ಈ ಫ್ಯಾಕ್ಟರಿಯಲ್ಲಿ ಶೇ.100ರಷ್ಟು ಮಹಿಳಾ ಉದ್ಯೋಗಿಗಳು

ಚೆನ್ನೈ: ಕೊಯಮತ್ತೂರಿಗೆ 22 ಕಿ.ಮೀ ದೂರದ ಅರಸೂರು ಗ್ರಾಮದಲ್ಲಿ ಇನ್ನೂ ಸೂರ್ಯೋದಯಕ್ಕೆ ಮುನ್ನವೇ 34 ವರ್ಷದ ರಮೀಲಾ ಎನ್ನುವ 34 ವರ್ಷದ ಮಹಿಳೆ ಕುರ್ತಾದ ಮೇಲೆ ನೀಲಿ ಜಾಕೆಟ್‌ ಧರಿಸಿ ಕೆಲಸಕ್ಕೆ ತೆರಳಲು ಸಜ್ಜಾಗಿದ್ದಳು. ಬೆಳಗಿನ 5.50ಕ್ಕೆ ಖಾಲಿ ಬಸ್ಸೊಂದು ಬಂದು ನಿಲ್ಲುತ್ತದೆ. ತಮಿಳಿನಲ್ಲಿ ರಮೀಲಾ ಕೂಗು ಹಾಕುತ್ತಿದ್ದಂತೆಯೇ ಅವಳಂತೆಯೇ ಸಮವಸ್ತ್ರ ಧರಿಸಿದ್ದ ಮೂವರು ಮಹಿಳೆಯರು ಕೆಲವೇ ಸೆಕೆಂಡ್‌ಗಳಲ್ಲಿ ಹಾಜರು. ಎಲ್ಲರೂ ಬಸ್‌ ಹತ್ತುತ್ತಾರೆ. ಮುಂದಿನ ಹಳ್ಳಿಗೆ ಬಸ್‌ ಸಾಗುತ್ತದೆ. ಹೀಗೆ ಕೆಲವು ಹಳ್ಳಿಗಳನ್ನು ಬಳಸಿಕೊಂಡು ಮಹಿಳಾ ಉದ್ಯೋಗಿಗಳನ್ನು ತುಂಬಿಕೊಂಡ ಬಸ್‌, ಕಿರ್ಲೋಸ್ಕರ್‌ ಬ್ರದರ್ಸ್‌ ಪಂಪ್‌ಗಳ ತಯಾರಿಕಾ ಘಟಕಕ್ಕೆ(ಕೆಬಿಎಲ್‌) ಬರುತ್ತದೆ. 6.30ರ ಹೊತ್ತಿಗೆ ಹೀಗೆಯೇ ನಾನಾ ಬಸ್‌ಗಳ ಮೂಲಕ ನೂರಾರು ಮಹಿಳೆಯರು ಫ್ಯಾಕ್ಟರಿಗೆ ಬರುತ್ತಾರೆ.

ಪ್ರಾರ್ಥನೆ ಬಳಿಕ ಕೆಲಸ ಆರಂಭವಾಗುತ್ತದೆ. ಎರಡು ಪಾಳಿಗಳಲ್ಲಿ ಇಲ್ಲಿ ಕೆಲಸ ಸಾಗುತ್ತದೆ. ಒಂದು ವಿಶೇಷವೆಂದರೆ, ಈ ಫ್ಯಾಕ್ಟರಿಯಲ್ಲಿರುವ ಎಲ್ಲ ಉದ್ಯೋಗಿಗಳೂ ಮಹಿಳೆಯರೇ ಆಗಿದ್ದಾರೆ. ಸೆಕ್ಯೂರಿಟಿ, ಡ್ರೈವರ್‌, ಮ್ಯಾನೇಜ್‌ಮೆಂಟ್‌ ಸೇರಿದಂತೆ ಕೆಲವೇ ಕೆಲವು ಹುದ್ದೆಗಳಲ್ಲಿ ಮಾತ್ರ ಪುರುಷರಿದ್ದಾರೆ. 2011ರಲ್ಲಿ ಕಂಪನಿ ಆರಂಭವಾದಾಗ 100 ಮಹಿಳೆಯರಿದ್ದರು. 2017ರಲ್ಲಿ ಸಂಖ್ಯೆಯನ್ನು ದ್ವಿಗುಣಗೊಳಿಸಲಾಗಿದ್ದು, ಈಗ 204 ಮಹಿಳೆಯರಿದ್ದಾರೆ. ಉತ್ಪಾದನೆ ಪ್ರಮಾಣವನ್ನು ಮೂರು ಪಟ್ಟು ಅಂದರೆ ತಿಂಗಳಿಗೆ 75,000 ಪಂಪ್‌ಗಳಿಗೆ ಹೆಚ್ಚಿಸಲಾಗಿದೆ.

ಈ ಘಟಕವು ಇತರೆ ಘಟಕಗಳಿಗೆ ಉತ್ಪಾದನೆ ವಿಷಯದಲ್ಲಿ ಮಾದರಿಯಾಗಿದೆ. ಮಹಿಳೆಯರಿಂದ ಉತ್ಪಾದಕತೆ ಹೆಚ್ಚುತ್ತಿರುವುದು ಕೆಬಿಎಲ್‌ ಗಮನಕ್ಕೆ ಬಂದಿದ್ದು, ಇತರೆ ಘಟಕಗಳಲ್ಲಿಯೂ ಮಹಿಳಾ ಉದ್ಯೋಗಿಗಳ ಸಂಖ್ಯೆಯನ್ನು ಹೆಚ್ಚಿಸಲಾಗುತ್ತಿದೆ.

ಇಲ್ಲಿ ವಾಟರ್‌ ಪಂಪ್‌ಗಳ ಜೋಡಣೆ, ಪರೀಕ್ಷೆ ಮತ್ತು ಪ್ಯಾಕಿಂಗ್‌ ಕೆಲಸವು ನಡೆಯುತ್ತದೆ. ರಮೀಲಾರಂಥ ನೂರಾರು ಮಹಿಳೆಯರಿಗೆ ಈ ಫ್ಯಾಕ್ಟರಿಯು ಬದುಕು ನೀಡಿದೆ. 2017-18ರಲ್ಲಿ ಕೊಯಮತ್ತೂರು ಘಟಕದಿಂದ 132 ಕೋಟಿ ರೂ. ವಹಿವಾಟು ನಡೆದಿದೆ. 2018-19ರಲ್ಲಿ 180 ಕೋಟಿ ರೂ. ವಹಿವಾಟು ನಿರೀಕ್ಷಿಸಲಾಗಿದೆ.

ಕೊಯಮತ್ತೂರಿನಲ್ಲಿ ಗೃಹ ಬಳಕೆಗೆ ಸಣ್ಣ ವಾಟರ್‌ ಪಂಪ್‌ಗಳನ್ನು ತಯಾರಿಸುವ ಕಿರ್ಲೋಸ್ಕರ್‌ ಬ್ರದರ್ಸ್‌ ಫ್ಯಾಕ್ಟರಿಯಿದ್ದು, ಸಂಪೂರ್ಣ ಮಹಿಳಾ ಉದ್ಯೋಗಿಗಳೇ ಇದ್ದಾರೆ.

ಹರಿದ್ವಾರದ ಎಚ್‌ಯುಎಲ್‌ನಲ್ಲೂ ಮಹಿಳಾ ಶಕ್ತಿ
ಹಿಂದೂಸ್ತಾನ್‌ ಯುನಿಲಿವರ್‌ ಹರಿದ್ವಾರದಲ್ಲಿ ನೈಲ್‌ ಪಾಲೀಷ್‌ ಮತ್ತು ನೈಲ್‌ ಪಾಲೀಷ್‌ ರೀಮೂವರ್‌ಗಳನ್ನು ಉತ್ಪಾದಿಸುವ ಸಣ್ಣ ಕಾರ್ಖಾನೆಯನ್ನು ನಡೆಸುತ್ತಿದೆ. ಇಲ್ಲಿರುವ ಮಹಿಳಾ ಉದ್ಯೋಗಿಗಳು ದೊಡ್ಡ ಸಾಧನೆಯನ್ನೇ ಮಾಡಿದ್ದಾರೆ. ''ನೈಲ್‌ ಪಾಲೀಷ್‌ ಮತ್ತು ರೀಮೂವರ್‌ಗಳು ಮಹಿಳೆಯರಿಗೆ ಸಂಬಂಧಿಸಿದ ವಸ್ತುಗಳು. ಈ ಕಾರ್ಖಾನೆಯನ್ನು ಮಹಿಳೆಯರೇ ನಿಭಾಯಿಸಿದರೆ ಹೇಗೆ?'' ಎಂದು ಆಡಳಿತ ಮಂಡಳಿ ಆಲೋಚಿಸಿತು. ಅಲ್ಲಿದ್ದ ಎಲ್ಲ 25 ಪುರುಷ ಉದ್ಯೋಗಿಗಳ ಜಾಗಕ್ಕೆ ಮಹಿಳಾ ಉದ್ಯೋಗಿಗಳ ನಿಯೋಜಿಸಲಾಯಿತು. ಬಳಿಕ ಉತ್ಪಾದಕತೆಯು ಶೇ.70ರಷ್ಟು ವೃದ್ಧಿಯಾಯಿತು. ಕಾರ್ಯಕ್ಷಮತೆ ಶೇ.90ರಷ್ಟು ಹೆಚ್ಚಿದೆ ಎಂದು ಕಂಪನಿಯ ವಕ್ತಾರರು ಹೇಳಿದ್ದಾರೆ. ಇಲ್ಲಿ 39 ಮಹಿಳಾ ಉದ್ಯೋಗಿಗಳು ಇದ್ದಾರೆ.