ಅಯ್ಯಪ್ಪನ ಸನ್ನಿಧಿಯಲ್ಲಿ ಮಾಸಿಕ ಪೂಜೆ

ಶಬರಿಮಲೆ: ಮಾಸಿಕ ಐದು ದಿನಗಳ ಪೂಜೆಗಾಗಿ ಶಬರಿಮಲೆ ಶ್ರೀ ಅಯ್ಯಪ್ಪ ದೇಗುಲವನ್ನು ತೆರೆಯಲಾಗಿದೆ. 19ರವರೆಗೆ ದೇವರ ದರ್ಶನಕ್ಕೆ ಭಕ್ತರಿಗೆ ಅವಕಾಶವಿರುತ್ತದೆ. ಮುಖ್ಯ ಅರ್ಚಕ ವಿ.ಎನ್‌.ವಾಸುದೇವನ್‌ ನಂಬೂದರಿ ದೇವಾಲಯದ ಗರ್ಭಗುಡಿಯ ಬಾಗಿಲನ್ನು ತಂತ್ರಿ ಕಂದರಾರು ರಾಜೀವರು ಸಮ್ಮುಖದಲ್ಲಿ ಮಂಗಳವಾರ ತೆರೆದರು.

ಮೊದಲ ದಿನದಿಂದಲೇ ಭಕ್ತರು ದೊಡ್ಡ ಸಂಖ್ಯೆಯಲ್ಲಿ 18 ಮೆಟ್ಟಿಲುಗಳನ್ನು ಏರಿ ಅಯ್ಯಪ್ಪನ ದರ್ಶನ ಪಡೆಯುತ್ತಿದ್ದಾರೆ ಎಂದು ತಿರುವಂಕೂರು ದೇವಸ್ವಂ ಮಂಡಳಿ (ಟಿಡಿಬಿ) ಪ್ರಕಟಣೆಯಲ್ಲಿ ತಿಳಿಸಿದೆ. ನೈಯಾಬಿಷೇಕಂ, ಕಲಋೂಭಿಷೇಕಂ, ಪಡಿ ಪೂಜಾ ಕಾರ್ಯಕ್ರಮಗಳು ನಡೆಯುತ್ತಿದ್ದು, 19ರಂದು ದೇವಾಲಯದ ಬಾಗಿಲು ಮುಚ್ಚಲಾಗುತ್ತದೆ. ದೇಗುಲ ಪ್ರವೇಶ ಕುರಿತ ವಿವಾದದಿಂದ ಎದುರಾಗಬಹುದಾದ ಸಂಭಾವ್ಯ ಘರ್ಷಣೆಯನ್ನು ತಪ್ಪಿಸುವ ಸಲುವಾಗಿ ಭಾರೀ ಪೊಲೀಸ್‌ ಬಂದೋಬಸ್ತ್‌ ಕೈಗೊಳ್ಳಲಾಗಿದೆ.