ಜು.16ರಂದು ಶಕ್ತಿದೇವತೆ ಚಾಮುಂಡೇಶ್ವರಿ ಕರಗ

ರಾಮನಗರ: ದುಷ್ಟ ಶಿಕ್ಷ ಕಿ, ಶಿಷ್ಟ ರಕ್ಷ ಕಿ ತಾಯಿ ಶ್ರೀ ಚಾಮುಂಡೇಶ್ವರಿ ಕರಗ ಮಹೋತ್ಸವವು ಪ್ರತಿ ವರ್ಷದಂತೆ ಈ ವರ್ಷವೂ ಅದ್ಧೂರಿಯಾಗಿ ಆಚರಿಸಲು ಸಕಲ ಸಿದ್ಧತೆ ಮಾಡಲಾಗುತ್ತಿದೆ ಎಂದು ಶ್ರೀ ಚಾಮುಂಡೇಶ್ವರಿ ಸೇವಾ ಸಮಿತಿ ಪ್ರಧಾನ ಕಾರ್ಯದರ್ಶಿ ಕೆ.ಸುರೇಶ್‌ ಹೇಳಿದರು.
ಹಲವಾರು ವರ್ಷಗಳಿಂದ ಯಾವ ಅಡೆ ತಡೆ ಇಲ್ಲದೆ ನಡೆದುಬರುತ್ತಿರುವ ಕರಗ ಮಹೋತ್ಸವವು ಜುಲೈ 16 ರಿಂದ ಪ್ರಾರಂಭಗೊಂಡು 26ಕ್ಕೆ ಕೊನೆಗೊಳ್ಳುವುದು.
ಜು.16 ರಂದು ಹಸಿ ಕರಗ ಪ್ರಯುಕ್ತ ಅಮ್ಮನವರಿಗೆ ವಿಶೇಷ ಪುಷ್ಪಾಲಂಕಾರ ಇದ್ದು ಸಂಜೆ 6 ಗಂಟೆಗೆ ಹಸಿ ಕರಗ ಪ್ರಾರಂಭಗೊಂಡು ರಾಜಬೀದಿಗಳಲ್ಲಿ ಸಂಚರಿಸಿ ದೇವಸ್ಥಾನ ಸೇರುವುದು, 17 ರಂದು ಚಂದ್ರಗ್ರಹಣ ಪ್ರಯುಕ್ತ ಗ್ರಹಣದ ನಂತರ ಅಮ್ಮನವರ ದೇವಾಲಯದಲ್ಲಿ ಬೆಳಗ್ಗೆ 6 ಗಂಟೆಗೆ ಪಂಚಗವ್ಯ ಹೋಮವನ್ನು ನೆರವೇರಿಸಿ ಅಮ್ಮನವರಿಗೆ ಸರಸ್ವತಿ ಅಲಂಕಾರ ಮಾಡಲಾಗುವುದು, 18ರಂದು ಲಕ್ಷ್ಮೀ ಅಲಂಕಾರ, 19ರಂದು ಧನಲಕ್ಷ್ಮೀ ಅಲಂಕಾರ, 20ರಂದು ಭುವನೇಶ್ವರಿ ಅಲಂಕಾರ, 21ರಂದು ರಾಜರಾಜೇಶ್ವರಿ ಅಲಂಕಾರ, 22ರಂದು ಗಜಲಕ್ಷ್ಮೀ ಅಲಂಕಾರ ಹಾಗೂ 23ರಂದು ಮಂಗಳವಾರ ಭಾರತಮಾತೆ ಅಲಂಕಾರ ಇರುವುದಾಗಿ ತಿಳಿಸಿದರು. ಎಂದಿನಂತೆ ಶ್ರೀ ಚಾಮುಂಡೇಶ್ವರಿ ಶ್ರೀ ಶೆಟ್ಟಹಳ್ಳಿ ಆದಿಶಕ್ತಿ, ಆದಿಶಕ್ತಿ, ಶ್ರೀ ಮುತ್ತುಮಾರಮ್ಮ, ಶ್ರೀ ಬಿಸಿಲುಮಾರಮ್ಮ, ಶ್ರೀ ಮಗ್ಗದಕೇರಿ ಮಾರಮ್ಮ, ಭಂಡಾರಮ್ಮ, ಎಂಟು ದೇವತೆಗಳ ಕರಗಮಹೋತ್ಸವ ನಡೆಯುವುದು ಎಂದು ಮಾಹಿತಿ ನೀಡಿದರು.