ನೋಡನೋಡುತ್ತಲೇ ವಯಸ್ಸು ಸವೆಯುತ್ತದೆ. ನಿವೃತ್ತಿಯ ದಿನವೂ ಬಂದು ಬಿಡುತ್ತದೆ. ಹೀಗಾಗಿ ನಿವೃತ್ತಿ ಹೊತ್ತಿಗೆ ಗರಿಷ್ಠ ರಿಟನ್ಸ್‌ರ್‍ ಬರುವಂತೆ ಉದ್ಯೋಗಿಗಳು ಯೋಜನೆಗಳನ್ನು ರೂಪಿಸಬೇಕು. ಮೊದಲಿಗೆ ನಿಮ್ಮ ಹೂಡಿಕೆಯಲ್ಲಿಒಂದಿಷ್ಟು ಭಾಗವನ್ನು ಹಣದುಬ್ಬರವೇ ತಿಂದು ಬಿಡುತ್ತದೆ ಎನ್ನುವ ಅಂಶ ನೆನಪಿನಲ್ಲಿರಲಿ. ಚಿನ್ನ, ರಿಯಲ್‌ ಎಸ್ಟೇಟ್‌ನಂಥ ಸಾಂಪ್ರದಾಯಿಕ ಹೂಡಿಕೆಗಳು ನಿಮಗೆ ಯಾವ ಮಟ್ಟದ ರಿಟನ್ಸ್‌ರ್‍ ನೀಡುತ್ತವೆ ಎನ್ನುವುದಕ್ಕೆ ಖಾತ್ರಿ ಇಲ್ಲ. ಆದಾಗ್ಯೂ, ಇಪಿಎಫ್‌ ಮತ್ತು ಇತ್ತೀಚೆಗೆ ಜನಪ್ರಿಯವಾಗುತ್ತಿರುವ ಎನ್‌ಪಿಎಸ್‌ - ಈ ಎರಡು ಹೂಡಿಕೆಗಳು ನಿವೃತ್ತಿಗೆ ಆಸರೆಯಾಗುತ್ತವೆ.
ಇಪಿಎಫ್‌ & ಎನ್‌ಪಿಎಸ್‌ ನಡುವೆ ಪೋರ್ಟಬಿಲಿಟಿ
ಇಪಿಎಫ್‌ ಮತ್ತು ಎನ್‌ಪಿಎಸ್‌ ಇವೆರಡಕ್ಕೂ ಹೊಸ ಆಯ್ಕೆಗಳು/ಸೌಲಭ್ಯಗಳು ಇತ್ತೀಚೆಗೆ ಸೇರಿಕೊಂಡಿವೆ. ಹೂಡಿಕೆಯಲ್ಲಿ ಫ್ಲೆಕ್ಸಿಬಿಲಿಟಿಗೆ ಸಂಬಂಧಿಸಿದಂತೆ ಅನೇಕ ಆಯ್ಕೆ ನೀಡಲಾಗಿದೆ. ಹಣ ಹಿಂಪಡೆಯಲೂ ಅನುಕೂಲವಾಗುವಂತೆ ಹೊಸ ನಿಯಮ ರೂಪಿಸಲಾಗಿದೆ. ಇಪಿಎಫ್‌ ಮತ್ತು ಎನ್‌ಪಿಎಸ್‌ಗಳ ನಡುವೆ ಪೋರ್ಟಬಿಲಿಟಿಗೂ ಈಗ ಅವಕಾಶವಿದೆ. ನಿವೃತ್ತಿ ಹೊತ್ತಿಗೆ ಇವುಗಳ ಮೂಲಕ ಗರಿಷ್ಠ ಗಳಿಕೆಯನ್ನು ಹೊಂದಲು, ಇಂದೇ ಉದ್ಯೋಗಿಗಳು ಮನಸ್ಸು ಮಾಡಬೇಕು.
ಇಪಿಎಫ್‌ ಕರಗಿಸುವುದು ಸಲ್ಲದು
ವೇತನದಾರರು ಉದ್ಯೋಗಿಗಳ ಭವಿಷ್ಯನಿಧಿ(ಇಪಿಎಫ್‌) ಮೂಲಕ ಕಡ್ಡಾಯ ಉಳಿತಾಯವನ್ನು ಮಾಡುವಂಥ ವ್ಯವಸ್ಥೆ ಇದೆ. ಪ್ರತಿ ತಿಂಗಳೂ ಮೂಲ ವೇತನದಲ್ಲಿ12% ಅನ್ನು ಉದ್ಯೋಗಿಗಳು ಪಾವತಿಸಿದರೆ, ಉದ್ಯೋಗದಾತರೂ ಅದಕ್ಕೆ ತಕ್ಕನಾದ ಭಾಗವನ್ನು ಜಮೆ ಮಾಡುತ್ತಾರೆ. ವೇತನ ಏರಿಕೆಯಾದಂತೆ ಇಪಿಎಫ್‌ ಕಂತಿನ ಭಾಗ ಹೆಚ್ಚುತ್ತಾ ಹೋಗುತ್ತದೆ. ಹೀಗಾಗಿ, ನಿವೃತ್ತಿಯ ತನಕ ಪಿಎಫ್‌ ಖಾತೆಯನ್ನು ತಪ್ಪದೇ ಮುಂದುವರಿಸಿ. ಕೆಲವರು ತಮ್ಮ ಅಲ್ಪಾವಧಿ ಅಗತ್ಯಗಳಿಗಾಗಿ ಇಪಿಎಫ್‌ ಅನ್ನು ಕರಗಿಸುತ್ತಾರೆ. ಇದು ಸಲ್ಲದು ಎನ್ನುತ್ತಾರೆ ತಜ್ಞರು.
ಇಪಿಎಫ್‌ಗೆ ಶೇ.5ರಷ್ಟು ಕೊಡುಗೆ ಹೆಚ್ಚಿಸಬೇಕು
ಇತರೆ ಉಳಿತಾಯ ಯೋಜನೆಗಳಿಗೆ ಹೋಲಿಸಿದರೆ ಇಪಿಎಫ್‌ ಬಡ್ಡಿ ದರವು ಹೆಚ್ಚಿನದಾಗಿಯೇ ಇದೆ. 2018-19ನೇ ಸಾಲಿನಲ್ಲಿಇಪಿಎಫ್‌ ಬಡ್ಡಿ ದರ ಶೇ.8.65ರಷ್ಟಿದೆ. ಹೀಗಾಗಿ, ಸಣ್ಣಪುಟ್ಟ ಕಾರಣಗಳಿಗಾಗಿ ಹೂಡಿಕೆಯನ್ನು ಹಿಂಪಡೆಯಲು ಪ್ರಯತ್ನಿಸಬೇಡಿ. ಇಪಿಎಫ್‌ಗೆ ನಿಗದಿಗಿಂತಲೂ ಹೆಚ್ಚಿನ ಹಣವನ್ನು ಪಾವತಿಸಲು ಉದ್ಯೋಗಿಗಳಿಗೆ ಅವಕಾಶವಿದೆ. ನಿಮ್ಮ ಇನ್‌ಕ್ರಿಮೆಂಟ್‌ ಅನ್ನು ಇಪಿಎಫ್‌ಗೆ ಸೇರಿಸಿದರೆ, ನಿವೃತ್ತಿಯ ಹೊತ್ತಿಗೆ ಹೆಚ್ಚಿನ ಮೊತ್ತ ಕ್ರೋಡೀಕರಣವಾಗುತ್ತದೆ. ಹೀಗಾಗಿ 15 ಸಾವಿರ ರೂ. ಮೂಲ ವೇತನ(ಬೇಸಿಕ್‌) ಹೊಂದಿರುವ ವ್ಯಕ್ತಿಗೆ ನಿವೃತ್ತಿಗೆ ಇನ್ನೂ 30 ವರ್ಷವಿದ್ದರೇ ಅವರು ಪ್ರತಿ ವರ್ಷ ಇಪಿಎಫ್‌ಗೆ ತಮ್ಮ ಕೊಡುಗೆಯನ್ನು ಶೇ.5ರಷ್ಟು ಹೆಚ್ಚಿಸುತ್ತಾ ಹೋಗಬೇಕು.
ವಿಪಿಎಫ್‌ ಮೂಲಕ ಕೊಡುಗೆ
ವಾಲಂಟರಿ ಪ್ರಾವಿಡೆಂಟ್‌ ಫಂಡ್‌(ವಿಪಿಎಫ್‌) ಅನ್ನುವುದು ಇಪಿಎಫ್‌ನ ವಿಸ್ತರಿತ ಹೊಡಿಕೆ ಯೋಜನೆಯಾಗಿದೆ. ಪಿಪಿಎಫ್‌ ಮೂಲಕ ವಾರ್ಷಿಕ 1.5 ಲಕ್ಷ ರೂ. ತನಕ ಮಾತ್ರ ಹೂಡಿಕೆ ಮಾಡಬಹುದು. ಆದರೆ, ವಿಪಿಎಫ್‌ಗೆ ಇಂಥ ನಿರ್ಬಂಧವಿಲ್ಲ. ಇಪಿಎಫ್‌ಗೆ ಸಮನಾದ ಬಡ್ಡಿಯೇ ವಿಪಿಎಫ್‌ಗೂ ಇದೆ. ಪಿಪಿಎಫ್‌ಗೆ ಈಗ ಶೇ.7.9ರ ಬಡ್ಡಿ ಇದ್ದರೇ, ವಿಪಿಎಫ್‌ಗೆ ಶೇ.8.65ರ ಬಡ್ಡಿ ಇದೆ. ಪಿಎಫ್‌ ಕೊಡುಗೆ ಜಾಸ್ತಿ ಮಾಡುವುದು ಎಂದರೇ, ನಿಮ್ಮ ಟೇಕ್‌ ಹೋಮ್‌ ವೇತನ ಕಡಿಮೆಯಾಗುತ್ತದೆ ಎಂದರ್ಥ. ಆದಾಗ್ಯೂ, ಈಗ ನಿಮ್ಮ ವೆಚ್ಚಗಳನ್ನು ತಗ್ಗಿಸಿದರೆ ನಾಳೆಯ ದಿನಗಳಿಗೆ ಹಣಕಾಸಿನ ಸ್ಥಿರತೆ ಸಾಧ್ಯವಾಗುತ್ತದೆ ಎನ್ನುವುದು ತಜ್ಞರ ಕಿವಿಮಾತು.