- ಬಜೆಟ್ ಅನ್ನೋದು ಯಾವ ರೀತಿಯ ಮಸೂದೆ..?
ಶಾಸಕಾಂಗವು ಯಾವುದೇ ರೀತಿಯ ಕಾನೂನನ್ನು ಸಂಸತ್‌ನಲ್ಲಿ ಅಥವಾ ವಿಧಾನಸಭೆಯಲ್ಲಿ ಮಂಡಿಸುವಾಗ ಅದನ್ನು ಮಸೂದೆ ಎಂದು ಕರೆಯಲಾಗುತ್ತದೆ. ಬಜೆಟ್ ಅನ್ನೋದು ಆರ್ಥಿಕ ಕಾನೂನಿಗೆ ಸಂಬಂಧಿಸಿದ್ದು. ಕೇಂದ್ರ ಸರ್ಕಾರ ಮಂಡಿಸುವ ಬಜೆಟ್ ಆಗಲಿ ಅಥವಾ ರಾಜ್ಯ ಸರ್ಕಾರಗಳು ಮಂಡಿಸುವ ಬಜೆಟ್ ಆಗಲಿ ಎಲ್ಲವೂ ಆರ್ಥಿಕ ಕಾನೂನಿಗೆ ಸಂಬಂಧಪಟ್ಟದ್ದು. ಸರ್ಕಾರದ ಸಾಲಗಳು, ಖರ್ಚು ವೆಚ್ಚಗಳು, ಆದಾಯ, ತೆರಿಗೆ ನೀತಿ ಇತ್ಯಾದಿ ಕಾನೂನನ್ನು ಸರ್ಕಾರ ಬಜೆಟ್‌ನಲ್ಲಿ ಮಂಡಿಸುತ್ತದೆ. ಹೀಗಾಗಿ, ಬಜೆಟ್ ಎಂದರೆ ಆರ್ಥಿಕ ಮಸೂದೆ ಎಂದು ಕರೆಯಬಹುದು. - ರೆವಿನ್ಯೂ ಬಜೆಟ್ ಎಂದರೆ ಏನು..?
ಯಾವುದೇ ಒಂದು ಸಂಸ್ಥೆಯ ಆದಾಯ ಹಾಗೂ ಖರ್ಚುಗಳ ಮಾಹಿತಿ ಒಳಗೊಂಡ ನೀತಿಯನ್ನು ರೆವಿನ್ಯೂ ಬಜೆಟ್ ಎನ್ನಬಹುದು. ಕೇಂದ್ರ ಸರ್ಕಾರದ ಮಟ್ಟಿಗೆ ಹೇಳುವುದಾದರೆ ಕೇಂದ್ರ ಸರ್ಕಾರವು ಮುಂದಿನ ವರ್ಷದಲ್ಲಿ ಸಂಗ್ರಹಿಸಬಹುದಾದ ತೆರಿಗೆಯ ಮೊತ್ತ, ಮುಂದಿನ ಒಂದು ವರ್ಷಗಳ ಕಾಲ ಆಗಬಹುದಾದ ಖರ್ಚುಗಳ ಅಂದಾಜು, ಮುಂದಿನ ಒಂದು ವರ್ಷಗಳ ಕಾಲ ಏರಿಕೆ ಆಗಬಹುದಾದ ಆದಾಯ ಪ್ರಮಾಣ, ಕೊರತೆಯ ಪ್ರಮಾಣ ಹಾಗೂ ಯಾವ ವಲಯಕ್ಕೆ ಎಷ್ಟು ಅನುದಾನ ಮೀಸಲಿಡಲಾಗಿದೆ ಎಂಬ ಎಲ್ಲಾ ಸಮಗ್ರ ಮಾಹಿತಿಗಳನ್ನೂ ರೆವಿನ್ಯೂ ಬಜೆಟ್‌ನಲ್ಲಿ ನಮೂದಿಸಲಾಗಿರುತ್ತದೆ. - ಭಾರತದ ಬಜೆಟ್ ಗಾತ್ರ ಎಷ್ಟು..?
2020-21ರ ಕೇಂದ್ರ ಬಜೆಟ್‌ನಲ್ಲಿ ಒಟ್ಟು ಖರ್ಚು 30,42,230 ಕೋಟಿ ರೂ. ಎಂದು ಅಂದಾಜಿಸಲಾಗಿತ್ತು. ಹಾಗೆ ನೋಡಿದ್ರೆ 2019-20ರ ಬಜೆಟ್‌ಗಿಂತಲೂ ಶೇ. 12.7ರಷ್ಟು ಹೆಚ್ಚು ಖರ್ಚನ್ನು 2020-21ರ ಬಜೆಟ್‌ನಲ್ಲಿ ಅಂದಾಜಿಸಲಾಗಿತ್ತು. ಈ ಪೈಕಿ 8,31,825 ಕೋಟಿ ರೂ.ಗಳನ್ನು ಕೇಂದ್ರದ ಯೋಜನೆಗಳಿಗೆ ವಿನಿಯೋಗ ಮಾಡುವುದಾಗಿ ಸರ್ಕಾರ ಹೇಳಿತ್ತು. ಇನ್ನು 3,39,894 ಕೋಟಿ ರೂ.ಗಳನ್ನು ಕೇಂದ್ರದ ಪ್ರಾಯೋಜಕತ್ವದ ಯೋಜನೆಗಳಿಗೆ ವಿನಿಯೋಗಿಸಲು ನಿರ್ಧರಿಸಲಾಗಿತ್ತು. 2,10,682 ಕೋಟಿ ರೂ.ಗಳನ್ನು ಪಿಂಚಣಿಗಾಗಿ ವಿನಿಯೋಗಿಸಲು ತೀರ್ಮಾನಿಸಲಾಗಿತ್ತು. - ಸರ್ಕಾರಿ ಸಾಲ ಎಂದರೇನು..? ಇದರಿಂದ ಆರ್ಥಿಕತೆ ಮೇಲಾಗುವ ಪರಿಣಾಮ ಏನು..?
ಸರ್ಕಾರ ತೆಗೆದುಕೊಳ್ಳುವ ಸಾಲವು ಆರ್ಥಿಕತೆ ಮೇಲೆ ಭಾರೀ ಪರಿಣಾಮಗಳನ್ನು ಬೀರುತ್ತವೆ. ಸರ್ಕಾರವು ತನ್ನ ಆದಾಯ ಹಾಗೂ ಖರ್ಚನ್ನು ಸರಿದೂಗಿಸಲು ಸಾಲ ಪಡೆಯುತ್ತದೆ. ಸರ್ಕಾರಕ್ಕೆ ತೆರಿಗೆಗಳ ಮೂಲಕ ಆದಾಯ ಬರುತ್ತದೆ. ಈ ಆದಾಯವನ್ನು ಸಾರ್ವಜನಿಕ ಸೇವೆಗೆ ಬಳಸುವ ಸಂದರ್ಭದಲ್ಲಿ ಕಡಿಮೆ ಎನಿಸಿದರೆ ಸರ್ಕಾರ ಸಾಲ ಪಡೆಯುತ್ತದೆ. ಬಜೆಟ್‌ನಲ್ಲಿ ಈ ಬಗ್ಗೆ ಮಾಹಿತಿ ನೀಡುತ್ತದೆ. ಸಾಲ ಪಡೆಯುವ ಪ್ರಮಾಣ ಹೆಚ್ಚಾದಷ್ಟೂ ದೇಶದ ಜಿಡಿಪಿ ಹಾಗೂ ಸಾಲ ಪ್ರಮಾಣದ ಅನುಪಾತದ ಮೇಲೆ ಗಂಭೀರ ಪರಿಣಾಮ ಉಂಟಾಗುತ್ತದೆ. - ‘ನಾಲ್ಕು ಬ್ಯಾಲೆನ್ಸ್‌ಶೀಟ್ ಸಮಸ್ಯೆ’ ಎಂದರೆ ಏನು..?
ದೇಶದ ಆರ್ಥಿಕತೆ ಮೇಲೆ ಪರಿಣಾಮ ಬೀರುವ ನಾಲ್ಕು ಅತಿ ಪ್ರಮುಖ ವಲಯಗಳಿವೆ. ಮೊದಲನೆಯದು ಮೂಲ ಸೌಕರ್ಯ, ಎರಡನೆಯದು ಬ್ಯಾಂಕ್‌ಗಳು, ಮೂರನೆಯದು ಬ್ಯಾಂಕ್‌ಯೇತರ ಹಣಕಾಸು ಸಂಸ್ಥೆಗಳು ಹಾಗೂ ನಾಲ್ಕನೆಯದು ರಿಯಲ್‌ ಎಸ್ಟೇಟ್‌ ಉದ್ಯಮ. ಬ್ಯಾಂಕ್‌ಗಳು ಮೂಲ ಸೌಕರ್ಯ ಹಾಗೂ ರಿಯಲ್‌ ಎಸ್ಟೇಟ್‌ ಉದ್ಯಮ ಸೇರಿದಂತೆ ಹಲವು ಸಂಸ್ಥೆಗಳಿಗೆ ಸಾಲ ಕೊಡುತ್ತದೆ. ಆರ್ಥಿಕತೆ ಏರುಗತಿಯಲ್ಲಿದ್ದ ವೇಳೆ ಬ್ಯಾಂಕ್‌ಗಳು ಮೂಲಸೌಕರ್ಯ ರಂಗದ ಸಂಸ್ಥೆಗಳಿಗೆ ಸಾಕಷ್ಟು ಸಾಲ ನೀಡಿರುತ್ತದೆ. ಆದ್ರೆ, ಈ ಸಂಸ್ಥೆಗಳು ಆರ್ಥಿಕ ಕುಸಿತಕ್ಕೆ ಸಿಲುಕಿದರೆ ಸಾಲ ಮರುಪಾವತಿ ಸಾಧ್ಯವಾಗದೆ ಬ್ಯಾಂಕ್‌ಗಳು ಸಂಕಷ್ಟಕ್ಕೆ ಸಿಲುಕುತ್ತವೆ. ಬ್ಯಾಂಕ್‌ಯೇತರ ಹಣಕಾಸು ಸಂಸ್ಥೆಗಳ ಕಥೆಯೂ ಇದೇ ರೀತಿ ಆದಾಗ ದೇಶದ ಆರ್ಥಿಕತೆ ಸಂಕಷ್ಟಕ್ಕೆ ಸಿಲುಕುತ್ತದೆ. ಸದ್ಯದ ಅಂಕಿ ಅಂಶಗಳ ಪ್ರಕಾರ ದೇಶದ ಬ್ಯಾಂಕ್‌ಗಳು 90,000 ಕೋಟಿ ರೂ. ಸಾಲ ಮರು ಪಾವತಿ ಆಗದ ಸಂಕಷ್ಟಕ್ಕೆ ಸಿಲುಕಿವೆ. ಇದನ್ನೇ ನಾಲ್ಕು ಬ್ಯಾಲೆನ್ಸ್‌ ಶೀಟ್ ಸಮಸ್ಯೆ ಎನ್ನಲಾಗುತ್ತದೆ.
ಬಜೆಟ್ ಅಂದ್ರೆ ಏನು..? ಭಾರತದ ಬಜೆಟ್ ಗಾತ್ರವೇನು..? ಸರ್ಕಾರ ಸಾಲ ಪಡೆಯೋದು ಏಕೆ..? ಎಲ್ಲಾ ಪ್ರಶ್ನೆಗಳಿಗೆ ಇಲ್ಲಿದೆ ಉತ್ತರ..!
ಬಜೆಟ್ ಎಂದರೆ ಸಾಕು ಅದನ್ನು ಕಬ್ಬಿಣದ ಕಡಲೆ ಎಂದು ಭಾವಿಸಿಕೊಳ್ತೇವೆ. ಆದ್ರೆ, ಬಜೆಟ್ ಅನ್ನೋದು ದೇಶದ ಒಟ್ಟು ಆದಾಯ ಹಾಗೂ ಖರ್ಚು ವೆಚ್ಚಗಳ ಅಂದಾಜು ಲೆಕ್ಕವಷ್ಟೇ.. ಮನೆಯ ಎಲ್ಲಾ ಸದಸ್ಯರ ಆದಾಯ ಹಾಗೂ ಖರ್ಚನ್ನು ಲೆಕ್ಕ ಹಾಕುವಂತೆಯೇ ದೇಶದ ಆದಾಯ ಹಾಗೂ ಖರ್ಚನ್ನು ಲೆಕ್ಕ ಹಾಕಲಾಗುತ್ತದೆ. ಆದ್ರೆ, ದೇಶದ ಬಜೆಟ್ ಮಂಡನೆ, ಮನೆಯ ಬಜೆಟ್‌ನಷ್ಟು ಸರಳವಾಗಿ ಇರೋದಿಲ್ಲ.. ಒಂದಿಷ್ಟು ಸಂಕೀರ್ಣತೆ, ಹಲವು ಆಯಾಮಗಳು ಇರುತ್ತವೆ. ಇವುಗಳ ಬಗ್ಗೆ ಒಂದಿಷ್ಟು ಮಾಹಿತಿ ಇಲ್ಲಿದೆ.
Vijaya Karnataka Web 20 Jan 2021, 5:23 pm
ಹೈಲೈಟ್ಸ್‌:
- ಭಾರತದ ಬಜೆಟ್ ಗಾತ್ರವೇನು..? 2019ಕ್ಕೂ 2020ಕ್ಕೂ ಆದ ವ್ಯತ್ಯಾಸ ಏನು..?
- ಸರ್ಕಾರ ಸಾಲ ತೆಗೆದುಕೊಳ್ಳುವುದು ಏಕೆ ಎಂಬ ಪ್ರಶ್ನೆಗೆ ಇಲ್ಲಿದೆ ಉತ್ತರ..!
- ದೇಶ ಎದುರಿಸುತ್ತಿರುವ 'ನಾಲ್ಕು ಬ್ಯಾಲೆನ್ಸ್‌ ಶೀಟ್ ಸಮಸ್ಯೆ' ಎಂದರೇನು ಎಂಬ ಕುತೂಹಲ ನಿಮಗಿದೆಯೇ..?
