ಕ್ರಿಪ್ಟೋ ಎಕ್ಸ್‌ಚೇಂಜ್‌ಗಳಿಗೆ ತಲೆನೋವಾದ ತೆರಿಗೆ ನೀತಿ! ವಿದೇಶಿ ಕ್ರಿಪ್ಟೋಕರೆನ್ಸಿಗೆ ಶೇ.2ರಷ್ಟು ಹೆಚ್ಚುವರಿ ತೆರಿಗೆ?

ಹೊಸದಿಲ್ಲಿ: ಕ್ರಿಪ್ಟೋಕರೆನ್ಸಿ ವಹಿವಾಟುಗಳನ್ನು ನಿವ್ವಳ ತೆರಿಗೆ ವ್ಯಾಪ್ತಿಯಡಿ ತರುವ ಕೇಂದ್ರ ಸರ್ಕಾರದ ನಿರ್ಧಾರವು ಕ್ರಿಪ್ಟೋ ಎಕ್ಸ್‌ಚೇಂಜ್‌ಗಳಿಗೆ ಹೊಸ ತಲೆನೋವಾಗಿ ಪರಿಣಮಿಸಿದೆ. ಇದರಿಂದ ಕ್ರಿಪ್ಟೋ ನಾಣ್ಯಗಳ ವರ್ಗಾವಣೆಯಲ್ಲಿ ಹೊಸ ಅಡೆತಡೆ ಎದುರಾಗಲಿದೆ. ಏಕೆಂದರೆ, ವಿದೇಶಿ ಕ್ರಿಪ್ಟೋ ಎಕ್ಸ್‌ಚೇಂಜ್‌ಗಳಿಂದ ಖರೀದಿಸುವ ಕ್ರಿಪ್ಟೋ ಕರೆನ್ಸಿ ಮೇಲೆ ಶೇ.2ರಷ್ಟು ಈಕ್ವಲೈಸೇಶನ್ ಲೆವಿ ವಿಧಿಸುವ ಕುರಿತು ತೆರಿಗೆ ಇಲಾಖೆ ಚಿಂತಿಸುತ್ತಿದೆ. ಇದು ಕ್ರಿಪ್ಟೋ ಕರೆನ್ಸಿಗಳ ಮೇಲೆ ತೆರಿಗೆ ಹೊರೆಯನ್ನು ಮತ್ತಷ್ಟು ಹೆಚ್ಚಿಸಲಿದ್ದು, ಕ್ರಿಪ್ಟೋ ಎಕ್ಸ್‌ಚೇಂಜ್‌ಗಳಿಗೆ ನುಂಗಲಾರದ ತುತ್ತಾಗಿದೆ.

ಏಕೆಂದರೆ, ಭಾರತೀಯರು ಹೆಚ್ಚಿನ ಸಂದರ್ಭಗಳಲ್ಲಿ ಕ್ರಿಪ್ಟೋ ಸ್ವತ್ತುಗಳನ್ನು ಭಾರತದ ಹೊರಗೆ ವಾಸಿಸುವ ಜನರಿಂದ ಕ್ರಿಪ್ಟೋ ವಿನಿಮಯದ ಮೂಲಕ ಖರೀದಿಸುತ್ತಾರೆ. ಹೀಗಾಗಿ ವಿದೇಶಗಳಿಂದ ಖರೀದಿಸುವ ಕ್ರಿಪ್ಟೋ ಕರೆನ್ಸಿಗೆ ಶೇ.2ರಷ್ಟು ಹೆಚ್ಚುವರಿ ತೆರಿಗೆ ಬೀಳಲಿದೆ. ಇದರ ಜತೆಗೆ 10,000 ಕ್ಕೂ ಹೆಚ್ಚಿನ ವಹಿವಾಟಿನ ಮೇಲೆ ಶೇ.1ರ ಟಿಡಿಎಸ್‌ ವಿಧಿಸಲಿದೆ. ಇದಷ್ಟೇ ಅಲ್ಲದೆ, ಕ್ರಿಪ್ಟೋ ಕರೆನ್ಸಿ ವಹಿವಾಟಿನಿಂದ ಬರುವ ಯಾವುದೇ ರೀತಿಯ ಆದಾಯದ ಮೇಲೆ ಶೇ.30ರಷ್ಟು ತೆರಿಗೆ ಬೀಳಲಿದೆ.

2023ರೊಳಗೆ ಬರಲಿದೆ ಡಿಜಿಟಲ್ ರೂಪಾಯಿ! ಫಿಯಟ್‌ ಕರೆನ್ಸಿಗಿಂತ ಇದು ಹೇಗೆ ಭಿನ್ನ!

ಹೆಚ್ಚಿನ ಕ್ರಿಪ್ಟೋ ವಿನಿಮಯ ಕೇಂದ್ರಗಳು ದೇಶದ ಹೊರಗೆ ನೆಲೆಗೊಂಡಿವೆ. ಇದರಿಂದ ಕ್ರಿಪ್ಟೋ ವಹಿವಾಟಿನಲ್ಲಿ ಮಾರಾಟ ಮಾಡುವವರು ಭಾರತದಲ್ಲಿ ನೆಲೆಸಿದ್ದಾರೆಯೇ ಅಥವಾ ಇಲ್ಲವೇ ಎಂಬುದರ ಕುರಿತು ಸ್ಪಷ್ಟತೆ ಇಲ್ಲದಿರುವ ಅನೇಕ ನಿದರ್ಶನಗಳಿವೆ ಎಂದು ತಜ್ಞರು ಹೇಳುತ್ತಾರೆ. ಹಿಗಾಗಿ ಕ್ರಿಪ್ಟೋ ವಹಿವಾಟಿನ ಬಹುತೇಕ ಸಂದರ್ಭಗಳಲ್ಲಿ ವಿನಿಮಯ ಕೇಂದ್ರಗಳನ್ನು ಶೇ. 2 ರಷ್ಟು ಈಕ್ವಲೈಸೇಷನ್‌ ಲೆವಿಗೆ ಒಳಪಡಿಸಲಾಗುತ್ತದೆ.

ಕ್ರಿಪ್ಟೋಕರೆನ್ಸಿ ವಹಿವಾಟಿನ ಮೇಲೆ ಶೇ.1ರ TDS ವಿಧಿಸುತ್ತಿರುವುದೇಕೆ? ಸರಕಾರದ ಪ್ಲ್ಯಾನ್‌ ಏನು?

ಅಸೈರ್ (Asire) ಕನ್ಸಲ್ಟಿಂಗ್‌ನ ವ್ಯವಸ್ಥಾಪಕ ಪಾಲುದಾರ ರಾಹುಲ್ ಗಾರ್ಗ್ ಹೇಳುವ ಪ್ರಕಾರ, ಎಕ್ಸ್‌ಚೇಂಜ್‌ಗಳು ತೆರಿಗೆ ನಿಯಮಗಳನ್ನು ಅನುಸರಿಸಬೇಕಾದರೆ ಮೊದಲು ಹಣದ ವರ್ಗಾವಣೆ ಹಂತದಲ್ಲೇ ಗಮನಹರಿಸಬೇಕು. ಮೊದಲು ವಹಿವಾಟಿನ ಒಟ್ಟು ಮೊತ್ತವ ಸಂಗ್ರಹಿಸಿ, ತೆರಿಗೆಗಳನ್ನು ಕಡಿತ ಮಾಡಿದ ನಂತರವೇ ಮಾರಾಟಗಾರರಿಗೆ ಪಾವತಿಸಬೇಕಾಗುತ್ತದೆ. ಇದು ಕ್ರಿಪ್ಟೋ ವಿನಿಮಯಕ್ಕೂ ಮೊದಲೆ ಹಲವಾರು ತೆರಿಗೆ ಅನುಸರಣೆಗಳಿಗೆ ಕಾರಣವಾಗಬಹುದು. ಖರೀದಿದಾರರು ಭಾರತದ ನಾಗರಿಕರಾಗಿದ್ದು, ಕ್ರಿಪ್ಟೋ ಎಕ್ಸ್‌ಚೇಂಜ್‌ ಭಾರತದ ಹೊರಗಿದ್ದರೆ ಶೇ.2ರ ಈಕ್ವಲೈಸೇಶನ್ ಲೆವಿಯೂ ಅನ್ವಯವಾಗುತ್ತದೆ. ಹೆಚ್ಚಿನ ವಿನಿಮಯ ಕೇಂದ್ರಗಳು ಭಾರತದ ಹೊರಗೆಯೇ ಇರುವುದು ಎಕ್ಸ್‌ಚೇಂಜ್‌ಗಳಿಗೆ ಅಡಚಣೆಯಾಗಿದೆ.