ಮಹಾತ್ಮನ ಬಗ್ಗೆ ಸಮಗ್ರ ಮಾಹಿತಿಗಾಗಿ ಗಾಂಧಿಪೀಡಿಯಾ: ವಿತ್ತ ಸಚಿವೆ

ಹೊಸದಿಲ್ಲಿ: ಮಹಾತ್ಮ ಗಾಂಧಿ ಕುರಿತು ಸಮಗ್ರ ಮಾಹಿತಿಗಾಗಿ ವಿಕಿಪೀಡಿಯಾದಂತೆ ಗಾಂಧಿಪೀಡಿಯಾ ಅಭಿವೃದ್ಧಿ ಪಡಿಸುವುದಾಗಿ 2019-20 ಸಾಲಿನ ಕೇಂದ್ರ ಬಡೆಟ್‌ನಲ್ಲಿ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ತಿಳಿಸಿದ್ದಾರೆ.

ಸಂಸತ್ತಿನಲ್ಲಿ ಚಾಣಕ್ಯನ ನೀತಿ ಮತ್ತು ಉರ್ದು ಶಾಹಿರಿ (ಯಕೀನ್ ಹೋ ತೋ ಕೊಯಿ ರಾಸ್ತಾ ನಿಕಲ್ತಾ ಹೈ, ಹವಾ ಕಿ ಓಟ್‌ ಬಿ ಲೇ ಕರ್‌ ಚಿರಾಗ್‌ ಜಲ್ತಾ ಹೈ) ಉಲ್ಲೇಖಿಸಿ ಅವರು ಭಾಷಣ ಆರಂಭಿಸಿದರು.

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರಕಾರ ರಚನೆಯಾದ ಬಳಿಕ ದೇಶದಲ್ಲಿ 9.4 ಕೋಟಿ ಶೌಚಾಲಯಗಳನ್ನು ನಿರ್ಮಿಸಲಾಗಿದೆ. ಸ್ವಚ್ಛ ಭಾರತ ಯೋಜನೆ ಅಡಿಯಲ್ಲಿ ಸುಮಾರು 3 ಲಕ್ಷಕ್ಕೂ ಅಧಿಕ ಗ್ರಾಮಗಳನ್ನು ಬಯಲು ಶೌಚ ಮುಕ್ತ ಗ್ರಾಮಗಳನ್ನಾಗಿಸಿದ್ದೇವೆ. ಮಹಾತ್ಮ ಗಾಂಧಿ ಅವರ 150ನೇ ಜನ್ಮದಿನದ ಅಂಗವಾಗಿ ಅಕ್ಟೋಬರ್ 2ರೊಳಗೆ ಸಂಪೂರ್ಣ ಭಾರತವನ್ನು ಬಯಲು ಶೌಚಮುಕ್ತ ರಾಷ್ಟ್ರವನ್ನಾಗಿಸುವ ಗುರಿ ಹೊಂದಿದ್ದೇವೆಂದು ಹೇಳಿದರು.

ಮೊದಲ ಬಾರಿಗೆ ಬಜೆಟ್‌ ಭಾಷಣ ಮಾಡುತ್ತಿರುವ ನಿರ್ಮಲಾ ಸೀತಾರಾಮನ್‌ ಇತ್ತೀಚೆಗೆ ಲೋಕಸಭಾ ಚುನಾವಣೆಯಲ್ಲಿ ಗಳಿಸಲಾದ ಅಭೂತಪೂರ್ವ ಯಶಸ್ಸು ಪ್ರಸ್ತಾವಿಸಿದರು.