ಭರತ ಹುಣ್ಣಿಮೆ ಶಕ್ತಿದೇವತೆಗೆ ವಿಶೇಷ ಪೂಜೆ

ಕುದೂರು: ಭರತ ಹುಣ್ಣಿಮೆ ಅಂಗವಾಗಿ ಕುದೂರು ಗ್ರಾಮದೇವತೆ, ಲಕ್ಷ್ಮೀದೇವಿ ಹಾಗೂ ಚೌಡೇಶ್ವರಿ ದೇಗುಲದಲ್ಲಿ ವಿಶೇಷ ಹೂವಿನ ಅಲಂಕಾರ ಹಾಗೂ ನಾನಾ ಧಾರ್ಮಿಕ ಸೇವೆಗಳು ನೆರವೇರಿದವು.
ಮುಂಜಾನೆಯೇ ಹುಣ್ಣಿಮೆ ಅಂಗವಾಗಿ ದೇವಿಗೆ ಅಭಿಷೇಕ ಹಾಗೂ ಅಲಂಕಾರ ಸೇವೆ ಕೈ ಗೊಂಡು ಫಲ ಹಾಗೂ ತರಕಾರಿಗಳಿಂದ ಸಿಂಗರಿಸಲಾಯಿತು. ಗ್ರಾಮದ ನೂರಾರು ಭPಕ್ತರು ದೇವಾಲಯಕ್ಕೆ ಭೇಟಿ ನೀಡಿ ಪ್ರಾರ್ಥನೆ ಸಲ್ಲಿಸಿದರು.
ಕುದೂರಮ್ಮ ದೇವಾಲಯದ ಅರ್ಚಕ ಮಲ್ಲಯ್ಯ ಮಾತನಾಡಿ, ಹುಣ್ಣಿಮೆಯ ಬೆಳಕು ಎಲ್ಲೆಡೆ ಶುಭವನ್ನು ತರಲಿ. ಹುಣ್ಣಿಮೆ ದಿನದಂದು ಶಕ್ತಿದೇತೆಗಳ ಆರಾಧನೆ ಮಾಡುವುದರಿಂದ ಪುಣ್ಯಫಲ ಪ್ರಾಪ್ತವಾಗುತ್ತದೆ. ದೇವಾಲಯ ಸೇವಾ ಸಮಿತಿ ಹಾಗೂ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿ ಸೇವಾ ಕಾರ್ಯದಲ್ಲಿ ಮಗ್ನರಾಗಿದ್ದರು. ದೇವಿ ಎಲ್ಲರಿಗೂ ಸನ್ಮಂಗಲವನ್ನುಂಟು ಮಾಡಲಿ ಎಂದು ಆಶಿಸಿದರು.
ಇದೇ ವೇಳೆ ಸೇವಾ ಸಮಿತಿ ಸದಸ್ಯರು ಹಾಜರಿದ್ದರು.
ಚೌಡೇಶ್ವರಿ ದೇಗುಲದಲ್ಲಿ ಅನ್ನಸಂತರ್ಪಣೆ: ಕುದೂರಿನ ರಾಮಲಿಂಗ ಚೌಡೇಶ್ವರಿ ದೇಗುಲದಲ್ಲಿ ಭರತ ಹುಣ್ಣಿಮೆ ಅಂಗವಾಗಿ ದೇವಾಲಯವನ್ನು ಸಿಂಗರಿಸಿ ಮುಂಜಾನೆಯೇ ನಾನಾ ಸೇವಾ ಕಾರ್ಯಗಳನ್ನು ಕೈ ಗೊಳ್ಳಲಾಯಿತು. ಬಳಿಕ ದೇವಿಗೆ ಅಭಿಷೇಕ, ಉಯ್ಯಾಲೆ ಸೇವೆ, ನಾನಾ ಪುಷ್ಪಗಳಿಂದ ವಿಶೇಷ ಅಲಂಕಾರ ಸೇವೆ ಕೈ ಗೊಂಡು ಮಧ್ಯಾಹ್ನದ ವೇಳೆಗೆ ರಥೋತ್ಸವ, ಮಹಾಮಂಗಳಾರತಿ ಹಾಗೂ ತೀರ್ಥಪ್ರಸಾದ ವಿನಿಯೋಗ ನಡೆಯಿತು. ಬಳಿಕ ಆಗಮಿಸಿದ್ದ ಎಲ್ಲಾ ಭಕ್ತರಿಗೆ ಅನ್ನಸಂತರ್ಪಣೆ ನೆರವೇರಿಸಲಾಯಿತು.