ನಿಮ್ಮ ಪ್ಯಾನ್ ಮತ್ತು ಆಧಾರ್ ಸಂಖ್ಯೆಯನ್ನು ವಿಮೆ ಪಾಲಿಸಿಗಳಿಗೆ ಜೋಡಣೆ ಮಾಡುವುದನ್ನು ಭಾರತೀಯ ಜೀವ ವಿಮಾ ನಿಗಮ(ಎಲ್ಐಸಿ) ಕಡ್ಡಾಯಗೊಳಿಸಿದೆ. ಆನ್ಲೈನ್ನಲ್ಲಿ ಲಿಂಕ್ ಮಾಡುವುದು ಹೇಗೆ ಅನ್ನುವ ಬಗ್ಗೆ ಇಲ್ಲಿದೆ ಮಾಹಿತಿ.
* ಹ.ಚ. ನಟೇಶ ಬಾಬು
ಕಾಳಧನ ನಿಗ್ರಹಿಸಲು ಮತ್ತು ಹಣಕಾಸು ವ್ಯವಸ್ಥೆಯಲ್ಲಿ ಪಾರದರ್ಶಕತೆ ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಸರಕಾರವು ಆಧಾರ್ ಅನ್ನು ಅಸ್ತ್ರದಂತೆ ಬಳಸುತ್ತಿದೆ. ವಿಮೆಯಲ್ಲಿನ ದುರ್ಬಳಕೆ ತಡೆ ಮತ್ತು ಗ್ರಾಹಕರಿಗೆ ಸೇವೆಗಳನ್ನು ಸುಲಭವಾಗಿ ನೀಡುವ ಸಲುವಾಗಿ ಈಗ ಆಧಾರ್ ಮತ್ತು ಪ್ಯಾನ್ ಅನ್ನು ವಿಮಾ ಪಾಲಿಸಿಗೆ ಕಡ್ಡಾಯವಾಗಿ ಜೋಡಣೆ ಮಾಡಬೇಕು ಎಂದು ಎಲ್ಐಸಿ ಹೇಳಿದೆ. ಗ್ರಾಹಕರು ಡಿ.31ರೊಳಗೆ ಜೋಡಣೆ ಮಾಡುವಂತೆ ಈಗಾಗಲೇ ಎಲ್ಐಸಿ ಸೂಚನೆ ನೀಡಿದೆ.
ಭಾರತೀಯ ವಿಮೆ ನಿಯಂತ್ರಕ ಮತ್ತು ಅಭಿವೃದ್ಧಿ ಪ್ರಾಧಿಕಾರದ(ಐಆರ್ಡಿಎಐ) ನಿರ್ದೇಶನವನ್ನು ಜಾರಿಗೊಳಿಸಲು ಎಲ್ಐಸಿ ಮುಂದಾಗಿದ್ದು, ಈಗಾಗಲೇ ಆನ್ಲೈನ್ನಲ್ಲಿ ಆಧಾರ್ ಜೋಡಣೆಗೆ ಅವಕಾಶ ಕಲ್ಪಿಸಿದೆ. ಸುಲಭದ ಕೆಲವೇ ಕೆಲವು ಹಂತಗಳಲ್ಲಿ ಜೋಡಣೆ ಪ್ರಕ್ರಿಯೆಯನ್ನು ಗ್ರಾಹಕರು ಪೂರ್ಣಗೊಳಿಸಬಹುದಾಗಿದೆ.
ಭಾರತೀಯ ಜೀವ ವಿಮಾ ನಿಗಮದ ಜಾಲತಾಣಕ್ಕೆ(hಠಿಠಿp://ಡಿಡಿಡಿ.್ಝಜ್ಚಿಜ್ಞಿdಜಿa.ಜ್ಞಿ/) ಭೇಟಿ ನೀಡಿದರೆ ಮುಖಪುಟದಲ್ಲಿಯೇ 'ಲಿಂಕ್ ಆಧಾರ್ ಆ್ಯಂಡ್ ಪ್ಯಾನ್ ಟೂ ಪಾಲಿಸಿ' ಎನ್ನುವ ಲಿಂಕ್ವೊಂದು ಕಾಣಿಸುತ್ತದೆ. ಅದನ್ನು ಕ್ಲಿಕ್ ಮಾಡಿದರೆ, ಮತ್ತೊಂದು ಪುಟ ತೆರೆದುಕೊಳ್ಳುತ್ತದೆ. ನೀವು ಏನನ್ನು ಮಾಡಬೇಕು ಎಂದು ಅಲ್ಲಿ ಸೂಚನೆಗಳಿರುತ್ತವೆ. ಯುಐಡಿಎಐಗೆ ನಿಮ್ಮ ಮೊಬೈಲ್ ಸಂಖ್ಯೆ ನೋಂದಣಿಯಾಗಿದೆಯೇ ಎಂಬುದನ್ನು ಗಮನಿಸಿ. ಹೌದು ಅನ್ನುವುದಾದರೆ, ಒಂದು ಅವಧಿಯ ಪಾಸ್ವರ್ಡ್(ಒಟಿಪಿ) ನಿಮ್ಮ ಮೊಬೈಲ್ಗೆ ಬರುತ್ತದೆ. ಒಂದು ವೇಳೆ ನಿಮ್ಮ ಮೊಬೈಲ್ ಸಂಖ್ಯೆ ಅಪ್ಡೇಟ್ ಆಗದೇ ಇದ್ದರೆ, ಆಧಾರ್ ಜೋಡಣೆ ಸಲುವಾಗಿ ಎಲ್ಐಸಿ ಶಾಖೆಗೆ ಭೇಟಿ ನೀಡಿ.
ಸೂಚನೆಗಳನ್ನು ಓದಿದ ತರುವಾಯ 'ಪ್ರೊಸೀಡ್' ಎನ್ನುವ ಇನ್ನೊಂದು ಕೊಂಡಿಯನ್ನು ಕ್ಲಿಕ್ ಮಾಡಿ. ಆಗ ಅಲ್ಲಿ ನಿಮ್ಮ ಹೆಸರು, ಜನ್ಮದಿನಾಂಕ, ಆಧಾರ್ ಸಂಖ್ಯೆ, ಲಿಂಗ, ಇಮೇಲ್ ಐಡಿ, ಪ್ಯಾನ್ ಸಂಖ್ಯೆ, ಆಧಾರ್ಗೆ ನೋಂದಣಿಯಾಗಿರುವ ಮೊಬೈಲ್ ಸಂಖ್ಯೆ, ನಿಮ್ಮ ವಿಮಾ ಪಾಲಿಸಿಯ ಸಂಖ್ಯೆಯನ್ನು ಕೇಳಲಾಗುತ್ತದೆ. ಅವುಗಳನ್ನು ಭರ್ತಿ ಮಾಡಿ, ಓಕೆ ಮಾಡಿದರೆ ಮುಗಿಯಿತು. ಎಲ್ಲ ವಿವರಗಳೂ ಸರಿಯಾಗಿದ್ದ ಪಕ್ಷದಲ್ಲಿ, 'ಜೋಡಣೆ ಪ್ರಕ್ರಿಯೆ ಯಶಸ್ವಿಯಾಗಿದೆ' ಎನ್ನುವ ಸಂದೇಶ ನಿಮಗೆ ತೆರೆ ಮೇಲೆ ಕಾಣಿಸುತ್ತದೆ. ಕೆಲವು ದಿನಗಳ ಬಳಿಕ ನಿಮ್ಮ ಮೊಬೈಲ್ಗೆ ಈ ಬಗ್ಗೆ ಎಲ್ಐಸಿಯಿಂದ ಸಂದೇಶವೂ ಬರುತ್ತದೆ.
ಗಮನಿಸಿ, ಎಸ್ಎಂಎಸ್ ಆಯ್ಕೆ ಇಲ್ಲ
ಎಸ್ಎಂಎಸ್ ಮುಖಾಂತರ ವಿಮೆ ಪಾಲಿಸಿಗೆ ಆಧಾರ್ ಅಥವಾ ಪ್ಯಾನ್ ಸಂಖ್ಯೆ ಜೋಡಣೆ ಮಾಡುವ ಆಯ್ಕೆಯನ್ನು ಎಲ್ಐಸಿ ನೀಡಿಲ್ಲ. 'ಎಸ್ಎಂಎಸ್ ಮೂಲಕ ಎಲ್ಐಸಿ ಪಾಲಿಸಿಗೆ ಆಧಾರ್ ಲಿಂಕ್ ಮಾಡಿ' ಎನ್ನುವ ಕೆಲವು ಸಂದೇಶಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಇವುಗಳ ಜತೆಗೆ ಎಲ್ಐಸಿಯ ಲಾಂಛನವೂ ಈ ಸಂದೇಶಗಳಲ್ಲಿ ಬಳಕೆಯಾಗುತ್ತಿವೆ. ಇವುಗಳನ್ನು ನಂಬಿ ಮೋಸ ಹೋಗದಂತೆ ಟ್ವಿಟರ್ನಲ್ಲಿ ಎಲ್ಐಸಿ ಎಚ್ಚರಿಸಿದೆ.