ಬಿಟ್‌ಕಾಯಿನೂ ಅಲ್ಲ, ಈಥರೂ ಅಲ್ಲ, 2021ರಲ್ಲಿ 1300% ಏರಿಕೆಯಾದ ಕ್ರಿಪ್ಟೋ ಕರೆನ್ಸಿ ಇದು!

ಈ ವರ್ಷ ಹಳೆಯ ಕ್ರಿಪ್ಟೋ ಕರೆನ್ಸಿಗಳು ಹೆಚ್ಚಿನ ಆದಾಯ ನೀಡಿದ ಹೊಸ ಕ್ರಿಪ್ಟೋ ಕರೆನ್ಸಿಗಳ ನಡುವೆ ಸ್ವಲ್ಪ ಮಟ್ಟಿಗೆ ನೆಲೆ ಕಳೆದುಕೊಂಡಿವೆ. ಈ ಪ್ರವೃತ್ತಿ ಮುಂದುವರಿಯಬಹುದು ಎನ್ನುತ್ತಿದ್ದಾರೆ ಕ್ರಿಪ್ಟೋ ಮಾರುಕಟ್ಟೆಯ ಸಂಶೋಧಕರು!

ಮಾರುಕಟ್ಟೆ ಮೌಲ್ಯದ ಪ್ರಕಾರ ನೋಡಿದಾಗ ಮೂರು ಪ್ರಮುಖ ಕ್ರಿಪ್ಟೋ ಕರೆನ್ಸಿಗಳಲ್ಲಿ ಬೈನಾನ್ಸ್‌ ಕಾಯಿನ್‌ ಈ ವರ್ಷ ಉತ್ತಮ ಗಳಿಕೆ ದಾಖಲಿಸಿದೆ. ಇದು ತನ್ನ ಪ್ರತಿಸ್ಪರ್ಧಿಗಳಾದ ಬಿಟ್‌ಕಾಯಿನ್ ಮತ್ತು ಈಥರ್ ಅನ್ನೂ ಮೀರಿಸಿದೆ. ಆರ್ಕೇನ್ ರಿಸರ್ಚ್ ಪ್ರಕಾರ, ಕ್ರಿಪ್ಟೋ ಎಕ್ಸ್ಚೇಂಜ್ ಬೈನಾನ್ಸ್ ಹೋಲ್ಡಿಂಗ್ಸ್ ಲಿಮಿಟೆಡ್ ಬಿಡುಗಡೆ ಮಾಡಿರುವ ಈ ಕಾಯಿನ್‌ 2021ರಲ್ಲಿ ಸರಿಸುಮಾರು ಶೇ. 1,300ರಷ್ಟು ಗಳಿಕೆ ದಾಖಲಿಸಿದೆ.

ಇದರ ಜತೆ ಪ್ರತಿಸ್ಪರ್ಧಿಗಳನ್ನು ಹೋಲಿಸಿದಾಗ, ಬಿಟ್‌ಕಾಯಿನ್‌ ಈ ಬಾರಿ ಶೇ. 65ರಷ್ಟು ಗಳಿಕೆ ದಾಖಲಿಸಿದೆ, ಎರಡನೇ ಅತೀ ದೊಡ್ಡ ಕ್ರಿಪ್ಟೋ ಕರೆನ್ಸಿ ಈಥರ್‌ ಶೇ. 408ರಷ್ಟು ಬೆಳವಣಿಗೆ ಕಂಡಿದೆ.

ಕ್ರಿಪ್ಟೊಕರೆನ್ಸಿ ಸಂಪೂರ್ಣ ನಿಷೇಧ ಈಗ ಕಷ್ಟಸಾಧ್ಯ: ತಜ್ಞರ ಅಭಿಮತ
ಬಿಎನ್‌ಬಿಯನ್ನು ಹೆಚ್ಚಾಗಿ ಬೈನಾನ್ಸ್‌ನಲ್ಲಿ ಬಳಸಲಾಗುತ್ತದೆ. ಕ್ರಿಪ್ಟೋ ವಹಿವಾಟಿನ ಪರಿಮಾಣದ ಲೆಕ್ಕದಲ್ಲಿ ಬೈನಾನ್ಸ್‌ ವಿಶ್ವದ ಅತಿದೊಡ್ಡ ಕ್ರಿಪ್ಟೋ ವಿನಿಮಯ ತಾಣವಾಗಿದೆ. ಇದು ಬೈನಾನ್ಸ್‌ ಸ್ಮಾರ್ಟ್ ಚೈನ್‌ನ ಸ್ಥಳೀಯ ಕರೆನ್ಸಿಯಾಗಿದೆ. ಬೈನಾನ್ಸ್‌ ಸ್ಮಾರ್ಟ್ ಚೈನ್‌ ವಿಕೇಂದ್ರೀಕೃತ ಹಣಕಾಸು (DeFi) ಮತ್ತು ಇತರ ಅಪ್ಲಿಕೇಶನ್‌ಗಳಲ್ಲಿ ಬಳಸುವ ಸ್ಮಾರ್ಟ್ ಒಪ್ಪಂದಗಳನ್ನು ಬೆಂಬಲಿಸುವ ಬ್ಲಾಕ್‌ಚೈನ್ ಪ್ಲಾಟ್‌ಫಾರ್ಮ್ ಆಗಿದೆ. ಆರ್ಕೇನ್ ರಿಸರ್ಚ್ ಪ್ರಕಾರ ಎಥೆರಿಯಮ್ ಬ್ಲಾಕ್‌ಚೈನ್‌ಗೆ ಸವಾಲೊಡ್ಡುವ ರೀತಿಯಲ್ಲಿ ಬೈನಾನ್ಸ್‌ ಸ್ಮಾರ್ಚ್‌ ಚೈನ್‌ ಅನುಯಾಯಿಗಳನ್ನು ಪಡೆದುಕೊಂಡಿದ್ದು ಕೂಡ ಬೈನಾನ್ಸ್‌ ಕಾಯಿನ್‌ ಲಾಭ ಹೆಚ್ಚಳಕ್ಕೆ ಪ್ರಮುಖ ಕಾರಣವಾಗಿದೆ.

ಕ್ರಿಪ್ಟೊ ಕರೆನ್ಸಿಗಳ ಮೌಲ್ಯದಲ್ಲಿ ಗಣನೀಯ ಇಳಿಕೆ! ಕಾರಣವೇನು?
ಇತರ ಪರ್ಯಾಯ ನಾಣ್ಯಗಳು ಅಥವಾ 'ಆಲ್ಟ್‌ಕಾಯಿನ್‌ಗಳು' ಕೂಡ 2021ರಲ್ಲಿ ಭಾರಿ ಲಾಭಗಳನ್ನು ಕಂಡಿವೆ. ಡಿಜಿಟಲ್ ಸ್ವತ್ತುಗಳಿಗಾಗಿ ಹೂಡಿಕೆದಾರರ ಆಸಕ್ತಿಯಲ್ಲಾದ ತೀವ್ರ ಹೆಚ್ಚಳ ಮತ್ತು ಕ್ರಿಪ್ಟೋ ಪರಿಸರ ವ್ಯವಸ್ಥೆಯ ವಿಸ್ತರಣೆಯಿಂದ ಇಂಥಹದ್ದೊಂದು ಬೆಳವಣಿಗೆ ನಡೆದಿದೆ.

ಉದಾಹರಣೆಗೆ ಇತರ ಸ್ಮಾರ್ಟ್ ಕಾಂಟ್ರಾಕ್ಟ್‌ಗಳನ್ನು ಬೆಂಬಲಿಸುವ ಬ್ಲಾಕ್‌ಚೈನ್ ಪ್ಲಾಟ್‌ಫಾರ್ಮ್‌ಗಳೊಂದಿಗೆ ಸಂಪರ್ಕಗೊಂಡಿರುವ ಸೋಲಾನಾ ಮತ್ತು ಫ್ಯಾಂಟಮ್ ಮೊದಲಾದ ನಾಣ್ಯಗಳು ಬೈನಾನ್ಸ್‌ ಕಾಯಿನ್‌ನ ಆದಾಯವನ್ನೂ ಮೀರಿಸಿದೆ.

2021ರಲ್ಲಿ ಬಿಟ್‌ಕಾಯಿನ್ ತನ್ನ ಬಲವನ್ನು ತೋರಿಸುತ್ತಿದ್ದಾಗ, ಪರ್ಯಾಯ ಕಾಯಿನ್‌ಗಳಿಗೆ ಬಂಡವಾಳ ನಿರಂತರವಾಗಿ ಹರಿದು ಬಂದಿದೆ ಎಂದು ಸಂಸ್ಥೆ ತನ್ನ ಟಿಪ್ಪಣಿಯಲ್ಲಿ ಹೇಳಿದೆ.

ಮೆಟಾವರ್ಸ್ ಮತ್ತು ಗೇಮ್‌ಫೈಗೆ ಸಂಬಂಧಿಸಿದ ಕಾಯಿನ್‌ಗಳಲ್ಲದೆ ‘ಈಥ್‌-ಕಿಲ್ಲರ್ಸ್’ನಂತ ಕಾಯಿನ್‌ಗಳು ಈಥೇರಿಯಂನ್ನು ಗುರಿಯಾಗಿಸಿವೆ ಎಂದು ಸಂಸ್ಥೆಯ ವಿಶ್ಲೇಷಕರು ಊಹಿಸಿದ್ದಾರೆ.