ಬರಲಿದೆ ಟಾಟಾ ನ್ಯಾನೋ ಎಲೆಕ್ಟ್ರಿಕ್ ಕಾರು

ಕೋಲ್ಕತ್ತಾ: ವಿಶ್ವದ ಅತಿ ಅಗ್ಗದ ಕಾರು ಟಾಟಾ ನ್ಯಾನೋ ಹೊಸ ಕ್ರಾಂತಿಯ ಅಲೆಯನ್ನೇ ಎಬ್ಬಿಸಿತ್ತು. ಆದರೆ ಬರಬರುತ್ತಾ ನ್ಯಾನೋ ಜನಪ್ರಿಯತೆ ಕುಂದುತ್ತಾ ಸಾಗಿತ್ತು.

ಪ್ರಸ್ತುತ ರತನ್ ಟಾಟಾ ಕನಸಿನ ಕಾರಾಗಿರುವ ನ್ಯಾನೋ ಪ್ರತಿಷ್ಠೆಯನ್ನು ಉಳಿಸಿಕೊಳ್ಳುವುದೇ ಸಂಸ್ಥೆಯ ಪಾಲಿಗೆ ದೊಡ್ಡ ಸವಾಲಿನ ವಿಷಯವಾಗಿದೆ.

ವರ್ಷಗಳಿಂದಲೂ ಈ ಅತಿ ಚಿಕ್ಕ ಕಾರಿನ ವಿವಿಧ ಮಾದರಿಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದರೂ ಹೆಚ್ಚಿನ ಮಾರಾಟ ಗಿಟ್ಟಿಸಿಕೊಳ್ಳಲು ಸಂಸ್ಥೆಗೆ ಸಾಧ್ಯವಾಗಲಿಲ್ಲ. ಇದರಿಂದ ನ್ಯಾನೋ ಉತ್ಪಾದನೆಯನ್ನು ಸ್ಥಗಿತಗೊಳಿಸಲಿದೆಯೆಂಬ ವರದಿಗಳು ಬಂದಿದ್ದವು.

ಆದರೂ ಟಾಟಾ ಮಾತ್ರ ಹಿಂಜರಿಯುವ ಯಾವುದೇ ಲಕ್ಷ್ಮಣಗಳು ಕಾಣಿಸುತ್ತಿಲ್ಲ. ಬದಲಾಗಿ ಹಿಂದಿಗಿಂತಲೂ ಹೆಚ್ಚು ಬಲವಾದ ನೀತಿಯೊಂದಿಗೆ ಮುಂದೆ ಬರಲು ಯೋಜನೆಯಿರಿಸಿಕೊಂಡಿದೆ.

ನ್ಯಾನೋಗೆ ಬದಲಿ ವ್ಯವಸ್ಥೆ ಹುಡುಕುವುದಾಗಿ ಘೋಷಿಸಿರುವ ಟಾಟಾ ಮೋಟಾರ್ಸ್ ಸಿಒಒ ಸತೀಶ್ ಬಾರ್ವನ್‌ಕಾರ್, ವಿದ್ಯುತ್ ಚಾಲಿತ ಕಾರನ್ನು ಪರಿಚಯಿಸುವ ಬಗ್ಗೆ ಮಾಹಿತಿಯನ್ನು ನೀಡಿದರು.

ಭಾವನಾತ್ಮಕ ನಂಟು ಹೊಂದಿರುವ ನ್ಯಾನೋ ಕಾರು ಪ್ರತಿ ತಿಂಗಳಲ್ಲಿ 1000ದಷ್ಟು ಮಾತ್ರ ಮಾರಾಟವಾಗುತ್ತಿದೆ. ಅತ್ತ ಹೊಸದಾಗಿ ಬಿಡುಗಡೆಯಾಗಿರುವ ಟಾಟಾ ಟಿಯಾಗೊ, ಟಿಗೋರ್ ಹಾಗೂ ನೆಕ್ಸನ್ ಪ್ರಯಾಣಿಕ ಮಾರುಕಟ್ಟೆಯಲ್ಲಿ ಟಾಟಾಗೆ ಮರುಜೀವ ತುಂಬುವ ನಿರೀಕ್ಷೆಯಲ್ಲಿದೆ.