ಹೆಚ್ಚಿದ ಆನೆ ರಾಮನ್‌ ಜನಪ್ರಿಯತೆ

ತ್ರಿಶೂರ್‌: ಇಲ್ಲಿನ ಸುಪ್ರಸಿದ್ಧ ಆನೆ ಉತ್ಸವಕ್ಕೆ ಚಾಲನೆ ನೀಡುವ ರಾಮನ್‌ ಎಂದೇ ಖ್ಯಾತವಾಗಿರುವ ಆನೆ ತೆಚ್ಚಿಕ್ಕೊಟ್ಟುಕವು ರಾಮಚಂದ್ರನ್‌ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಜನಪ್ರಿಯತೆ ಪಡೆದಿದ್ದಾನೆ. ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ತ್ರಿಶೂರ್‌ ಪೂರಂ ಗಜ ಉತ್ಸವದಲ್ಲಿ 55ರ ಹರೆಯ ಆನೆಯ ಮೇಲೆ ಕೇರಳ ಸರಕಾರ ಮೊದಲಿಗೆ ನಿಷೇಧ ಹೇರಿತ್ತು. ಆದರೆ ಸಾಮೂಹಿಕ ಬಹಿಷ್ಕಾರ ಹಾಕುವುದಾಗಿ ಆನೆ ಮಾಲೀಕರು ಎಚ್ಚರಿಕೆ ನೀಡಿದ ಹಿನ್ನೆಲೆಯಲ್ಲಿ ಒಂದು ಗಂಟೆಗಳ ಕಾಲ ರಾಮನ್‌ ಮೇಲಿನ ನಿಷೇಧವನ್ನು ಹಿಂತೆಗೆದುಕೊಂಡು, ಆನೆ ಉತ್ಸವಕ್ಕೆ ಚಾಲನೆ ನೀಡಲು ಅವಕಾಶ ನೀಡಲಾಗಿತ್ತು.

ಜಾತ್ರೆಯ ಸಂದರ್ಭದಲ್ಲಿ ರಾಮನ್‌ನ ತೀರಾ ಸಮೀಪದಲ್ಲಿ ನಿಂತುಕೊಂಡು ಹಲವಾರು ಅಭಿಮಾನಿಗಳು ಸೆಲ್ಮಿ ತೆಗೆದುಕೊಂಡಿದ್ದರು. ಬಳಿಕ ಫೇಸ್‌ಬುಕ್‌ ಹಾಗೂ ಇನ್‌ಸ್ಟಾಗ್ರಾಂನಲ್ಲಿ ಚಿತ್ರವನ್ನು ಹರಿಯಬಿಟ್ಟಿದ್ದರು. ಇದಕ್ಕೆ ವಿಶ್ವದೆಲ್ಲೆಡೆಯಿಂದ ಮೆಚ್ಚುಗೆಯ ಸುರಿಮಳೆಯೇ ಹರಿದು ಬರುತ್ತಿದೆ. 10 ಲಕ್ಷಕ್ಕೂ ಹೆಚ್ಚು ಜನರು ಈಗಾಗಲೇ ಇದನ್ನು ಲೈಕ್‌ ಮಾಡಿದ್ದರೆ, ನೂರಾರು ಜನರು ಶೇರ್‌ ಮಾಡಿಕೊಂಡಿದ್ದಾರೆ.