Tesla Modey Y ಎಲೆಕ್ಟ್ರಿಕ್ ಎಸ್‌ಯುವಿ ಅನಾವರಣ

ಸ್ಯಾನ್ ‌ಫ್ರಾನ್ಸಿಸ್ಕೊ: ಅಮೆರಿಕ ಮೂಲದ ಮುಂಚೂಣಿಯ ವಿದ್ಯುತ್ ಚಾಲಿತ ವಾಹನ ತಯಾರಿಕಾ ಸಂಸ್ಥೆ ಟೆಸ್ಲಾ, ಅತಿ ನೂತನ ಮಾಡೆಲ್ ವೈ ಎಲೆಕ್ಟ್ರಿಕ್ ಎಸ್‌ಯುವಿ ಕಾರನ್ನು ಅನಾವರಣಗೊಳಿಸಿದೆ.

ಮಾಡೆಲ್ 3 ತಳಹದಿಯಲ್ಲೇ ನಿರ್ಮಾಣವಾಗಿರುವ ನೂತನ ಟೆಸ್ಲಾ ಮಾಡೆಲ್ ವೈ ಕಾಂಪಾಕ್ಟ್ ಎಸ್‌ಯುವಿ ಎಲೆಕ್ಟ್ರಿಕ್ ಕಾರು 482 ಕೀ.ಮೀ. ವ್ಯಾಪ್ತಿಯ ವರೆಗೂ ಚಲಿಸಬಲ್ಲದು ಎಂದು ಎಲನ್ ಮಸ್ಕ್ ಸ್ಪಷ್ಟಪಡಿಸಿದ್ದಾರೆ.

ಟೆಸ್ಲಾ ಮಾಡೆಲ್ ವೈ ವಿದ್ಯುತ್ ಚಾಲಿತ ಕಾರು 47000 ಅಮೆರಿಕನ್ ಡಾಲರ್‌ಗಳಷ್ಟು (ಅಂದಾಜು 32 ಲಕ್ಷ ರೂ.) ದುಬಾರಿಯೆನಿಸಲಿದೆ. ಹಾಗೆಯೇ 2021ರಲ್ಲಿ ಮಾರುಕಟ್ಟೆ ಪ್ರವೇಶಿಸಲಿರುವ ಸ್ಟಾಂಡರ್ಡ್ ಆವೃತ್ತಿಯು 39000 ಅಮೆರಿಕನ್ ಡಾಲರ್‌ಗಳಷ್ಟು (ಅಂದಾಜು 27 ಲಕ್ಷ ರೂ.)ಬೆಲೆ ಬಾಳಲಿದೆ. ಇದು 230 ಮೈಲು ವ್ಯಾಪ್ತಿಯನ್ನು ನೀಡಲಿದೆ.


ಅಮೆರಿಕ ಹಾಗೂ ಚೀನಾದಲ್ಲಿ ಸಣ್ಣ ಎಸ್‌ಯುವಿ ಕಾರುಗಳಿಗೆ ಹೆಚ್ಚಿನ ಬೇಡಿಕೆಯಿದೆ. ಇದೀಗ ಅನಾವರಣಗೊಂಡಿರುವ ಮಾಡೆಲ್ ವೈ ಎಸ್‌ಯುವಿ, ಫೋಕ್ಸ್‌ವ್ಯಾಗನ್, ಆಡಿ, ಡೈಮ್ಲರ್, ಮರ್ಸಿಡಿಸ್ ಬೆಂಝ್ ಹಾಗೂ ಬಿಎಂಡಬ್ಲ್ಯು ಮುಂತಾದ ಸಂಸ್ಥೆಗಳಿಗೆ ಪೈಪೋಟಿಯನ್ನು ಒಡ್ಡಲಿದೆ.

ಟೆಸ್ಲಾ ನೂತನ ಕಾರು ಎಸ‌್‌ಯುವಿ ಜತೆಗೆ ಕ್ರಾಸೋವರ್ ವಿನ್ಯಾಸದ ಮಿಶ್ರಣವನ್ನು ಪಡೆದಿದೆ. ಅಲ್ಲದೆ ಪರಿಸರ ಸ್ನೇಹಿ ಭವಿಷ್ಯತ್ತಿನ ಕಾರುಗಳ ಸಾಲಿನಲ್ಲಿ ಗುರುತಿಸಿಕೊಳ್ಳಲಿದೆ. ಅಂದ ಹಾಗೆ ನಿಕಟ ಭವಿಷ್ಯದಲ್ಲಿ ಭಾರತಕ್ಕೆ ಪ್ರವೇಶಿಸುವ ಸಾಧ್ಯತೆಯು ಕ್ಷೀಣವೆನಿಸಿದೆ.