ಟಾಟಾ ಮೋಟಾರ್ಸ್‌ ಡೀಸೆಲ್‌ ಎಂಜಿನ್‌ ಚಿಕ್ಕ ಕಾರ್‌ ಸ್ಥಗಿತ?

ಹೊಸದಿಲ್ಲಿ: ವಾಹನಗಳಿಂದ ಆಗುವ ವಾಯು ಮಾಲಿನ್ಯ ನಿಗ್ರಹಿಸುವಂಥ ಬಿಎಸ್‌-6 ನಿಯಮಗಳು ಮುಂದಿನ ವರ್ಷದ ಏ.1ರಿಂದ ಜಾರಿಗೆ ಬರಲಿದ್ದು, ಈ ಹಿನ್ನೆಲೆಯಲ್ಲಿ ಟಾಟಾ ಮೋಟಾರ್ಸ್‌ ತನ್ನ ಸಣ್ಣ ಡೀಸೆಲ್‌ ಕಾರ್‌ಗಳ ವಹಿವಾಟು ಸ್ಥಗಿತಗೊಳಿಸುವ ಸಾಧ್ಯತೆ ಇದೆ ಎಂದು ಕಂಪನಿಯ ಹಿರಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಈಗಾಗಲೇ ವಾಹನ ಮಾರುಕಟ್ಟೆಯಲ್ಲಿ ಮುಂಚೂಣಿಯಲ್ಲಿರುವ ಮಾರುತಿ ಸುಜುಕಿ ಇಂಡಿಯಾ(ಎಂಎಸ್‌ಐ), ತನ್ನ ಡೀಸೆಲ್‌ ಕಾರ್‌ಗಳ ಮಾರಾಟವನ್ನು 2020ರ ಏ.1ರಿಂದ ಸ್ಥಗಿತಗೊಳಿಸುವುದಾಗಿ ಪ್ರಕಟಿಸಿದೆ.

ಬಿಎಸ್‌-6 ನಿಯಮಗಳನ್ವಯ ಸಣ್ಣ ಡೀಸೆಲ್‌ ಕಾರುಗಳನ್ನು ಉತ್ಪಾದಿಸಿದರೆ ವೆಚ್ಚ ಏರಿಕೆಯಾಗಲಿದ್ದು, ಸಣ್ಣ ಕಾರುಗಳನ್ನು ಬಯಸುವ ಗ್ರಾಹಕರನ್ನು ತಲುಪುವುದು ಕಷ್ಟವಾಗುತ್ತದೆ. ಹೀಗಾಗಿ, ಸಣ್ಣ ಗಾತ್ರದ ಡೀಸೆಲ್‌ ಕಾರ್‌ಗಳ ಉತ್ಪಾದನೆ ಸ್ಥಗಿತಗೊಳಿಸಲು ಬಹುತೇಕ ಕಂಪನಿಗಳು ಚಿಂತನೆ ನಡೆಸಿವೆ.

ಟಾಟಾ ಮೋಟಾರ್ಸ್‌ ಎಂಟ್ರಿ ಲೆವೆಲ್‌ ಹ್ಯಾಚ್‌ಬ್ಯಾಕ್‌ ಟಿಯಾಗೊ(1 ಲೀಟರ್‌ ಡೀಸೆಲ್‌ ಎಂಜಿನ್‌), ಕಾಂಪ್ಯಾಕ್ಟ್ ಸೆಡಾನ್‌ ಟೈಗರ್‌, ಹಳೆಯ ಮಾಡೆಲ್‌ಗಳಾದ ಬೋಲ್ಟ್‌ ಮತ್ತು ಜೆಸ್ಟ್‌ಗಳನ್ನು ಹೊಂದಿದೆ. ''ಎಂಟ್ರಿ ಮತ್ತು ಮಧ್ಯಮ ಅವಧಿಯ ಡೀಸೆಲ್‌ ಎಂಜಿನ್‌ ಮಾಡೆಲ್‌ ಕಾರ್‌ಗಳಿಗೆ ಬೇಡಿಕೆ ಕಡಿಮೆಯಾಗಲಿದೆ. ಹೆಚ್ಚಿನ ವೆಚ್ಚ ಭರಿಸಿ ಕಡಿಮೆ ಸಾಮರ್ಥ್ಯ‌ದ ಎಂಜಿನ್‌ ತಯಾರಿಸುವುದರಲ್ಲಿ ಅರ್ಥವಿಲ್ಲ,'' ಎಂದು ಟಾಟಾ ಮೋಟಾರ್ಸ್‌ನ ಪ್ಯಾಸೆಂಜರ್‌ ವೆಹಿಕಲ್‌ ಬ್ಯುಸಿನೆಸ್‌ ವಿಭಾಗದ ಅಧ್ಯಕ್ಷ ಮಾಯಾಂಕ್‌ ಪರೇಕ್‌ ಹೇಳಿದ್ದಾರೆ.