NSSO Survey 2019: ನೋಟು ನಿಷೇಧದ ನಂತರ ರಾಷ್ಟ್ರದಲ್ಲಿ 45 ವರ್ಷಗಳ ದಾಖಲೆ ಮುರಿದ ನಿರುದ್ಯೋಗ ಪ್ರಮಾಣ!

ಹೊಸದಿಲ್ಲಿ: ಭಾರತದಲ್ಲಿ ಕಳೆದ 45 ವರ್ಷಗಳ ಅವಧಿಗೆ ಹೋಲಿಸಿದರೆ 2017-18ರ ಅವಧಿಯ ನಿರುದ್ಯೋಗದ ಪ್ರಮಾಣವೇ ಅತ್ಯಂತ ಹೆಚ್ಚು. ನ್ಯಾಷನಲ್‌ ಸ್ಯಾಂಪಲ್‌ ಸರ್ವೇ ಆಫೀಸ್‌ ನಡೆಸಿದ ಸಮೀಕ್ಷೆಯನ್ನು ಉಲ್ಲೇಖಿಸಿ ಬ್ಯುಸಿನೆಸ್‌ ಸ್ಟಾಂಡರ್ಡ್‌ ಈ ವರದಿಯನ್ನು ಮಾಡಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಕೊನೆ ಗಳಿಗೆಯಲ್ಲಿ ನಿರುದ್ಯೋಗದ ಪ್ರಮಾಣದ ಏರಿಕೆ ಸಮಸ್ಯೆ ಬೆನ್ನೇರಿದೆ. ಇದೀಗ ಪ್ರತಿಪಕ್ಷಗಳ ಮುಂಬರುವ ಲೋಕಸಭೆ ಚುನಾವಣೆಗೆ ಪ್ರಮುಖ ಅಸ್ತ್ರವಾಗಲಿದೆ. ಫೆಬ್ರವರಿ 1ರಂದು ಮಿನಿ ಬಜೆಟ್‌ ಮಂಡಿಸಲು ಎನ್‌ಡಿಎ ಸರಕಾರ ಸಿದ್ಧತೆ ಮಾಡುತ್ತಿರುವ ನಡುವೆ ನಿರುದ್ಯೋಗ ಪ್ರಮಾಣದ ವರದಿ ಬಿಗ್‌ ಶಾಕ್‌ ನೀಡಿದೆ.

ಜುಲೈ 2017ರಿಂದ ಜೂನ್‌ 2018ರ ನಡುವೆ 'ನ್ಯಾಷನಲ್‌ ಸ್ಯಾಂಪಲ್‌ ಸರ್ವೇ ಆಫೀಸ್‌' ಸಮೀಕ್ಷೆ ನಡೆಸಿದ್ದು, ನಿರುದ್ಯೋಗ ಪ್ರಮಾಣ ಶೇ.6.1ರಷ್ಟಿದೆ, ಇದು 1972-73ರ ನಂತರ ಅತ್ಯಂತ ಗರಿಷ್ಠ ಪ್ರಮಾಣ ಎಂದಿದೆ.

ವರದಿ ಪ್ರಕಾರ ನಗರ ಪ್ರದೇಶಗಳಲ್ಲಿ ನಿರುದ್ಯೋಗ ಪ್ರಮಾಣ ಶೇ.7.8ರಷ್ಟಿದೆ. ಗ್ರಾಮಾಂತರ ಪ್ರದೇಶಗಳಲ್ಲಿ ಈ ಪ್ರಮಾಣ ಶೇ.5.3ರಷ್ಟಿದೆ.

2016ರ ನವೆಂಬರ್‌ 8ರಂದು ಪ್ರಧಾನಿ ನರೇಂದ್ರ ಮೋದಿ 500/1000 ರೂ. ಮುಖಬೆಲೆಯ ನೋಟು ನಿಷೇಧದ ನಂತರ ಭಾರತದ ಉದ್ಯೋಗ ಪರಿಸ್ಥಿತಿಯ ಮೊದಲ ಸಮಗ್ರ ಮೌಲ್ಯಮಾಪನ ಇದಾಗಿದೆ.

ಭಾರತದ ಆರ್ಥಿಕತೆ ವಾರ್ಷಿಕವಾಗಿ ಶೇಕಡ 7ಕ್ಕಿಂತ ಹೆಚ್ಚು ವಿಸ್ತರಣೆಗೊಂಡಿದ್ದು, ಪ್ರಮುಖ ರಾಷ್ಟ್ರಗಳ ಪೈಕಿ ವೇಗದ ಬೆಳವಣಿಗೆ ಹೊಂದುತ್ತಿರುವ ಆರ್ಥಿಕ ರಾಷ್ಟ್ರ ಎಂದೆನಿಸಿಕೊಂಡಿದೆ. ಆದರೆ ಈ ಮಹತ್ತರ ಬೆಳವಣಿಗೆ ನಡುವೆ ಸರಿಯಾದ ಉದ್ಯೋಗ ಸೃಷ್ಟಿಯಾಗುತ್ತಿಲ್ಲ ಎಂಬುದು ಸ್ಪಷ್ಟವಾಗುತ್ತಿದೆ.

ಇತ್ತೀಚೆಗೆ ರಾಷ್ಟ್ರದ ಪ್ರಮುಖ ವಿತ್ತ ವಿಶ್ಲೇಷಕ ಸಂಸ್ಥೆ 'ಸೆಂಟರ್‌ ಫಾರ್‌ ಮಾನಿಟರಿಂಗ್‌ ಇಂಡಿಯನ್‌ ಎಕಾನಮಿ', ಕಳೆದ ವರ್ಷ ರಾಷ್ಟ್ರದಲ್ಲಿ 1.10 ಕೋಟಿ ಉದ್ಯೋಗಗಳು ಕಡಿಮೆಯಾಗಿವೆ ಎಂದಿತ್ತು.