ಅಯೋಧ್ಯೆಯಿಂದ ಶಬರಿಮಲೆಗೆ ಪಾದಯಾತ್ರೆ

ಮಂಗಳೂರು: ಅಯೋಧ್ಯೆ ಶ್ರೀರಾಮ ಮಂದಿರ-ಬಾಬರಿ ಮಸೀದಿ ವಿವಾದ ಸುಪ್ರೀಂ ಕೋರ್ಟ್‌ನಲ್ಲಿಪ್ರತಿನಿತ್ಯ ವಿಚಾರಣೆಯಾಗುತ್ತಿದ್ದು, ದೇಶ ಕಾತರತೆಯಿಂದ ತೀರ್ಪಿಗಾಗಿ ಕಾಯುತ್ತಿದೆ. ಈ ಮಧ್ಯೆ ಶ್ರೀರಾಮ ಮಂದಿರ ನಿರ್ಮಾಣ ಕಾರ್ಯ ಯಶಸ್ವಿಯಾಗಲಿ ಹಾಗೂ ಶಬರಿಮಲೆ ಪಾವಿತ್ರ್ಯತೆಗೆ ಧಕ್ಕೆಯಾಗದಿರಲೆಂಬ ಸಂಕಲ್ಪದೊಂದಿಗೆ ನಾಲ್ವರು ಅಯ್ಯಪ್ಪ ವ್ರತಧಾರಿಗಳ ತಂಡವೊಂದು ಅಯೋಧ್ಯೆಯಿಂದ ಶಬರಿಮಲೆಗೆ ಪಾದಯಾತ್ರೆ ನಡೆಸುತ್ತಿದೆ.

ಹಿರಿಯ ಸ್ವಾಮಿ ಕುಪ್ಪೆಪದವಿನ ರಾಜಪ್ಪ ಸಪಲಿಗ ಕುಪ್ಪೆಪದವು, ಚರಣ್‌ರಾಜ್‌ ಕುಲಶೇಖರ, ಮಿಥುನ್‌ ಚಿತ್ರಾಪುರ ಹಾಗೂ ಶಶಿಕುಮಾರ್‌ ಕಕ್ಕಿಂಜೆ ಅವರು ಪಾದಯಾತ್ರೆ ಮಾಡುತ್ತಿರುವ ಅಯ್ಯಪ್ಪ ವ್ರತಧಾರಿಗಳು.

ಸೆ.18ರಂದು ಅಯೋಧ್ಯೆಯಲ್ಲಿ ಗುರುಸ್ವಾಮಿ ರಾಜೇಶ್‌ ಕೊಟ್ಟಾರಿ ನಾರ್ಲ ಇರುಮುಡಿ ಕಟ್ಟಿ ವ್ರತಧಾರಿಗಳನ್ನು ಬೀಳ್ಕೊಟ್ಟಿದ್ದಾರೆ. ಈ ತಂಡ ಉತ್ತರ ಪ್ರದೇಶದಿಂದ ಹೊರಟು ಮಧ್ಯಪ್ರದೇಶ, ಮಹಾರಾಷ್ಟ್ರ, ಗೋವಾ, ಕರ್ನಾಟಕ ಮುಖೇನ ಕೇರಳ ಪ್ರವೇಶಿಸಲಿದೆ. ವ್ರತಧಾರಿಗಳ ತಂಡ 90 ದಿನಗಳಲ್ಲಿ 2,750 ಕಿ.ಮೀ. ಪಾದಯಾತ್ರೆ ಮಾಡಲಿದೆ. ಈ ತಂಡ ಡಿಸೆಂಬರ್‌ನ ಸಂಕ್ರಮಣ ಬಳಿಕ ಕ್ಷೇತ್ರದಲ್ಲಿ ನಡೆಯುವ ಮಂಡಲ ಪೂಜೆಗೆ ಶಬರಿಮಲೆಗೆ ತಲುಪುವ ಉದ್ದೇಶ ಹೊಂದಲಾಗಿದೆ.