ಯಮಹಾ ವೈಝಡ್‌ಎಫ್-ಆರ್15 ಮೊಟೊಜಿಪಿ ಆವೃತ್ತಿ ಬಿಡುಗಡೆ

ಹೊಸದಿಲ್ಲಿ: ಜಪಾನ್ ಮೂಲದ ಜನಪ್ರಿಯ ದ್ವಿಚಕ್ರ ವಾಹನ ಸಂಸ್ಥೆ ಯಮಹಾ ಮೋಟಾರ್ ಇಂಡಿಯಾ ಸಂಸ್ಥೆಯು, ಅತಿ ನೂತನ ವೈಝಡ್‌ಎಫ್-ಆರ್15 ಮೊಟೊಜಿಪಿ ಸೀಮಿತ ಆವೃತ್ತಿಯನ್ನು ಬಿಡುಗಡೆಗೊಳಿಸಿದೆ.

ಯಮಹಾ ಮೊಟೊಜಿಪಿ ರೈಸ್ ಬೇಕ್ ವೈಝಡ್‌ಆರ್-ಎಂ1 ರೇಸ್ ಬೈಕ್‌ನಿಂದ ಸ್ಫೂರ್ತಿ ಪಡೆದು ಇದನ್ನು ರಚಿಸಲಾಗಿದೆ. ಹಾಗೆಯೇ ವೈಝಡ್‌ಎಫ್-ಆರ್15 ವಿ 3.0 ಕ್ರೀಡಾ ಬೈಕ್‌ನ ಸೀಮಿತ ಆವೃತ್ತಿಯಾಗಿದೆ.

ಬೆಲೆ: 1.3 ಲಕ್ಷ ರೂ. (ಎಕ್ಸ್ ಶೋ ರೂಂ ದಿಲ್ಲಿ)

ನೂತನ ಬೈಕ್ ಅತಿ ನೂತನ ಯಮಹಾ ರೇಸಿಂಗ್ ಬ್ಲೂ ಬಣ್ಣವನ್ನು ಪಡೆದಿದೆ. ಎಂ1 ಪ್ರೇರಣೆ ಪಡೆದ ಗ್ರಾಫಿಕ್ಸ್, ಫೇರಿಂಗ್, ಹೆಡ್‌ಲ್ಯಾಂಪ್, ಇಂಧನ ಟ್ಯಾಂಕ್ ಹಾಗೂ ಇಂಧನ ಟ್ಯಾಂಕ್‌ನಲ್ಲಿ ಗೋಲ್ಡನ್ ಟ್ಯೂನಿಂಗ್ ಫಾರ್ಮ್ ಲಾಂಛನ ಇರಲಿದೆ.


ಆಸಕ್ತ ಗ್ರಾಹಕರು 10,000 ರೂ.ಗಳನ್ನು ಮುಂಗಡವಾಗಿ ಪಾವತಿಸಿ ಬುಕ್ಕಿಂಗ್ ಮಾಡಿಕೊಳ್ಳತಕ್ಕದ್ದು. ಹಾಗೆಯೇ 40ರಿಂದ 55 ದಿನಗಳಲ್ಲಿ ವಿತರಣೆಯಾಗಲಿದೆ.

ತಾಂತ್ರಿಕವಾಗಿ ಯಾವುದೇ ಬದಲಾವಣೆ ಕಂಡುಬರುವುದಿಲ್ಲ. 155 ಸಿಸಿ ವೆರಿಯಬಲ್ ವಾಲ್ವ್ ಆಕ್ಯೂಯೇಷನ್ ಎಂಜಿನ್ 19.3 ಅಶ್ವಶಕ್ತಿ ಉತ್ಪಾದಿಸಲಿದೆ. ಹಾಗೆಯೇ ಎಲ್ಇಡಿ ವಿಭಜಿತ ಹೆಡ್‌ಲ್ಯಾಂಪ್, 140 ಅಗಲವಾದ ರಿಯರ್ ಚಕ್ರ ಹಾಗೂ ಸ್ಲಿಪರ್ ಕ್ಲಚ್ ಮುಂತಾದ ಸೌಲಭ್ಯಗಳನ್ನು ಪಡೆಯಲಿದೆ.

ಅಂತೆಯೇ ಯಮಹಾ ಎಫ್‌ಎಸ್‌ಝಡ್-ಎಫ್‌ಐ ರಿಯರ್ ಡಿಸ್ಕ್ ಬ್ರೇಕ್ ಆವೃತ್ತಿಯಲ್ಲಿ ಡಾರ್ಕ್‌ನೈಟ್ ಹಾಗೂ ಮ್ಯಾಟ್ ಗ್ರೀನ್‌ಗಳೆಂಬ ಎರಡು ಹೊಸ ಬಣ್ಣಗಳನ್ನು ಪರಿಚಯಿಸಲಾಗಿದೆ. ಇದು ದಿಲ್ಲಿ ಎಕ್ಸ್ ಶೋ ರೂಂ ಬೆಲೆಯಂತೆ 87,042 ರೂ.ಗಳಷ್ಟು ದುಬಾರಿಯೆನಿಸಲಿದೆ.