ಘೋಷಿಸಲಾಗಿದೆ. ಇದರಂತೆ ನಾಲ್ಕು ಪ್ರಮುಖ ಪ್ರಶಸ್ತಿಗಳನ್ನು ಟಾಟಾ ಮೋಟಾರ್ಸ್ ಬಾಚಿಕೊಂಡಿದೆ.

ಅತ್ಯುತ್ತಮ ವಿನ್ಯಾಸ, ವರ್ಷದ ಕಾಂಪಾಕ್ಟ್ ಎಸ್‌ಯುವಿ, ವರ್ಷದ ಉಪಯಕ್ತ/ಬಹು ಬಳಕೆಯ ವಾಹನ ಮತ್ತು ವರ್ಷದ ಕಾರು ಪ್ರಶಸ್ತಿಗಳಿಗೆ ಟಾಟಾ ಮೋಟಾರ್ಸ್ ಅರ್ಹವಾಗಿದೆ.

ಇಲ್ಲಿ ನಿಕಟ ಪ್ರತಿಸ್ಪರ್ಧಿ ಜೀಪ್ ಕಾಂಪಾಸ್ ಹಿಂದಿಕ್ಕಿರುವ ಟಾಟಾ ನೆಕ್ಸನ್ ಪ್ರಶಸ್ತಿ ಬಾಚಿಕೊಂಡಿದೆ.

ಇನ್ನುಳಿದಂತೆ ಮಾರುತಿ ಸುಜುಕಿ ಇಗ್ನಿಸ್ ವರ್ಷದ ಹ್ಯಾಚ್‌ಬ್ಯಾಕ್, ಡಿಜೈರ್ ವರ್ಷದ ಕಾಂಪಾಕ್ಟ್ ಸೆಡಾನ್ ಪ್ರಶಸ್ತಿಗಳಿಗೆ ಅರ್ಹವಾಗಿದೆ. ಹಾಗೆಯೇ ವರ್ಷದ ಅತ್ಯುತ್ತಮ ತಯಾರಕಾ ಸಂಸ್ಥೆ ಪ್ರಶಸ್ತಿಗೂ ಮಾರುತಿ ಭಾಜನವಾಗಿದೆ.

ವರ್ಷದ ಐಷಾರಾಮಿ ಕಾರು ತಯಾರಿಕಾ ಪ್ರಶಸ್ತಿಗೆ ಮರ್ಸಿಡಿಸ್ ಬೆಂಝ್ ಹಾಗೂ ಸಂಸ್ಥೆಯ ಇ-ಕ್ಲಾಸ್ ಸೆಡಾನ್ ವರ್ಷದ ಐಷಾರಾಮಿ ಕಾರು ಪ್ರಶಸ್ತಿಗಳನ್ನು ಗೆದ್ದುಕೊಂಡಿದೆ. ಹಾಗೆಯೇ ಪ್ರೀಮಿಯಂ ಸೆಡಾನ್ ಪ್ರಶಸ್ತಿ ಹ್ಯುಂಡೈ ವೆರ್ನಾ ಪಾಲಾಗಿದೆ.

ದ್ವಿಚಕ್ರ ವಾಹನ ವಿಭಾಗದಲ್ಲಿ ವರ್ಷದ ಬೈಕ್ ಪ್ರಶಸ್ತಿಗೆ ಕೆಟಿಎಂ 390 ಡ್ಯೂಕ್ ಅರ್ಹವಾಗಿದೆ. ಹಾಗೆಯೇ ವರ್ಷದ ತಯಾರಿಕಾ ಪ್ರಶಸ್ತಿಗೆ ಟಿವಿಎಸ್ ಮೋಟಾರ್ ಹಾಗೆಯೇ ವರ್ಷದ ಸ್ಪೋರ್ಟ್ಸ್ ನೆಕ್ಡ್ ವಿಭಾಗದಲ್ಲಿ ಟ್ರಯಂಫ್ ಸ್ಟ್ರೀಪ್ ಟ್ರಿಪಲ್ ಆರ್‌ಎಸ್ ಪ್ರಶಸ್ತಿಗಳನ್ನು ಗೆದ್ದಿವೆ.