ಲೆಕ್ಕ ಹಾಕಿ ಆಯ್ಕೆ ಮಾಡಿ
ಹೊಸ ಮತ್ತು ಹಳೆ ಪದ್ಧತಿಗಳ ನಡುವೆ ಲೆಕ್ಕಾಚಾರ ಹಾಕಿ ಯಾವುದು ಉತ್ತಮ ಎಂಬುದನ್ನು ಆಯ್ಕೆ ಮಾಡಿಕೊಳ್ಳಬೇಕಾಗಿದೆ. ಹೊಸ ಪದ್ಧತಿ ನೋಡಲು ಸರಳವಾಗಿದೆ. ಆದರೆ ಒಂದೊಮ್ಮೆ ಹಳೆ ಪದ್ಧತಿಯಲ್ಲಿ ತೆರಿಗೆ ಉಳಿಸಲು ಹೂಡಿಕೆಗಳನ್ನು ಮಾಡುತ್ತಿದ್ದವರು, ಲೈಫ್ ಇನ್ಶೂರೆನ್ಸ್ಗಳನ್ನು ಕಟ್ಟುತ್ತಿದ್ದವರು ವಿನಾಯಿತಿಗಳನ್ನು ಬಯಸಿದಲ್ಲಿ ಹಳೆಯದನ್ನೇ ಮುಂದುವರಬೇಕಾಗುತ್ತದೆ. ಆಗ ಹೊಸ ತೆರಿಗೆ ಪದ್ಧತಿಯ ದರ ಕಡಿತದ ಲಾಭ ಸಿಗುವುದಿಲ್ಲ.
ಹೊಸ ಪದ್ಧತಿಯಲ್ಲಿ ಇವುಗಳೆಲ್ಲ ಇಲ್ಲ
ಒಂದೊಮ್ಮೆ ಹೊಸ ಪದ್ಧತಿ ಆಯ್ಕೆ ಮಾಡಿಕೊಳ್ಳಲು ನೀವು ಮನಸ್ಸು ಮಾಡಿದಲ್ಲಿ ಅಲ್ಲಿ ಈ ಕೆಳಗಿನ ವಿನಾಯಿತಿಗಳನ್ನೆಲ್ಲಾ ಬಿಡಬೇಕಾಗುತ್ತದೆ.
- ಸಾರಿಗೆ ಭತ್ಯೆ - ವೇತನದಾರರಿಗೆ ಸದ್ಯ ನಾಲ್ಕು ವರ್ಷಗಳಿಗೆ ಎರಡು ಬಾರಿ ಇದು ಲಭ್ಯವಿದೆ.
- ಮನೆ ಬಾಡಿಗೆ ಭತ್ಯೆ - ಸಂಬಳದ ಭಾಗವಾಗಿ ಹಲವರಿಗೆ ಇದನ್ನು ಪಾವತಿ ಮಾಡಲಾಗುತ್ತಿದೆ. ಒಂದೊಮ್ಮೆ ಬಾಡಿಗೆ ಮನೆಯಲ್ಲಿ ಉಳಿದುಕೊಂಡಿದ್ದರೆ ನಿರ್ಧಿಷ್ಟ ಮಿತಿಯವರೆಗೆ ಇದಕ್ಕೆ ವಿನಾಯಿತಿಯನ್ನು ಪಡೆದುಕೊಳ್ಳುವ ಅವಕಾಶವಿದೆ.
- 50,000 ರೂಪಾಯಿಗಳ ಸ್ಟ್ಯಾಂಡರ್ಡ್ ಡಿಡಕ್ಷನ್
- ಸೆಕ್ಷನ್ 16ರಲ್ಲಿ ಉಲ್ಲೇಖವಾದ ಮನರಂಜನಾ ಭತ್ಯೆ, ಪ್ರೊಫೆಷನಲ್ ಟ್ಯಾಕ್ಸ್ಗೂ ವಿನಾಯಿತಿ ಇದೆ.
- ಗೃಹ ಸಾಲದ ಮೇಲೆ ಪಾವತಿ ಮಾಡಿದ ಬಡ್ಡಿಗೆ ಸೆಕ್ಷನ್ 24ರ ಅಡಿಯಲ್ಲಿ ಲಭ್ಯವಿದ್ದ ವಿನಾಯಿತಿ.
- ಸೆಕ್ಷನ್ 57ರ ಅಡಿಯಲ್ಲಿ 15,000 ರೂಪಾಯಿಗಳ ಕುಟುಂಬ ಪಿಂಚಣಿಗೆ ವಿನಾಯಿತಿಗೆ ಇದ್ದ ಅವಕಾಶ.
ಆದಾಯ ತೆರಿಗೆ ಹೊಸ ಸ್ಲಾಬ್ ಸೌಲಭ್ಯ ಬೇಕಾ..? ಹಾಗಾದ್ರೆ ನಿಮ್ಮ 'ಹೂಡಿಕೆ' ಯೂಸ್ಲೆಸ್ ಆಗುತ್ತೆ..!
ಜನಪ್ರಿಯ ತೆರಿಗೆ ವಿನಾಯಿತಿಗಳಿಗೆ ತಿಲಾಂಜಲಿ
- ಸೆಕ್ಷನ್ 80 ಸಿ - ಪ್ರಾವಿಡೆಂಟ್ ಫಂಡ್, ಲೈಫ್ ಇನ್ಶೂರೆನ್ಸ್ ಪ್ರೀಮಿಯಂ, ಮಕ್ಕಳ ಶಾಲಾ ಬೋಧನಾ ಶುಲ್ಕ, ಇದರ ಜೊತೆಗೆ ಇಎಲ್ಎಸ್ಎಸ್, ಎನ್ಪಿಎಸ್, ಪಿಪಿಎಫ್ ಹೂಡಿಕೆಗಳಿಗೆ ವಿನಾಯಿತಿ ಪಡೆಯುವುದು ಸಾಮಾನ್ಯ. ಈ ಜನಪ್ರಿಯ ವಿನಾಯಿತಿ ರದ್ದಾಗಲಿದೆ.
ಆದರೆ ಸೆಕ್ಷನ್ 80 ಸಿಸಿಡಿ ಮತ್ತು ಸೆಕ್ಷನ್ 80ಜೆಜೆಎಎನ್ನು ಕ್ಲೇಮ್ ಮಾಡಬಹುದು.
- ಮೆಡಿಕಲ್ ಇನ್ಶೂರೆನ್ಸ್ ಪ್ರೀಮಿಯಂಗೆ ಸೆಕ್ಷನ್ 80 ಡಿ ಅಡಿಯಲ್ಲಿ ಇದ್ದ ವಿನಾಯಿತಿ ಇರುವುದಿಲ್ಲ.
- ಸೆಕ್ಷನ್ 80 ಡಿಡಿ ಮತ್ತು 80ಡಿಡಿಬಿ ಅಡಿಯಲ್ಲಿ ಲಭ್ಯವಿದ್ದ ವಿನಾಯಿತಿಗಳನ್ನೂ ಕಳೆದುಕೊಳ್ಳಲಿದ್ದೀರಿ.
- 80 ಇ ಅಡಿಯಲ್ಲಿ ಬರುವ ಶೈಕ್ಷಣಿಕ ಸಾಲದ ಬಡ್ಡಿ ಮೇಲಿನ ವಿನಾಯಿತಿಗೆ ಅವಕಾಶವಿಲ್ಲ.
- 80 ಜಿ ಅಡಿಯಲ್ಲಿ ಚಾರಿಟೇಬಲ್ ಸಂಸ್ಥೆಗಳಿಗೆ ನೀಡುವ ದೇಣಿಗೆಗೂ ಇನ್ನು ಮುಂದೆ ವಿನಾಯಿತಿ ಇಲ್ಲ.
- ಅಲ್ಲದೆ ಹೊಸ ತೆರಿಗೆ ಪದ್ಧತಿ ಆಯ್ಕೆ ಮಾಡುವವರು ಚಾಪ್ಟರ್ VIA ಅಡಿಯಲ್ಲಿ ಬರುವ ಎಲ್ಲಾ ವಿನಾಯಿತಿಗಳನ್ನು ಕಳೆದುಕೊಳ್ಳಲಿದ್ದಾರೆ.
ಲಾಭವೋ? ನಷ್ಟವೋ?
ಒಂದೊಮ್ಮೆ ನಿಮ್ಮ ವಾರ್ಷಿಕ ಆದಾಯ 20 ಲಕ್ಷ ರೂಪಾಯಿ ಎಂದುಕೊಳ್ಳಿ (ಇರಲೂಬಹುದು). ಆಗ ಹಳೆ ಪದ್ಧತಿಯಂತೆ ನೀವು ವಿನಾಯಿತಿಗಳನ್ನು ಪಡೆದುಕೊಂಡರೆ 2,39,500 ರೂಪಾಯಿಗಳನ್ನು ತೆರಿಗೆಯಾಗಿ ಪಾವತಿಸಬೇಕಾಗುತ್ತದೆ. ಆದರೆ ಹೊಸ ಪದ್ಧತಿಯನ್ನು ನೀವು ಆಯ್ಕೆ ಮಾಡಿಕೊಂಡರೆ 3,37,500 ರೂಪಾಯಿ ಸರಕಾರಕ್ಕೆ ಕಟ್ಟಬೇಕಾಗುತ್ತದೆ. ವಿವರ ಚಿತ್ರದಲ್ಲಿದೆ.